(الأسباب السبعة لمعوقات العادات )

في المقالة دي هنتعرف علي أهم سبع أسباب بتخلي العادات تفشل في تطبيقها ..

صباح الفل :)

لو سألتك إيه هي الأسباب اللي بتـخليك أحيانًا تسيب العادة اللي كنت متـحمس ليها في البداية ...وتقرر تبقي زي " ريمة " لما رجعت لعادتها القـديمة فغالبًا الإجابات كتيرة قوي .. وأنا حابب أدردش معاك فيها ...لإن في أسباب كتيرة الناس متعرفهاش أحيانًا هي اللي بتخلي عاداتك تفشل فعلاً في الإستقرار الذاتي ::

-حالة الطقس :-

بعض الناس بتعتقد إن الوقت مناسب لتغيير أو أكتساب اي عادة ..لكن إكتشفت إن حالة الطقس أحيانًا تقدر تكون عقبة قدامك ..فمش كل الأزمنة المناخية مناسبة لتفعيل أي عادة .. ولا تغييرها .. الشتاء علي سبيل المثال من أكثر الشهور الغير مناسبة لإكتساب عاداتك صحية المتعلقة بالوزن والتغذية ..ده لإن الـجسم بيدخل مرحلة جوع مستمرة طول الشتاء علشان يقدر يـحتفظ بطاقة حرارية ..وده السبب إننا كلنا بنشتكي إن الهدوم بتاعت الصيف مش بتدخل في جسـمنا بعد فصل الشتاء مباشرة وإننا بقينا " دباديب " تتـحرك علي الأرض :) .. لكنه مناسب قوي للقراءة جنب الدفاية ومع كوباية سـحلب جـملية كده تعيش مع الروايات والقصص والأداب .. كمان أحيانًا بتحصل حالة تعرف علميًا بإسم " إكتئاب الشتاء " ودي حالة نفسية بتسبب زهق وملل وطاقة سلبية لإن الشمس مش بتكون متواجدة طول اليوم .. فمودك بيتغير .. وده يقدر يدمر بعض العادات المتعلقة بمزاجك ..زي مثلاً الـخروجات ..أوتنام لوقت طويل بعد ما كنت عاوز تفعل عادات دينية زي قيام الليل ..أو تـحس بـخمول فتشرب نسكافيه كتير مع إنك كنت عاوز تبطله ..بالتالي ..الطقس بيأثر للغاية عليك في الموضوع ده فلازم تتفهم العملية دي كويس قوي.

التوجه الذهني :-

في دراسة عملوها علي بعض الناس ...عرضوا عليهم أكل غير صحي وأكل صحي نسبيًا يعني ..وقسموهم في مـجموعتين .. طلبوا من الأولي ..إن الأكل اللي شايفه غير صحي ويرفضوا أكله يقولوا كلمة " لا أستطيع " ..وطلبوا من المـجموعة التانية ..إنه لما يتعرض عليهم برضه الأكل الغير صحي واللي مش بيـحبوه بشكل عام يقولوا كلمة " لا أفعل ".. وبعد إنتهاء التـجربة المثيرة دي ... عرضوا علي الأشخاص من كل مـجموعة إنهم يـختاروا ما بين نوعين ( شيكولاتة أو رقائق الذرة المـحلاة ) .. نسبة اللي إختاروا رقائق الذرة بإعتبارها خيار أكثر صحية من الشيكولاتة من الـمجموعة الاولي كانوا 39 % ..في حين كانت المـجموعة الثانية نسبتها 69 % .. إيه الفكرة في التـجربة ؟! الفكرة إن الـمجموعة الأولي مارست توجه ذهني غير صحيح لما أجبروهم يقولوا كلـمة" لا أستطيع "..في حين المـجموعة الثانية قالت " لا أفعل " واكتشفوا إن العقل بيشوف الكلمة دي أفضل وأقوي وأشد تـحديدًا فيما يتعلق بالأوامر والرغبات .. كلمة لا أستطيع معناها إنك تقدر بعدين ..أما لا أفعل ..معناها إنتفاء الصفة نهائيًا .. العلم أثبتت قوة العبارة دي تـحديدًا .. .بالتالي لما تـحب تـحذف عادة خد عهد إنك تمارس توجه ذهني بكلمة لن أفعل هذه العادة مرة أخرى..بدلاً من .. لا أستطيع من اليوم القيام بهذه العادة ...الفرق في الكلمتين هيخلق ترابط قوي ..وإسـتخدمها دائمًا مع العادات السلبية اللي عاوز تـحذفها.

