"لسه بدور عليك.. فيهم!!."

"عدت سنة و اتنين و تلاتة..وانا لسه بدور عليك.. فيهم!!..

انا رافضة دا مش عايزة اعمله..بس مش ببطل اقارن..

رسايله كانت احلى..كلامه في التليفون الطف..نظراته..خناقاته..خروجاته..اختلافاته..

في الحقيقة مكنتش أحلى..مكنتش مميزة..بس انا كنت بحبك..لسه..بحبك..كنت بشوف الطبيعي معاك معجزة وانت عملتها علشاني..

واللي بيحب بيرسم على كل جرح من اللي بيحبه تاتو ملون شكله حلو و يداري..متضحكش..ايوه..بنخترع عُذر لكل كلمة وجعتنا..و موقف خذلنا..و قهرة كسرتنا..

انا ضحكت معاك بصوت عالي.. من قلبي..انا بقالي ٣ سنين مش بضحك..عايزة اضحك..

عارف المشكلة فين..انك لو رجعت بردو مش هاضحك من قلبي..انا شوفت حاجة جواك مش هاعرف بعدها اعمل مشوفتش..تخيل اني ندمانة اني فتَّحت..دورت.. و شغلت دماغي بعد ما كنت ركنته سنين وانا معاك..

مفيش رقم ع موبايلي اتصاله بيخطفني زي رقمك..بشم ريحة البرفيوم بتاعك في الشارع بتخطف..حد بينده حد باسمك بتخطف..متستهونش ب بتخطف دي..أنا نفسي تقريبا بيوقف.. حركتي بتتشل..لثواني كدا..متستهلش يحصل فيا كدا بسببك صح؟؟!..

عارف ليه!..عارف شوفت ايه جواك مش هاعرف اعمل مشوفتوش..انك جبان..اووووووف اوحش حاجة ممكن بنت تشوفها في راجل..مش بتختار حياتك..ميُعتمدش عليك في انك تكون صاحب قرار..و اول حاجة حبيت تثبت بيها انك شخصية و جامد كانت أنا..هاها..

عارف.. انا قصيت صورنا كلها نصين..و سيبت النص اللي انا فيه..بفرح لما اشوف شكلي وانا مبسوطة..و بحفظه.. علشان لما ييجي اللي يضحكني و يخليني شبه الصور كدا.. هاقول هو دا..لقيته..

صورك؟؟!..حرقتها..بس زعلت..النار كانت شبه حريقة قايدة في قلبي..محدش حس بيها..و صعبت عليا نفسي.. أصل ازاي؟!!!..

ازاي عدت سنة و اتنين و تلاتة..وانا لسه بدور عليك.. فيهم!!."

-----------------------------------------------------------------------------------------------------------------------

أتمنالكوا الخروج السالم من اي علاقة بتعمي عنيكوا و بتطفي بصيرتكوا عن الأذى اللي بييجي منها و انكوا تعيشوا في سعادة مزيفة متبطنة بوجع مستمر كل مسكناته اعذار مش حقيقية بنختلقها علشان بنحب.