مراجعة لكتاب حياتك الثانية تبدأ حين تدرك أن لديك حياة واحدة
الكاتبة: بسنت عبداللاه
حياتك الثانية تبدأ حين تدرك أن لديك حياة واحدة!
كلام غريب أوي صح؟ الكلام ده هو اسم رواية لطيفة جدًا للكاتبة رافاييل جيوردانو تقييم الرواية على "جودريدز" 3.53
الرواية عبارة عن خطوات تساعدك على تغيير نفسك وحياتك، نا استفدت من الرواية دي بشكل شخصي لأنها علمتني شوية حاجات ساعدتني في حياتي، وحبيت أفيدكم معايا.
لازم تسأل نفسك في الأول "هل عندك الرغبة في التغيير، عندك سبب قوي ودافع يخليك عاوز تتغير؟" لو كانت الإجابة آه فأنت هتقدر تستفيد من الرواية دي،
قدامك مجموعة من التمارين اللي المفروض تعملها وبتتدرج من مهمات بسيطة وممكن تشوفها ساذجة لحاجات أكبر.
التمرين الأول:
اكتب في ورقة كل حاجة مش كويسة فيك وفي حياتك وعاوز تغيرها، مهما كانت الحاجة دي صغيرة، لأنك محتاج تعرف ايه الوحش في نفسك وفي اللي حواليك،
وبعدين ممكن تقطع الورق ده أو تحرقه، أو تعمل زي بطلة الرواية وتطيره من دور عالي.
التمرين التاني: الكاتبة بتسميه عملية البياض العظيم..
وهي ببساطة أنك ترتب نفسك من جوا ومن برا
ازاي ممكن ترتب نفسك من جوا؟ لازم تفرز كل علاقاتك وتصنفها، شوف مين حواليك ضار وحاول تتخلص منه
والمقصود هنا مش بس الأشخاص اللي حواليك، لكن مقصود تصرفاتك الغلط اللي بتؤدي للمشاكل في حياتك وعلاقاتك، وخد قرار أنك هتتخلص من ده.أ
ما الترتيب من الخارج فأكيد أنت خمنت رتب المكان اللي أنت عايش فيه ومطلوب منك ترمي على الأقل 10 حاجات مالهاش لازمة، ده هيحسسك بالنشاط والراحة.
التمرين التالت:
اكتب كل مزاياك، في الأول مش هتلاقي حاجة تكتبها، لكن مع التركيز في مميزاتك والكتابة هتكتشف في نفسك حاجات حلوة يمكن ما كنتش تتخيلها.
التمرين الرابع "آلة التصوير الخيالية":
في التمرين ده مطلوب منك أنك تعتبر عينيك دي كاميرا وتبدأ تلقط بعينيك أي مشهد كويس عينك تقع عليه، وتحتفظ بيه في ذاكرتك،
زي أنك تركز في شكل الشجر أو ضحكة طفل، أو شاب بيقوم لست كبيرة ويقعدها مكانه،
والتمرين ده على قد ما هو بسيط إلا أنه بيعودك تركز في الحاجات الكويسة بدال ما تركز على السلبيات وتشحن نفسك على الفاضي.
التمرين الخامس:
اشتري مفكرة صغيرة، واكتب فيها كل إنجازاتك ونجاحاتك الصغيرة قبل الكبيرة، وكل اللحظات السعيدة اللي عشتها في حياتك،
ودي هتبقى عبارة عن مخزن لكل الأفكار السعيدة اللي تقدر ترجعلها في حالة الاحساس بالحزن أو الفشل.
التمرين الخامس:
أنك تقدر تفرق بين التعاطف الرطب والتعاطف الجاف، يعني ايه الكلام ده؟
التعاطف الرطب هو انك تتعاطف مع الناس وتتبنى مشاكلهم لدرجة تأثر عليك وعلى حالتك بالسلب
أما التعاطف الجاف وهو انك تتعاطف مع الناس وتساعدهم، لكن م غير ما تسمح لده انه يسوأ حالتك النفسية في النهاية دي مش مشاكلك وكل المطلوب منك انك تساعد باللي تقدر عليه.
التمرين السادس:
وده خاص بالناس اللي دايمًا مش شايفين في شكلهم إلا العيوب، مطلوب تقف قدام المراية وتبص لنفسك كويس وحدد ايه الحلو في شكلك وملامحك.
التمرين السابع:
وهو أنك تكتب أهدافك ومهم أوي وأن بتكتب أهدافك ان الهدف يكون واضح وممكن تنفيذه وتقدر تقيس تقدمك فيه ويكون محدد بوقت
مثال: "قراءة 3 كتب في شهر".
التمرين التامن:
تخيل لو بتتكلم مع حد من اصحابك هتقوله "انت فاشل، أنت غبي، أنت شكلك وحش"
طيب ليه ممكن تقول كلام زي ده لنفسك، حاول تكون أوفى صديق لنفسك وتغير الطريقة اللي بتتكلم بيها مع نفسك وتبدل الكلام الوحش ده بكلام لطيف عن نفسك.
التمرين التاسع:
وهو انك تعمل لنفسك حصالة، تحط فيها جنية كل ما تقفش نفسك بتفكر بشكل سلبي أو بتتكلم كلام سلبي
(ده هيعلمك تنقي كلامك وأفكارك) وهيخليك تحوش فلوس كتيير.
حاول كل يوم أنك تفكر في حاجة محسساك بالامتنان، صحتك شكلك شغلك، فكر في نعم ربنا واحمده عليها "لئن شكرتم لأزيدنكم".
في النهاية عاوزة أقولك ان مهما كانت التمارين دي بسيطة أو تافهة من وجهة نظرك فمافيش حد بيطلع السلم كله في خطوة واحدة، كل حاجة بتبدأ بخطوة،
اتغير عشان تقدر تغير حياتك وتغير العالم.
التعليقات