-الألـم :-

كتير من الناس عندها ألـم من تنفيذ العادة نفسها ..أه ده بيظهر فعلاً مع الوقت ..خصوصًا لو ملتزموش وعملوا عادات متوافقة مع ذاتهم ومتسقة مع الشخصية اللي عاوزين يكونوا عليها .. يـمكن تكون العادة الـجيدة نفسها مصدر ألـم لصاحبها ...في ناس مثلا متعرفش تصحي الصبح نهائيًا ..تلاقيها حبت تغير العادة دي ..ومع الوقت صحيانهم بدري مش مناسب لـحياتهم وإسلوب معيشتهم في الوقت ده ولا داخل ضمن إمكانتيهم الـحالية ... فيبقي بيعصر علي نفسه لمونة

كل يوم وهو قايم الساعة 6 كل يوم .. مش قادر وقرفان وزهقان .. وغالبًا هينتكس خلال أيام جاية .. مهما حاول ..لذلك حاول تـختار العادات الغير مؤلمة ..العادات المـحببة لنفسك ..اللي فعلاً شايف وواثق وحط تـحت واثق دي مليون خط .. إنك بتـحبها فعلاً وتقدر تنفذها لفترة طويلة ..حتي لو إنتكست فيها وسبتها فترة ..بترجع ليها بكل حب وشغف .

-الفراغ :-

في الـحقيقة الفراغ قاتل لأي إنسان أصلا ..فمابالك لو كان هدفك تغيير حياتك وانت عايش في الفراغ .. المقصود بالفراغ هنا هو مش إنك عايش " بروطة " مش بتعمل حاجة لا بتشتغل ولا بتنتج ولا بتساعد في شغل البيت .. لا المقصود هنا فراغ الذات أكتر .. فراغ الـحياة من مضمون الشغف والقيمة ..لازم يكون في إيـمان كامل من جواك إن تستحق الأفضل ..وتعيش علشان كده ..في ناس تقول وأنا أغير حياتي ليه ..او هستفاد ايه لما ألعب رياضة ..أو ايه اللي هيحصل لما أصحي بدري وأغسل أسناني ..أه والله قابلت ناس عندها مشكلة مع فكرة السلوك نفسه اللي هو انا بعمله ليه يعني ؟! .. الفراغ الداخلي بعدم وجودة رؤية بيساعدك علي خلق نمط سلبي تـجاه كل شئ ..بالتالي لو كنت عاوز تتكتسب عادة إيـجابية ...لازم تربطها بقيمة حياتك ..وإنك تستحق إنك تكون نسخة أفضل من نفسك.

-أكراسيا:-

الكلمة دي لاتنينة معاناها " ضعف الإرادة " ...وأساسها فلسفي شوية...فكل إنسان غالبًا بيعاني في أوقات كتيرة من " ضعف الإرادة " في كل شئ ..ويـمكن ده السبب الرئيسي الأول في ترك العادات ..وهو إنك بتضعف قدام الأفكار القديـمة المكونة للعادة السلبية اللي حذفتها .. أو بتـحس بضعف في الإلتزام بالعادة الـجديدة اللي إكتسبتها ... لازم تفهم نفسك كويس قوي ..وتمارس نوع من الإلتزام الذاتي تـجاه كل عادة تـختارها بالـحذف أو التفعيل .. القرار في النهاية هو قرارك ..ومصيرك في الـحياة ..مـحدد بالفعل في الإلتزام بنظام حياة إيـجابي قائم علي عادات مفيدة ومؤثرة ...أو العكس تمامًا ..من النهاردة خد قرار ..وأرفع شعار لا .." أكراسيا " بعد اليوم

