قصة : هابيل

قصة رعب مؤلفة من سلسلة كوابيس ، تتسم بالطبيعة المصرية

أنا أسمي "هابيل صابر عبد الحي" عايش لوحدي في شقتي المتواضعة اللي ورثتها عن والدي الأستاذ "صابر عبد الحي " مدرس أول لغة عربية بمدرسة أرض المعارف ، بحب شغلي جدا وبستمتع بيه ، أنا بشتغل محلل مالي في واحدة من اكبر شركات الأوراق المالية في القاهرة..، الحقيقة الشغل مريح جدا لأنه قريب من بيتي ومش بضطر حتي اخد العربية إلا لو متأخر جدا يعني في العادة بروح وبرجع علي رجلي ،الموضوع مبياخدش اكتر من ١٠ دقايق مشي وكمان اتعودت علي ده من ساعة ما بدأت شغل فيها من ٣ سنين تقريبا ...في يوم ،فاكره كويس أخدت قرار لحظي وكان أغبي قرار في حياتي ..كنت راجع من شغلي بتمشي كالعادة في طريقي المعتاد بردو ، لمحت علي جانب الطريق نوتة صغيرة لونها أسود ..شكلها شيك وملفتة للنظر ..وطيت وأخدتها وقررت أني اول ما أروح هفتحها وأحاول أوصل لصاحبها وأرجعهاله لو كانت مهمة بالنسباله ولو فيها معلومات اقدر اوصله عن طريقها...النهاردة الخميس ،بكرا عطلتي الأسبوعية اللي بقضيها نايم طول النهار علشان بسهر طول الليل بتسلي في حاجة معينة ..كانت الساعة ١٢ في منتصف الليل تقريبا لما كنت بفكر هقضي الليلة أزاي ..من أفلام جديدة أو الكتب والقصص اللي أشتريتها في أول الأسبوع ، بس في لحظة أفتكرت النوتة اللي لقيتها النهاردة الصبح في طريقي للبيت وسيبتها علي ترابيزة في غرفة المعيشة..قررت إني أقعد أتفقدها وأحاول أحدد هوية صاحبها وأوصله ..وبردو الحقيقة كان عندي فضول رهيب أني اشوف اللي فيها...صحاب كتير ليا لما بيفتحوا كتاب او قصة جديدة او نوتة مجهولة بيبدأوا من أخر صفحة والحقيقة أنا طول عمري بستغرب ده وبعارضهم فيه ،رأيي اني المفروض ابدأ في الشئ زي ما أتكتب من قدام لورا ..و فعلا فتحت أول صفحة في النوتة وبدأت اقرا اللي فيها...خط جميل ومنظم جدا ،تخيلت من التنظيم ده إنها تخص رجل أعمال او محاسب كبير أو محامي ..لحد ما قريت اللي موجود في أول صفحة واللي خلي الدم للحظات يتجمد في عروقي ..الصفحة كان نصها كالتالي:اليوم: ٢٣ إبريل لعام ٢٠١٧ ، يوم الأتنين.. الأسم: السيدة \ أمال السيد عبد النعيم ..السن: ٦٢ سنة ...التفاصيل: الحقن بمخدر من النوع x ، قطع الأطراف الأربعة بواسطة منشار كهربي في عملية أستغرقت ٢:٣١ ثانية ، فتح منطقة البطن والصدر بمشرط طبي فتحة طولها ٧ سم في عملية أستغرقت ١:٤٤ ثانية ، إخراج جميع الأحشاء والأعضاء الداخلية و توزيعها بعشوائية علي أرض المكان وعصر القلب بإستخدام مقبض حديدي خاص....(أنتهي النص).مكنتش مصدق اللي قريته ، في البداية كنت بحاول افهم نفسي إن اللي كاتب ده جراح ،بس بعد ما قريت النص للأخر كنت بترعش بلا توقف وبصوابع مرتعشة كنت بلقي النظر علي الصفحة التانية واللي كان نصها افظع :اليوم: ١٤ مايو لعام ٢٠١٧ ، يوم الأربعاءالأسم: السيد\ هاشم حسنين الخولي السن : ٤٦ سنة...التفاصيل: الخنق بإستخدام كيس بلاستيكي في عملية أستغرقت ١:٥٠ ثانية ، سلخ جلد الظهر والفخذ الأيسر بإستخدام ألة حادة ، خلع العين اليمني بواسطة كماشة حديدية ، فتح البطن والصدر بإستخدام مشرط طبي وخلع القلب و الكلية اليسري ..( إنتهي النص).خلصت الصفحة ولسة جسمي بيتنفض ومش قادر أسيطر علي أطرافي ،جسمي كله عرقان مع إني بردان جدا..في اللحظة دي قررت افتح اللاب توب اللي كان قدامي وأعمل اللي جه في دماغي ساعتها ..ايوة قررت ابحث عن أسماء الناس دي علي جوجل ..وللأسف شفت افظع حاجة عيني شافتها في حياتي..الناس دي فعلا اتقتلوا وبنفس التفاصيل اللي موجودة في النوتة وبنفس التواريخ..صورهم كانت بشعة أبشع مما تخيلت ...في اللحظة دي جالي فضول غريب أني اعمل حاجة غريبة عليا ،قررت افتح اخر صفحة في النوتة ..مكنش فضول علي قد ما كان خوف من أني اكمل أكتر او يمكن كنت عايز اعرف مين اخر ضحية وأبحث عنها .......بس لقيت حاجة غريبة.. أخر صفحة كانت فاضية ..مكتوب فوق رقم (٦٠) بس مش مكتوب أسم علي عكس باقي الصفحات السابقة ،قبل ما اقفل النوتة ..عيني وقعت علي نص مكتوب في ضهر الصفحة الأخيرة الفاضية ..النص كان بيقول: أزيك يا "هابيل" ..الحقيقة أنا عارف إنك مبتفتحش أخر صفحة في الأول و إلا نص الرسالة دي كان هيتغير تماما ، خليني أقولك يا "هابيل" إنك ملقتش النوتة دي بالصدفة!..أنا مراقبك من فترة وعارف خط سيرك كويس.. كل اللي إحتاجت أعمله إني أحطها في طريقك اللي متعود تمشي منه ..وحصل...أنت نفذت كل اللي كنت مستنيه منك ، كنت مطيع جداً... أنت ماتش إعتزالي يا "هابيل"..أنت الأسم الأخير اللي هيتحط في أخر صفحة ..قررت أكون مختلف في أخر جريمة ليا وأخليك تقرا عني وعن النمط الممتع اللي بستخدمه ..مكنتش عارف أنت هتقرا قد أيه بظبط بس اي كان انت اكيد قريت كفاية ..كفاية إنك تتخيل اللي هيحصلك ، ودلوقتي ..مش مطلوب منك غير إنك تحط المفكرة دي جنبك ومتتحركش من مكانك ابدا وأوعي تبص وراك ويستحسن تغمض عينيك .... أراك في الجحيم يا صديقي.، ومتنساش " ولقد فعلها أخ لنا من قبل"