تقدر تقولى انت اتشافت و لا لأ و مين هو الشخص اللى بيمثل لك العالم؟
هل انت مِتشاف و لا لأ؟
تفتكر انت مِتشاف؟ و مِتشاف من مين بالظبط أو عايز مين يشوفك و يكون فخور بيك؟
قرأت القصة دى على تويتر
"اخويا الصغير مصاحب الشيخ اللي في الجامع جنب البيت وكل شويه يطلب منه يأذن ، الراجل حفظه الاذان وبقي يأذن ويصحيني ويقولي اسمعيني وأقوله حاضر قالي أنا هأذن دلوقتي ونزل تحت أذن الأذان كله وبعد مخلص قالي في المايك سمعتيني يا ساااااره."
و خليتنى افكر ازاى الطفل بيكون محور حياته شخص معين بعينه.
هو مايعرفش فى العالم غيره او هو بالنسباله العالم كله، لو الشخص دة متواجد بشكل مستمر و بيعطيه كل الاهتمام و الانتباه الطفل بيحس بالتبعية انه كل احتياجاته اتلبت من خلال انه يحس انه محور حياة الشخص دة زى ما الشخص دة محور حياته
غالباً الشخص دة بيكون فرد من عائلته: أمه، أبوه، اخوه أو أخته
الشخص دة ليه موصفات مش بالصدفة: لو هنقول السيناريو المثالى هيكون مقدم الرعاية الاساسية (الأم) اللى بيلبي احتياجات الطفل البديهية من الولادة زى الاكل و النوم و الغيار الشخص دة كمان المفروض بيلبي احتياجاته النفسية زى انه يقعد معاه، يلعب معاه، يشيله و يرضعه لأن الرضاعة من اهم مصادر الطفل للاحساس بالامان و القرب.
بس ساعات مش كل الشروط بتتوفر فى نفس الشخص، فالشخص اللى بيمنحه احتياجاته النفسية ممكن يكون فرد تانى من العائلة: بيقبله زى ما هو، بيلعب معاه، بينهم ذكريات سعيدة، بيعطيه اهتمام و حنان و بيحس معاه بقبول غير مشروط.
لو دة ماحصلش بيفضل جواه الطفل المجروح اللى ماتشافش من الشخص اللى بيمثله العالم و بيفضل يحاول يداوى الجرح دة بنفسه عن طريق انه يحاول يكون مبهر للناس بشكل عام اياً كانوا مهمين أو لأ.
المشكلة هنا انه مهما حقق و اثبت نفسه بيفضل الجرح موجود لا يشفى و بيفضل فى عجلة محاولة اثبات لنفسه انه يستحق يتشاف و يتقدر ،لأن الشخص دة كان جزء مهم من تكوين صورته الذاتية و صورته عن العالم.
و يكبر شوية و يلاقى شخص يعطيه بعض من الاعجاب و الاهتمام فيحس انه لأول مرة انه كافى و يستحق اعجاب و انتباه شخص فى الحياة و يحبه من كل قلبه، و بشكل لا واعى يحط عليه دور المداوى من جراح الطفولة او دور احد الابويين اللى كانوا المفروض يفوروا الاحتياج دة.
و بالتبعية ممكن يؤدى للاعتمادية و ممكن يوصل للتعلق المرضى و الخذلان لو الشخص دة كان معجب بيه اعجاب مؤقت و قرر يمشى فى اى وقت من العلاقة.
تفتكروا ليه المبالغة دى كلها؟
عشان ببساطة الشخص دة اصلح بعض من صورته الذاتية ومفهومه عن استحقاقه للحب و التقدير و الفخر.
تقدر تقولى انت اتشافت و لا لأ و مين هو الشخص اللى بيمثل لك العالم؟
التعليقات