لما تهتم بنفسك، حتسير أناني

هل لمّا تهتم بنفسك تسير أناني؟ هل لمّا تضحي عشان غيرك على حساب نفسك، تسير معطاء؟

اهتمامك بنفسك، وإنك تخلي نفسك قبل كل شي حيخليك انسان متوازن

ويخليك ترتب أوراقك وتعرف أولوياتك ..

يسير حتى لمن تعطي الآخرين، تعطيهم من مكان رغبة وحب!

ما تعطيهم من مكان واجب أو مفروض .. ما تعطيهم من مكان ضعف ولا من مكان قسوة واجبار للذات .. ولكن تعطيهم بنية عطاء وبنية بر أو صلة أو حب أو تعاطف ..

ياما نشوف أمهات أو أبناء أو أصدقاء يعطوا ويخدموا من غير نفس، بأسلوب وحش جدا، وبنبرة حادة، وبقرف أحيانا .. وهم في قرارة نفسهم يحسبوا إنهم كده بيعطوا، وبيضحوا عشان أهلهم أو أحبابهم، وبيجبروا نفسهم عشان هذا هو "الصح والمفروض" ..

في تجربتي، الأفضل إنه الشخص يعبي كوبه بالشي اللي يبغاه ويتمناه لنفسه .. ويرتب حياته مثل ما يحب .. ويعطي نفسه وقت وحب واهتمام وكرم .. ويحدد أولوياته ويحدد اهتماماته، وبعدها يبدأ يحدد متى وكيف حيعطي من وقته أو جهده أو فلوسه وغيرها ..

لمن تضحي بنفسك عشان أحد، ويكون على حساب صحتك أو وقتك الخاص، إنت بكذا جالس تضر نفسك، ووقتها ممكن جوتك إحساس بالقهر تجاه هذا الطرف الثاني اللي إنت ضحيت عشانه ..

احتمال حتبدأ تطالبه بنفس المعامله، حتبدأ تتضايق لو هو ما ضحّى عشانك .. حتبدأ تتمنن عليه أحيانا .. وهنا تسير العلاقة غير صحية، والعطاء يكون كأنك بتكسّبه جميله عشان يردلك هي في يوم ثاني ..

هل يعني نوقف نعطي الناس من وقتها وجهدنا؟

لا، بكل تأكيد!

ولكن أعطي من مكان رغبة وحب ..

وإذا مو قادر، أوقف وقفة صدق مع نفسك، وفكر ليش؟ ليش مو قادر أعطي هذا الشخص من أهلي أو أصدقائي؟ ايش بيني وبينه مواقف أو مشاعر قديمة لسه واقفة بيننا .. وأبدأ رحلتك الخاصة في إنك تبحر داخل نفسك وداخلا علاقتك ..

لا تنسوا، كلنا جينا لهذه الحياة لوحدنا، خرجنا من بطون أمهاتنا لحياة غريبة علينا وإحنا لحالنا .. وبنخوض تجارب جميلة أو مؤلمة في هذه الحياة لحالنا، محد بيشعر نفس شعور الآخر ولا أحد يقدر يجزم إنه فاهم كل شخص آخر في حياته كيف بيفكر وليش كذا بيتصرف .. حنموت (بعد عمر طويل لنا بصحة وعافية وطاعة) لوحدنا، وحنكون في القبر (اللي ربنا يوسعه علينا) لوحدنا، وحنبعث لوحدنا .. ربنا اعطانا هذه الروح وذا الجسد أمانه، فخلونا نحسن معاملتهم ونفكر فيهم أول شي، لأنهم هبه وعطيه من ربنا، وحنسأل عنهم يوم القيامة .. نساعد ونخدم ونعطي الناس، بس بعد مانعطي نفسنا ونحبها ونهتم فيها أول شي

أتمنى لكم حياة مليئة بالعطاء بحب 🙏🏼☘️