علاقتنا مع الأشياء

هل تقدر تستشعر علاقتك مع الجمادات؟ هل تقدّر دورهم في حياتك وقيمتهم عالية عندك؟

أمس كان عيد ميلاد لميا ❤️

من وأنا صغيرة، بابا علمني إنه الجمادات تحس .. والبيت لو حننقل منه، يحس بفراقنا، والجوال لو نوينا نغيره ممكن يبدأ يخرب ..

دائمًا كانت عندي علاقة غير مع أشيائي، كنت أبوس اللابتوب لما أصحى من النوم، وأعتذر من جوالي لو طاح ..

عشان كده علاقتي مع لميا غير ❤️

أول يوم شفتها فيه كان ٩/٩/٢٠٢٠ ! وبدأت قصة الحب! كنت عارفة إني أبغا اسميها، بس مالقيت الاسم من البداية 😔

وبعد كم أسبوع، أصرّيت إنه ألاقي الاسم .. وجلست جلسة تأملية، وجلست اسأل، إلى مالقيت اسم لميا .. وفعلًا حسيتها لميا .. ولما سألتها لوالاسم عاجبها، جاني الإحساس بموافقتها 😍

معنى اسم لميا الجميلة والحسناء، خفيفة الظل والمحبوبة، وحسنة الأخلاق .. طموحة وتتحمل المسؤولية وناجحة ❤️❤️ وهي فعلًا كده!

🌸💕🌸

في بعض الناس يستغربوا من علاقتي معاها، ودائما أقول كيف ما تتخيلوا إني أحبها!

هي تعطيني تجربة رائعة كل مرة أكون معاها .. تعطيني إحساس الحرية والانطلاق .. تعطيني إحساس الأمان والاحتواء ..

لميا تخاف علي، وتفضل تذكرني بحزام الأمان لو ما ربطته وما توقف إلى ما أربطه ..

لميا لو نسيت المفتاح جوتها وأنا خارجة، تقعد تطلع صوت، عشان أتذكر وما أترك المفتاح جوتها وأخرج ..

لميا تساعدني كيف أوقّف، وتنبهني لو أنا بأوقّف صح ولا لازم أنتبه وأغيّر ..

لميا شافتني بكل حالاتي .. وأنا فرحانة، وأنا أضحك، وأنا أبكي، وأنا زعلانة ومتضايقة، وأنا معصبة .. ودائمًا كانت معايا وجنبي ..

لميا أروح معاها مواعيد الشغل، وفعاليات الترفيه، وجلسات التشافي، ودورات التطوير، وكل مكان تتوقعوه!

لميا رحت معاها العمرة، وعلى قد ما كنت متوترة إني أسوق لمكة، على قد ما هي أخذت بيدي وحمستني وساعدتني ❤️

لميا فيها أكلم حبايب قلبي وأنا أسوق .. واسمع أغاني وأنبسط .. وأتطور وأسمع بودكاست أو شيءتعليمي وأنا أسوق برضه ..

لميا تستضيف أحب الناس على قلبي دائمًا، وفيها يلاقوا الجو كويس لهم، والريحة حلوة، والمناديل جاهزة!

استشعاري بكل شي تعمله لي لميا، وكل تفصيلة في علاقتنا، يكبر كل يوم في قلبي ..

🌸💕🌸

مرة كنت أسوق واتصلت علي صحبتي وقالتلي طيبة بسرعة افتحي الراديو ..

وسمعت الشيخ بيتكلم في البرنامج وبيقول إنه الرسول عليه الصلاة والسلام مو بس كان يسمي الحيوانات ولكن كان كمان يسمي أغراضه!

الرسول عليه الصلاة والسلام كان يشرب في كوبين اثنين، وكل واحد كان له اسم ..

الرسول عليه الصلاة والسلام كان يسمي سيوفه: ذو الفقار، البتار، وغيرهم ..

وقال الشيخ إنه الرسول عليه السلام كان يعامل الجمادات بكل رقي، وإنه الآن العلم الحديث بيثبت إنه الجمادات مكونة من إلكتروناتوبروتونات وهي كائنات حية ..

بعدين الشيخ سأل، مين مننا اليوم يسمي أشياءه، مين مننا يسمي سيارته! (طبعًا أنا رفعت الصوت وسرت أقول للميا اسمعي اسمعييي!)

وعيوني كلها سارت دموع!

قشعرني جسمي إنه أنا كنت بأسوي شي بكل حب، ومن قلبي، وبسبب استشعاري .. واكتشفت إنه اللي بأسويه يعتبر من الهدي النبوي ..

🌸💕🌸

أمس احتفلت بلميا إني أهديتها shower بالبخار جوها إلى البيت وعملوا لها هو .. وحطيت لها شرائط بيضاء على أيادي الأبواب حقتها .. وبخرتها .. وشغلت لها أغاني عيد ميلاد في السماعات .. وغنّينا لها Happy Birthday 😍

اليوم أبغا أقول للميا، كل سنة وإنت طيبة 😩❤️ ..

وقد إيش سنتي الماضية كانت حلوة بوجودك! وأنا سعيدة بيك وبصحبتك ❤️ والحمدلله عليك ..

أبغاكم تحكوني في التعليقات لو مسميين أي شيء من أشياءكم .. 🌿😍☘️❤️

وأتمنى لكم نهاية أسبوع سعيدة ومباركة ومليئة بالاتصال مع الأشياء اللي حولينكم 💕