مسلسل زهرة الثالوث

رواية زهرة الثالوث من الروايات الممتعه المليئة بالأحداث الشيقه

زهرة الثالوث - Hercai

#مسلسل أو #رواية #زهرة_الثالوث

انت أمام سلسلة أحداث درامية ممزوجه بالواقعية ولمسات من الخيال ,سلسلة أحداث هاتخلي عقلك دائم التفكير والتساؤل حتى إنك ممكن تسأل ليه تحديداً إسم الرواية زهرة الثالوث؟

هل لأن زهرة الثالوث (البانسيه) رمز للحكمة والتفكير؟ ولا عشان هي زهره بتمتاز بقوة التحمل لكل ظروف الطبيعة القاسية؟

الأحداث والأشخاص قريبه من الواقع فعلاً,المكان اللي بتدور فيه الأحداث رائع ..ميديات التابعة لولاية ماردين في تركيا.

مكان ساحر كأنك جوه أسطوره,مباني وقصور كلها شبه المغارات والقلاع مصممه من الحجاره.

شخصيات المسلسل

(عائلة أصلان بيه)

عزيزة أصلان بيه واللي بتنافس إبليس في كل شيء! شخصية مليانه غضب كراهية وحقد..صعبة مركبه غير واضحه أو مفهومه

بتمشي الكون بمزاجها وفقًا لهواها وبس,عايشه لهدف واحد وبس وهو( الإنتقام) واللي بتربي عليه أحفادها ومساعديها,عاشت في كارس مع أحفادها,

حفيدها الوحيد ميران زرعت جواه الكره والحقد سنين وأقنعته إنه لازم يعيش لهدف واحد وبس

وهو إنه ينتقم لأمه وأبوه من الشخص اللي قتلهم بعد الإعتداء على أمه وحرمه منهم باقي حياته!وطبعاً باقي الأحفاد الغير أشقاء ل ميران ربتهم بنفس المنهج ..

عزيزة بير أسرار هانكتشف كتير جدا عنها طول الوقت!

ميران أصلان بيه حفيد عزيزة شاب اتزرع فيه الحقد والكراهيه من طفولته ,تفاصيل شخصيته الجاده الحاده المشبعه بالكره

ماتعرفش غير تلات حاجات جدته وشغله والإنتقام,جدته رسمتله طريق يمشي فيه من سنين طويله

هايعملوا بيزنس كبير جداً في كارس وبعدها يرجعوا ميديات ولكن إسمه هايتغير لميران أكسوي..

وهايقرب من عائلة شاد أوغلوا يشاركهم في أكتر من حاجه عشان يضمنوا انه راجل كويس

وبعد وقت هايطلب إيد بنت هازار شاد أوغلو تحديداً للجواز (جواز مزيف)..لأن هي دي بنت الشخص اللي قتل أبوه وأمه..

والمفروض ميران ينتقم من هزار ب بنته ريان واللي هايقابلها صدفه ويحبها من أول مره من غير ماهي تعرف

وهاتقابله تاني صدفه وتحبه هي كمان وللأسف ده مش هايمنعه من الإنتقام بل بالعكس هاينفذ إنتقامه ولكن هايحس بندم رهيب

وهايحاول بكل الطرق اللي تتخيلوها إنه يرجعلها ويخليها تحبه ومع الوقت الحب ده هايكون شفاء ليه من كل اللي جواه واتزرع فيه

وهايكشفله أسرار كتير وهايقابلهم عقبات أكتر مما تتخيل!

سلطان أصلان بيه زوجه إبن عزيزه وأم (جونول زوجه ميران) بأمر من عزيزة جدتهم على الورق وبس لأنها بالنسباله أخته ..

سلطان كان ليها طفل قرب يتولد ولكنه مات بسبب ضرب زوجها أحمد أصلان ليها وهي حامل اتسبب في وفاته .. (دي القصه اللي حفظتهالها عزيزة)

إنما في الأصل إبنها عايش وهو أصلان اللي هايظهر في الآخر خالص عشان ينتقم من عزيزة ويدور على العداله لكل الناس اللي تأذت من الإنتقام واللي شاركت فيه!

سلطان في حادث قدييم حصل لها هي وزوجها أحمد أصلان وأخوه ومراته وبنته هاتسيبه يموت تتحرق بيه السياره

لأنها عاشت معاه أسوأ حياه ممكنه.والسر ده تعرفه بس إيليف.

إيليف أصلان بيه بنت شابه صغيره طيبه وبتدور على الحق عاشت صدمه وفاه مامتها وباباها في الحادث ده وشافت سلطان سابت زوجها للموت!

هاتحاول تدور على الحق وتبعد جدتها عن الإنتقام بطرق كتير مش هاتعرف,

هاتحب أزاد شاد أوغلو إبن عم ريان ودي كانت مصيبه لعزيزه لأنه عدو ليهم وفعلا البنت هاتهرب وتتجوزه بعد أحداث كتيره جداً

ولكن في النهايه ولأن أزاد مش بيحبها ولأن جدتها أوهمتها إنها مش هاتقدر تنجب, البنت هاتقرر تنتحر!

جونول بنت سلطان وبنت عم ميران وإيليف جدتها علمتها حاجه واحده بس انها تحب ميران وأنها هاتكون زوجه فعليه ليه بعد الإنتقام ما يتم ,

حبها لميران هايعميها وهاتتصرف على أساس حاجه واحده إن ميران يكون ليها هي وبس!

