اسمحولي أكتب باللهجة المصرية لوجود مصطلحات بنستخدمها يوميا و كانها اهانة وهي في الحقيقة كلام عادي جدا..اصل الاهانة بتبدأ بالنوايا.
يعني فهموني كدا مين اللي قال ان وصف شخص "بصاحب البشرة البيضا" عادي و وصف شخص "بصاحب البشرة السودا" عيب!!..ماهو دا لون و دا لون!!..
مين اللي قال ان وصف "رفيعة" عادي..و "تخينة" عيب!!..ماهو دا وصف و دا وصف..دا "قصيرة" لو اتذكرت في جملة مفيدة مع "طويلة" بنتكسف!!..
طب مين اللي حكم ع الأفارقة انهم درجة تانية!!..شوية ناس عنصريين عاشوا زمان ف احنا بنكمل نشر افكارهم!..
مين نشر ثقافة كليات القمة و كليات اي كلام!!..صنايع خمس سنين مثلا اللي بتخرج حرفيين و أسطوات في أمريكا بيعيشوا في أحسن البيوت و بيكسبوا أكتر من مِهن تانية كتير!!..مؤهلاتهم عندنا احنا بس أي كلام..
مين قال ان الناس مقامات..و اختصر "المقامات" في الفلوس و ساكن فين و بتلبس منين!!..زمان كان فيه شوية ناس اخترعوا ألقاب "باشا و بيه و برنس و ملك"..ماتوا على فكرة واحنا لسه بنكمل مسيرتهم!..
مين ابتدا يقيم الناس..غير الناس!..إحنا!!..
إحنا اللي إخترعنا الحرب النفسية قبل السلاح..إحنا اللي تفننا في طرق كسر النفس و تفوقنا في التخطيط لدا..
إحنا اللي قولنا ع الطيب عبيط..و المتدينة معقدة..و الكافر يستحق الموت..و كاظم الغيظ ضعيف..و المطلقة صلاحيتها انتهت..و اللي مراعي ضميره بيمثل..و اللي عايشة لوحدها سهلة..
إحنا اللي عملنا قوالب طوب محتاجين نكسرها للي بيتصرف كدا..نوقفه عند حده و نفهمه ان الاذى مبيضحكش حتى لو اتقال في نكتة..و هزاره غير مقبول و بيهدد وجوده في دايرة حياتنا حتى لو كانوا عشرة عمر..لان ببساطة سنين عمرك اللي جاية محتاج تعيشها في سلام.
نقدر نغير دا باننا نبتدي بنفسنا..نقوِّمها و نربيها..و نتعلم نوقف انتشار موروثات مش شبهنا و مش بتاعتنا..محتاجين نقرا كلام ربنا اللي خلقنا و طلب مننا نحافظ على ارواح بعض.
محتاجين نربي الجيل الجديد ع انها خرافات لحد ما تندثر و تموت..فيموت معاها كل احساس خجل و خوف زايف قايم ع كلام ناس مؤذية..ناس مؤذية لازم نبتدي نسكتها.
التعليقات