لحظة..

سؤال بسيط مع اجابات عميقة ومختلفة ليخلينا نستشعر ونمتن للحظات وأشخاص وأماكن

سألنا أشخاص عشوائيين بأعمار مختلفة وجنسيات متنوعة:

لو بحقلك تختار لحظة وحدة من حياتك لتعيشا للأبد, وبالمقابل ينمحوا كل اللحظات التانية, أي لحظة بتختار؟

المغزى من السؤال هو التفكّر باللحظات الحلوة بحياتنا, اللحظات الي ممكن نختار ننحبس فيّا للأبد برغم انه فكرة الأبدية مرعبة.

الاجابات تنوعت كتير عن لحظات مرقت ولحظات لسى عم تستنى الوقت المناسب لتنور حيوات صحابا.

بس الغريب والملفت انه في شخص قرر يشارك لحظة بشعة بحياته أو يمكن مؤلمة هو الوصف الأنسب وبعد نقاش طويل لحاول افهم أسباب قراره بهالاختيار اتضح انه هاللحظة ساعدته يكوّن شخصيته ويزداد وعيه وكانت محور أساسي بحياته. الشخص تحفّظ عن مشاركة لحظته عالملأ لهيك مع الاسف ما رح تلاقوها مدرجة هون بس حبيت شارك هالشي لأنه حسيته ملهم.

وهلأ رح اترككن مع باقي الأجوبة..

أ: لحظة الّي رح كون فيا ع جبل عرفة وعم ادعي وتتحقق دعواتي وتُستجاب.

ل: كون مع كل عيلتي ورفقاتي, الكل مبسوط ونتفرج عغروب الشمس.

أُ: والله في لحظات كثيرة بس أفضل لحظة خشوع في الصلاة.

س: لحظة رجعتي عسوريا

طَ: ولا لحظة، كلها سيّئة أو حلوة.

آ: هذا السؤال كان دايما ولا زال في بالي .. حتى وصلت الى مرحلة استشعرت فيها نعمة استمرارية الزمن من دون عودة.. سبحان الله.

خ: لمّة أهلي وهم بخير ذي اللحظة الي اتمنى اعيشها دايمم

أ: لما التقيتك، لسا مو شبعانة من هداك الوقت.

ه: الأعدة أدام شجرتي المفضلة مع الشخص المفضل وتكون الشمس فوقنا ونشرب قهوتنا سوا.

ه: وقت كون بحضن جدتي، مافي بيننا بلاد، بس مخدة وشباك.

ف: حصة رياضة بالمتفوقين بين رفقاتي.