من أجمل القصص التركية اللي ممكن تشوفها.. على مر الزمان.
Öyle Bir Geçer Zaman ki
...
"عن قصة حقيقة"
احنا لازم نكون فاهمين إننا بنتكلم على قصة اتصورت في حوالي أربع سنين عشان تطلعلنا بالدقة والجمال والعظمة اللي شوفناها..
نبتدي من التتر اللي ربط بين الأشخاص الحقيقية والممثلين اللي قاموا بدور كل شخصية منهم.. بنشوفه مع ميوزك كلاسيكية بتاخدك معاها تحسسك إنك جوة آلة زمن وبتهيأك إنك هاتشوف أحداث قوية..
عثمان .. الإبن الأصغر لعائلة أكارسو وهو اللي بيحكي أحداث القصة كلها من البداية للنهاية بعد ماكبر .. الطفل اللي قايم بدور عثمان هو ممثل عبقري تعبيرات وشه وعيونه لوحدها قصة .. بيأدي الشخصية بمنتهى الإتقان والاحترافية رغم صغر سنه.
المسلسل أحداثة بدايتها بتدور في فترة زمنية معينة في الستينيات من سنة 1967 ودي كانت فترة اضطرابات سياسية في تركيا وعلى مر الزمن وصولاً للثمانينيات وما بعدها..
ابتدت الأحداث في حي زيرك وحي جبالي باسطنبول وأماكن تانية كتيرة جميلة جداً .. القصة عن عائلة مكونة من 6 أفراد القبطان علي أكارسو وزوجته الجميلة جميلة وأولاده الأربعة نيفين إيلين مجد وعثمان الأصغر واللي بيحكلنا الحدوته كلها.
هاتشوف ازاي رب أسرة وركن أساسي من أركانها ( علي) قادر إنه يوصل بيها لتفكك وضياع بسبب عناده وعجرفته واندفاعه ورا غريزته اللي خلته يتخلى عن زوجته وأولاده عشان واحده ست هولندية (كارولين) اتعرف عليها في أحد رحلاته البحرية.. هاتشوف علاقته بأولاده شكلها إيه وتمييزه بينهم والتعامل بندية وخصومة مع إبنه مجد وبنته نيفين.
هانشوف إزاي واحده زي كارولين (الحيَة الشقراء) فعلاً حيَة شيطان متجسد في صورة إمرأة .. قدرت إزاي تهدم بيت وتضيع أسرة كاملة بسبب طمعها وقذارتها .. كارولين شغلتها الحقيقية النصب وكان ليها شريك في هولندا (أدهم)وهو شخص مايفرقش عنها شيء.
جميلة الأم الأصيلة اللي بتحافظ على بيتها وأولادها وزوجها وتحملت كتيير رغم معرفتها بخيانة زوجها ليها لكن حبها ليه كان غالب على تصرفاتها.. بس كل محاولتها مانجحتش وتخلى علي عنها وعن أولادها وطردهم من بيتهم!
نيفين.. بنت في الجامعة هاتسجن نفسها في قصة حب ل(أحمد) شيوعي كل اهتماماته في الحياة سياسية بحته والدته صحفية كبيرة هاتموت في تجمع سياسي بدل منه.. أحمد مع مرور الزمن هايسبب لنيفين مشاكل كتير!
نيفين هاتتجوز من غسان كان زميل ليها في الجامعة وبيكره أحمد غريمه في حبه لنيفين والجواز هايكون بمثابة مساومة إنه مقابل إتمام الزواج يهرب أحمد من السجن وينقذه من إعدام مؤكد! هاتوافق وهاتعيش غير راضية بحياتها وهاتضر نفسها كتير .
غسان مثال لزوج وحبيب وأب مثالي جداً محترم جداُ وناجح ومكافح غير اعتمادي رغم إن إبوه وزير سابق صاحب سلطة ونفوذ ومال,. ابتعد عنه عشان عايزه نسخة منه ورافض لزواجه من نيفين !مع الوقت الأب ده (أكرم تاتلي أوغلو) هايورط إبنه ونفسه في مشاكل كتير..
مجد أو ميتى شخصية عنيفة ومتهورة جداً رغم انه إنسان كويس جداً انما متسرع لدرجة إنه بيروح للمصايب برجليه ويورط نفسه باحتراف غريب (من شابه أباه فما ظلم)! حبه للآنسة إنجي مدرسة الموسيقى إنت نفسك هاتحبه هاتتعلق بشخصية مجد كتير لأنه شخصية رغم عيوبها فريدة.. صادق في مشاعرة ..
لآخر لحظة في حياة مدرستة وقف جنبها في مرضها وماتخلاش عنها وحققلها أمانيها بشكل جميل جداً.. واللي كان ليها الدور الأهم والأساسي في حياة مجد وبفضلها أصبح مطرب مشهور جداً ومحبوب.
