الوحدة متطَلب المُرهقين

تدوينة تتمثل في وصفِ الوِحدة وتذكر بعض الكلمات الّتي تمثل شعور الإنسان حين تسكن قلبه..

عندي يقين بإنه الإنسان لما بيختار "يكون لحاله"..

بختار هالشي لثلاثة أسباب; إما بكون مُرهق كفاية وتحت ضغط نفسي ببكي الحجر حرفيًا..

أو بكون بحاول يهرب من تعلقه بشخص أو أمل بشيء معين..

أو بكون خسر أعزّ ما ملك وما بقي عنده أي شي بشعر إنه رح يخسره..

وباعتقادي كل سبب من الأسباب مُرعب أكتر من غيره!

لما الإنسان يحيط فيه الهدوء من كل جانب.. فجأة يتحول لإنسان بخاف من مشاعره.. من إحساسه.. بخاف حتّى يفكّر فيها..وقتها بختار يكون وحيد.. وحيد لحتّى ما يلاقي شي حلم فيه وتمناه.. وبعد ذلك خسره..وحيد لحتّى ما يتعلق بشي وهالشي يختفي فجأة..وحيد لمّا يتأكد تمامًا إنه ما بقدر يشرح ولا يحكي شو بعيش.. وشو بفكّر بذهنه وشو بشعر بلقبه..

وحيد لأنه بدأ يشعر إنّه الطريق ما بناسبه بس "لا مفرّ ولا مهرب منه" للأسف..!

أغلب الوقت.. بتضل عالقة ببالي جملة "مشاعر الإنسان هي أغلى شي بملكه".. وهاد رأيي ويقينًا هالجملة بحكيها من قلبي وعلى اعتقاد جازم فيها..

كيف لمّا يكون هالإنسان.. "عاطفي بالدرجة الأولى"!

إذا أنت مش قادر تسعد إنسان.. راجع كلماتك على الأقل بحيثْ تكون موزونة وما تجرح مشاعره..

إذا أنت ما بتعرف تردّ على الكلام الحلو.. ابتسم..ما بيطلع لأي شخص يلومك.. "لأنه كل حد فينا طريقة تعبيره تختلف تمامًا عن الإنسان الآخر.."إذا أنت مش قادر تعالج جرح في قلب إنسان..لا تلومه على شي سببله هالجرح.. يا بتكون طبيب وبتعرف شو الدوا للجرح ذاته.. يا إما لا تحطّ فوق الجُرح ملح..

الإنسان بعشق الوحدة "مش من فراغ"!

لما يكون تعب وبذل كل طاقته وروحه وخسرْ أقرب طموح لقلبه في أسعد وقت المفروض يكون حصّل فيه هالطموح..لما يكون عايش شيء مجبر ومفروض عليه يعيشه.. لما يدور على مُعين وسند.. بس ما يلاقي..

لما يحاول وكل المحاولات تأبى بالفشل..لما ما يلاقي احترام.. "ولما يحسّ إنه مشاعره بلا قيمة"!

لما ما يُشعر ولا واحد بالمية إنه في حد بحاول لأجله.. أو بحاول يفرحه لو بكلمة.. أو حتّى بحاول يهتمّ فيه لو لمرّة وحده فقط ويعرف شو بحب وشو بكره..

وقتها رح يعشق الوحدة فعلًا من أعماق قلبه!

-رحمه خالد داود