عبارات كتيرة بنسمعها في حياتنا اليومية بشكل متكرر، وكأنها شئ عادي، رغم إنها جارحة وقاسية ومهينة، لدرجة تستوجب إلغاءها تماما من قامةس حياتنا.
عبارات كتيرة بنسمعها في حياتنا اليومية بشكل متكرر، وكأنها شئ عادي، رغم إنها جارحة وقاسية ومهينة، لكن الأشخاص اللي بيقولوها بيعتبروا انها خفة دم وهزار، وفي الواقع هي موجعة لدرجة تستوجب إلغاءها تماما من قاموس حياتنا، زي مثلا:
- انت إنسان فاشل (ممكن نقول لسه الفرصة ما جاتش)
- انت بني آدم نحس ( ممكن نقول لسه الحظ ما ابتسمش)
- أصلها مطلقة يعني وكده (هي ست عادية جدا مش مختلفة عن أي ست، لما نتكلم عنها ما ندخلش الطلاق في الموضوع اصلا)
- أصلها عانس يا عيني (الزواج نصيب يا متنمرينوقد تكون حياتها افضل بدون زواج وقد يكون اختيارها أساسا)
- مابتعرفش (تتصرف- تسوق- تاخد قرار…الخ) عشان ست ( الست بتعمل معجزات، فإن لم تستطع فعل شئ فهي كأي إنسان يصيب و يخطئ ويتعثر أحيانا يعني الموضوع ملهوش علاقة بالنوع)
- خسيتي كده ليه؟! انتي عيانة؟! ( ملناش دعوة إطلاقا، هي حررررررررة)
- لمًا خسيتي وشك بقى شكله وحش! ( ملناش دعوة إطلاقا، هي حررررررررة)
- تخنتي قوي - تخنتي ليه كده؟! ( ملناش دعوة إطلاقا، هي حررررررررة)
- لما تخنتي ملامحك اختفت! يعني برضو وشك شكله وحش. ( ملناش دعوة إطلاقا، هي حررررررررة)
- شكلك كبر قوي! ( فلتقل خيرا أو لتصمت)
- لبستي حجاب ليه؟! شكلك كبر ( ملناش دعوة إطلاقا، هي حررررررررة)
- قلعتي الحجاب ليه؟! هو انتِ صغيرة؟! ( ملناش دعوة إطلاقا، هي حررررررررة)
- لبستي نقاب ليه؟! من جمالك؟! ( فلتقل خيرا أو لتصمت)
- جوزها أحلى منها - مراته أحلى منه ( فلتقل خيرا أو لتصمت)
- كبرت خلاص و راحت عليها ( فلتقل خيرا أو لتصمت)
- عيلة صغيرة ما تفهمش حاجة ( فلتقل خيرا أو لتصمت)
- اسمها چوعععععععععب مش job .. حبايبنا اللي بيصلحوا النطق بطريقة تحرق الدم
اسمه بيييييييض أومليعععععععععععت مش أومليت.. (ارحمونا)
- حبايبنا اللي بيتكلموا نص الكلام انجليزي و نص عربي.. ده غلط يا حبايبي.. نتكلم انجليزي بس او عربي بس.. و بما انه مصر دولة اعتقد والله اعلم انها عربية يبقى نتكلم عربي.
- راجل كبير وهايف ( فلتقل خيرا أو لتصمت)
- ست كبيرة ومتصابية ( ملناش دعوة إطلاقا، هي حررررررررة)
- اتجوز على مراته.. خاااااااين مزواااااااج بتاع ستاااااات (الله أعلم بظروف الناس ملناش دعوة خااااااالص)
- اطلقوا عشان هو كذا أو هي كذا (الله أعلم بظروف الناس ملناش دعوة خااااااالص وقد يكون ربنا أراد لهما الخير)
- بتخلف بنات - ما بتخلفش - اتأخرتي في الخلفة ليه ( وكأننا نعارض إرادة رب العالمين القائل "يَهَبُ لِمَن يَشَآءُ إناثا وَيَهَبُ لِمَن يَشَآءُ الذكور * أَوْ يُزَوِّجُهُمْ ذُكْرَاناً وإناثا وَيَجْعَلُ مَن يَشَآءُ عَقِيماً إِنَّهُ عَلِيمٌ قَدِيرٌ" ارحمونا يرحمكم الله هو وحده الذي يعلم الحكمة من ذلك)
الخلاصة:
احترم اختيارات الناس، محدش وصي على حد، خلي لسانك حلو الدنيا مش ناقصاك، وعلى فكرة من تدخل فيما لا يعنيه سمع ما لا يرضيه، ركز في حياتك وخليك في نفسك، واحفظ كرامتك، صحح المعلومات بذوق و لباقة وشياكة، الأدب فضلوه عن العلم، وأخيرا.. أصبح للتنمر عقوبة قانونية.. فعلى السادة المتنمرين حفظ لسانهم بقى.. كلامكم يا ظرفاء ممكن يتسبب في رفع ضغط بني ادم أو غضبه أو ألمه لدرجة تجعل النوم يهرب من عينيه..
ملحوظة: المقال بالعامية المصرية عشان ينتشر والناس تستوعبه بلغة دارجة، وسهلة وأي شخص يفهمها.
التعليقات