اتسجن بسبب أبوه اللي بلغ عنه لأنه حرق البيت عشان طردهم منه! هايتورط مجد في حب بنت (نهال) ومع الوقت هايتورط معاها في جريمة قتل ولكن هاتظهر برائته بس هايفقد بريقه كمغني ليه مكانته عند الناس .. والأحداث مستمرة !
إيلين.. من ألذ وأجمل الشخصيات في القصة مرحة دمها خفيف روحها جميلة بتحب أبوها ومتعلقة بيه وانفصالها عنه اتسببلها في ضياع كبير في حياتها .. إيلين وبفضل (مروة) بنت عمها (كمال أكارسو) هاتتعرف على حب حياتها (سهيل) أو سونير, وهنا بقى أقدر أقولكوا إنكم هاتتفرجوا على قصة من أجمل قصص الحب اللي شفتوها في حياتكم انتوا هاتستنوا كل مشهد يجمع سهيل بإيلين وهاتراقبوه وانتوا مبتسمين ومنشكحين جداً..
وهاتشوفوا شخصيات هاتحبوها جداً سواء سهيل أو( سليمان) الذراع اليمين لسهيل بك.
وهاتتمنوا لو إن في حياتكم شخصية زي سليمان مخلصة أصيلة صادقة شجاعة بتخدم بقلب وبحب أفضل صديق وأحسن راجل يًعتمد عليه طول الوقت.
وزي ماهاتحبوا سليمان هاتكرهوا (مراد) أخو سهيل مع القليل من التعاطف معاه برده , واللي حبه لإيلين هايسبب في تعاسه وألم ومشاكل كبيرة لحب إيلين وسهيل اللي عشانه ولأنه مريض (قعيد) والأمل من حياته ضعيف هايتخلى سهيل عن حبه لإيلين عشان يجوزها لمراد لأنه بيحبها من صغره من المدرسة..
وده كان مقابل إتفاقية زواج وميراث لإيلين تحصل عليه بوفاة مراد.. لكن مراد هايكون مصدر تعاسة وحزن كبير لإيلين وهايبدل حياتها للأسوأ وخصوصا إنه هاياخد سنين من عمرها على الفاضي!
(صفا أكارسوا) أو حصيفة الجدة الجميلة جداً الطيبة والحقانية اللي وقفت ضد أولادها مع الحق وقفت مع جميلة لآخر لحظة من أجمل الشخصيات في المسلسل.
(كمال أكارسوا) وأسرته الكريمة ! هي مش كريمة ولا حاجه كمال شخصية ضعيفة ومنقادة لزوجته (ناريمان) وليهم بنت وحيدة وهي مروة أو ميسوت نسخة مصغرة من أمها .. الإتنين عبارة عن شر متحرك أشطر ناس في الأذى والفضايح والمشاكل! وهايكون ليهم دور في أذى كبير بيحصل لجميلة وأولادها وعلي!
حكمت كارجي وزوجته سلمى .. كنان جيتين وأمه ناريمان .. نوري بك وكيل أعمال سلمى وجميلة في شركة كارجي.. نديم بك محامي جميلة .. حقي زوج نهال حبيبة مجد.. زوج الآنسة إنجي.. هاني صديق مجد في المدرسة والفرقة الموسيقية.. مدير المدرسة .. راجين حبيبة عثمان في الحضانة وغريمه عارف اللي بيحبها .. شخصيات هاتعدي علينا لحد قبل نهاية الموسم التاني من القصة..
الآداء عبقري مش تمثيل مافيش فرق عن الواقع .. صوت عثمان في خلفية الأحداث وهو بيحكيها ممتع جداً.. الأحداث نفسها مظبوطة مع التواريخ التوقيت والأماكن واستايل اللبس الاكسسورارت .. فورمة الشعر مع اختلاف السنين.. منتهى الدقة منتهى الجمال
..الديكورات .. الفنادق.. المستشفيات والأجهزة الطبية .. الملابس والسراير في كوريدور المستشفى والمحاليل اللي متعلقة .. جهاز الضغط والإفاقة أو الصدمات الكهربية .. الجرايد الجوابات .. ملفات المرضى..التليفونات .. العربيات ودي لوحدها قصة كبيرة متقنة جداً منها مثلا عربية إيلين الحمراء ال TRIUMPH اتنين باب رقمها 34 UY 558 ماتتنسيش.. دي عربية انجليزية صنعت في انجلترا سنة 1885 واتوقف تصنيعها في 1984..
كل تفصيلة في المسلسل واقع وحقيقة .. قصة مشيت مع الزمن خطوة خطوة بكل مافيه .. شخصيات مختاره بفن وحرفية عالية جداُ اتقنوا الآداء لدرجة مش هاتفرقهم عن الحقيقة!
متأكده إنه من أجمل القصص التركية اللي هانشوفها.
التعليقات