-الإرهاق :-

من أكثر الأسباب اللي تعوقك عن تكوين وتثبيت العادات ..هو الإرهاق والإجهاد .. فكرة إنك تمارس عادة زي الرياضة بعد يوم طويل حافل بالدراما في الشغل ..فكرة مش في مـحلها خصوصًا إن إمكانية إنك متروحش الـجيم هتكون عالية قوي لإنك ببساطة مرهق ومش في الموود المناسب ..معظم حالات فشلنا ماشية بالنمط دي ...مرهق جدًا ومتقدرش تقرأ كتاب ...مرهق علي إنك تكتب اليوميات بتاعتك زي ما كنت عاوز وتمنيت إنها تكون عادة جديدة ... مرهق في إنك تقوم الليل زي ما كنت مـخطط !! والـحل ..ببساطة يإما تعدل العادة نفسها بـحيث تكون ليها الأولوية في التنفيذ قبل ما يتم إستهلاكك خلال اليوم ..تقرأ الصبح .. مثلا ..أو إنك تـحذفها مؤقتا أو تقللها بأقل درجة ممكنة في حدود إمكانياتك فتقيم الليل بس يوم الـخـميس والـجمعة ..او تصلي قبل الفـجر بنص ساعة وخلاص قبلها بكام ساعة ...هنا إحتـمالية تنفيذها هيكون عالي .متـحاولش تروح لعاداتك بدون ما تكون فايق وفاهم إن الإرهاق يدمرك ..

-الملل :-

وقوعك تـحت ضغط عادة لفترة طويلة أحيانًا بيجيب نتيجة عكسية ، تبدأ تمل وتـحس بالـخنقة ولو ملـحقتش نفسك بأجازة ..وراحة تفصل فيها عن العادة دي شوية ..الموضوع هيقلب بغم شوية وممكن يكرهك فيها نهائيًا.. في أشخاص مع الوقت بيفقدوا الطاقة والشغف إنهم يقرأوا ..او يمارسوا رياضة ..أو يكتبوا يومياتهم ... وأنا شايف إن دي حاجة طبيعة جدًا ..حالة " الفتور " دي حالة بتحصل لك الناس وفي كل شئ .. في الدراسة والشغل وحتي الإيـمان والدين .. وبالتالي وجودها في حياتنا شئ عادي .. لازم تتقبله ...مطلوب منك بس إنك تمارس توجه ذهني صحيح ..وتفصل من عالـم العادة شوية ..مش معني كده إنك ترجع لعاداتك القديمة السلبية زي التدخين أو الإباحية مثلا ... لا الفكرة إنك توقف الضغط النفسي عليك عن طريق" الغش " ..أيوة تغش شوية في إسلوبك ..مش هـما في عالـم الدايت بيقولوا " شيت ميل " يعني .." وجبة غشاشة " ..الـهدف منها إن تكسر السلسلة الطويلة الإسبوعية من الوجبات الصحية بوجبة سريعة غير صحية ..علشان متـحسش بملل من النظام الروتيني ده .. فتقوم تكرهه .. بالتالي عاوز تغش شوية في الأساسيات ليوم أو يومين أو ثلاثة مش مشكلة ... لو متعود كل يوم تنام بدري وكده ..مفيش مشكلة لو حاولت تغير كل النظام وتسهرلك ساعتين زيادة عن ميعاد نومك يومين بس في الشهر ... مش هيجري حاجة ...لو متعود كل يوم تلعب يوجا ...وقف يومين او ثلاثة في الشهر ومتعلبش يا سيدي ... وهكذا .. الفتور ده انا بعتبره أسهل نقطة تقدر تعالجها لو كانت مأثرة عليك في عاداتك ..ومع ذلك ..لأزم متتمادش فيه قوي ...وتخليه نمطك السائد ..لازم برضه تكون صبور وتقاوم شوية .. مش علي طول تلجأ "للغش " أو تغيير النمطية السائدة..

وصباحكم فل :)