في اليوم دا بالذات..سَحَبِتْ ورقة و قلم و كَتَبِتْ..
"عمري ما حسيت يعني ايه مفيش راجل في حياتي الا لما كبرت..و دا غريب..المفروض اكون اتعودت..طول عمري معتمدة ع نفسي..اني ادور ع طرق تفرحني و ادور ع حلول ل مشاكلي..لوحدي..بنفسي..و كنت بستغرب لما اي بنت تقول انا هاشتكي لابويا او انا هاحكي لاخويا..ايه دا هو فيه اوبشن اسمه كدا..
بس اللي اكتشفته ان وانا صغيرة كنت فاكرة انه الطبيعي ميبقاش فيه حد أعتمد عليه..و اللي اكتشفته لما كبرت بعد ما زارني احساس بالخوف كنت المفروض احسه و انا اصغر من كدا بكتير..احساس بالخوف ضرب كل تجاربي و خبراتي عرض الحائط..رجعني لاحساس الفطرة..اني بنت..و طبيعتي هاتحتاج لراجل.
كل مرة كنت بحتاج فيه سند و ابص لماما..كنت بشوفها بنت صغيرة زيي رغم أطنان المسئوليات اللي شايلاها عننا..كنت بحس انه كفاية بقى مشاكل عليها و اني لازم اعتمد ع نفسي..كنت بشوفها زيي..باباها مش موجود يشيل عنها و بالرغم من كدا شايلانا كلنا..وانا مضايقة عشان شايلة مسئولية نفسي!!..لا مش هاحكيلها..كفاية عليها كدا. كل مرة بيقرب مني واحد..كنت بستنى منه افعال..افعال و بس..اه الكلام بيفرحني..بس طول عمري لما بقرأ عن قصص الراجل الجدع..كانت عبارة عن عمل و سوا و راح و جه و واجهة و انتصر او حتى انهزم بس بعد محاولات شجاعة منه عملت من هزيمته نجاح كبير في عيون حبيبته..مكنش كلام و بس!!..كنت بستنى مجهود ملحوظ..محاولات..بس.
كل مرة بتمنى فيها اشوف الشروق..اتمشى وسط البلد الساعة 5 الصبح..و ملقيش اللي ينفع اطلب منه دا بتعكنن..بتعكنن حرفيا..ما بالك بقى لما اتعرض لظلم ولا اتحط في موقف مع راجل وللاسف معرفش اخد حقي منه..اتعرض لموقف مضايقة في الشارع و اقرر اخد قرار اروح بيه ع القسم هاكلم مين؟؟!!!..و دي ابسط أمثلة يعني.
انا مش مستنية حاجة صعبة..مستنية بس الراجل المقدام..اللي فاهم دوره و عارف ان اول خطوة في زرع احساس الأمان ما بيننا هاتيجي من ناحيته..و بعدها هايلاقي جيش واقف وراه زي ما بيقرا عن الست اللي في ضهر راجلها..هيلاقي انا. شكرا لكل موقف مريت به علمني حاجة..والحمدلله ع وجودك يارب..مصدر الامان و احساس الاطمئنان."
التعليقات
كليمات بها من القوة ما يجعلها فعلا ملهمة