ازاي هتخرجي من الأزمة ده اختيارك ومسؤوليتك أنتي وبس.. خليكي واثقة هي فترة وهتعدي..
كلنا بلا استثناء بنمر بأزمات في حياتنا.. وده طبيعي جدا
لازم نعرف ان اي فترة صعبة بنمر بيها عبارة عن (بداية – صعود – قمة – هبوط – نهاية) زي المنحنى كده فأي أزمة أكيد هتنتهي في وقت ما.. مفيش حاجة هتستمر للأبد..
*بس الفكرة كلها بقى أزاي اتخطي الأزمة من غير ما اخسر نفسي؟..
1- خدي شاور.. اول حاجة بيمتنع عنها اللي بيمر بأزمة وداخل على اكتئاب هي التعامل مع المياه (حتى لو غسيل الوش) الوضوء كتير هيأدي الغرض.
2- رتبي اوضتك.. مهم جدا البيئة اللي حواليكي تكون مريحة.. مرتبة.. نظيفة.
3- اشغلي وقتك بالشغل.. دراسة.. طبخ.. اي حاجة ركزي فيها.. المهم بلاش تسيبي نفسك للفراغ والأزمة.
4- اهتمي بنفسك شوية.. دلعيها خصصي وقت للعناية بجسمك وبشرتك وشعرك هيفرق معاكي كتير.
5- اخرجي وقابلي اصحابك "الناس الرايقة اللي بتضحك على طول" هيغيرو مزاجك فعلا.
6- فضفضي وشاركي مشاعرك وعيطي مع امك/ اختك/ صحبتك.. اوعي تكتمي او تنعزلي.
7- حاولي تضحكي.. اتفرجي على حاجات كوميددية.. بلاش دراما وبلاش اغاني حزينة.
8- لو مش قادرة تعملي حاجة.. متعمليش اي حاجة خدي وقتك.. براحة على نفسك.. المهم انها فترة وهتعدي وانتي اللي هتخرجي نفسك بنفسك منها مش حد تاني.
9- اقفلي كل الاشعارات (الفيس والانستاجرام) في الموبايل لأنها بتسبب التوتر افصلي الفيشة.. ونصيحة أرجوكي بلاش تشاركي حياتك الشخصية على السوشيال ميديا.
10- اكتبي افكارك على الورق.. خرجي كل حاجة في دماغك على الورق حتى مشاعرك طلعيها على الورق الطريقة دي بتريح كتير وكمان بتوضح الأمور.. وتخليكي تعرفي تاخدي قرار سليم.
11- غيري سؤال (ليه ده بيحصل معايا؟) لسؤال (أزاي اتعامل مع اللي بيحصل حاليا؟) وده اسمه عقلية الحل.. هيفرق كتير في طريقة تعاملك مع الوضع الصعب اللي بتمري به..
12- استخيري.. استشيري.. اطلبي المساعدة من متخصصين. افتكري (ما خاب من استشار)
13- ادعي وقت الفجر.. (الدعاء بيغير الأقدار).. شوفي مفتاحك مع ربنا ايه وكتري منه. خليكي مؤمنة واصبري.
ازاي هتخرجي من الأزمة ده اختيارك ومسؤوليتك أنتي وبس.. خليكي واثقة هي فترة وهتعدي..
بقلم/ سلمى النوبي
التعليقات