هايحصل تصادم كتير بينها وبين جدتها هاتكرهها وتكره الإنتقام وميديات وريان ونفسها برده وهاتحصل أحداث كتيره جداً بسبب كل ده.

أسماء (الشيطان الأخرس) لأنها ساكته عن الحق ,من قصر أصلان,هي المساعده الأولى في القصر ومع عزيزة من البدايه

وتعرف كل أسرارها ورغم كل ده هاتقبل بالظلم لناس كتير جداً مقابل تهديد عزيزة لها بأبنها فرات .. أسماء مثال لشخص بيعين الظالم على ظلمه خوفاً من المستقبل!

فرات إبن أسماء المساعده صديق ميران وكل ممتلكات أصلان بإسمه هو المتصرف الوحيد فيها

وليه حق التوقيع على كل شيء بعد عزيزة ولكن عمره ما استغل ده لأي مصلحه شخصية,

في البدايه كان بيحب عزيزة جداً وهي اعتبرته حفيدها مافرقتش بينه وبينهم مابيرفضش ليها طلب ومقدر رعايتها ليه وحمايتها وثقتها فيه اللي مالهاش حدود!

ولكن في النهايه بعد ما يظهر ليه ألاعيبها وحقدها هايبعد عنها وهايساعد ميران في كل اللي بيخطط ليه.

حنيفة أخت عزيزة ومخزن أسرارها والجاسوسه الخاصة بعزيزة لأنها شغلتها خادمه في قصر شاد أوغلو..

شخصية منقاده مابتفكرش بتساعد أختها حتى لو كان ظلم!

محمود دراع عزيزة اليمين المساعد الخاص والسائق الخاص والقاتل الخاص ليها,

محمود مثال حي لشخص بيعبد أصنام مش هايتخلى عن الفكره لأي سبب لاغي عقله وتفكيره ومشاعره,

عزيزة هي الوحيده اللي معاها الريموت كنترول بتاعه بتتحكم فيه وبتديله أوامر زي ماتحب ووقت ماتحب!

وهو سمعاً وطاعه لأن هي اللي انتشلته من الضياع من صغره وربته وكبرته!ده كان المبرر ليه وعلى أتم استعداد يضحي بنفسه عشان عزيزة !

(عائلة شاد أوغلو)

نصوح أزاد شاد أوغلو كبير العائلة (الجد) أبو ل جيهان وهزار وأحفاده ريان جول أزاد يارين,

عدو عزيزة الأول واللي بسببه بتحصل كل الخطط وبسببه عزيزة عايزه تنتقم من كل عيلته عشان تنتقم منه هو شخصياً!

شخصية غليظه حاده الطباع بيكره ريان لأن فيما بعد هاتكتشف انها مش من دمهم.

هزار إبن نصوح وزوج زهراء وأبو جول ولكن ريان بنت زهراء بس من أب تاني تخلى عنها وعن بنتها!

شخصية طيبه سلسه مظلوم بسبب تحكمات وتصرفات أبوه واللي هايوقعه في مصايب كتير بسبب خداعه وكذبه عليه,

زهره شخصيه طيبه بتحب بناتها وتخاف عليهم وبتحميهم طول الوقت من كل الناس قامت بدور روعه.

جيهان ابن نصوح التاني وزرج هاندان ,أبو أزاد ويارين ,شخصية متهوره مجنونه إلى حد ما

بيدور طول الوقت على حب أبوه ليه اللي كان بيفضل أخوه هزار عنه ومراته هاندان شبهه مجنونه

خبيثه بتدور على إن جيهان دايماً يكون أهم حد وكبير عائلة شاد أوغلو

ولكنه أوقات كتير كان بيتراجع عن موقفه ده ويقف بجانب أخوه وأبوه وللأسف معاملتهم لريان كانت دايماً سيئة.

أزاد جيهان إبن عم ريان بيحبها من صغره من غير مايعرفها واللي اتصدم بزواجها من ميران

وحاول كتير يبعدها عنه ويقرب منها عشان يتجوزها ولكن كل الظروف دايماً ضده ,

شخص طيب عنده رحمه مع الحق وبيدور على الحق وبيحب ريان جداً.

يارين أخت أزاد (مساعده الشيطان) زي مابيسميها زوجها هارون وهي تستحق اللقب بجداره,

شخصيه حقوده غيوره أنانيه بتكره ريان جداً بتحاول بكل الطرق تأذيها عشان متخيله انها أخدت حبيبها ميران منها لأنها شافته الأول! ,

الحقيقة هي بتكره نفسها أكتر لأنها مابتحبش حد وبتجرح أي حد وتعمل أي حاجه في سبيل مصلحتها وبس!

ريان هزار شاد أوغلو أو ريان محفوظ زي ماهانعرف في الآخر (محور القصة )

بنت جميله طيبه جداً حالمه متواضعه بتدافع عن الحق وعن نفسها وعن ميران قويه جداً ا

تحملت كل الظروف الصعبه اللي مرت بيها ,قصة حبها هي وميران من أجمل القصص اللي ممكن تشوفها ,

بتقف جنبه وتساعده عشان تثبتله كذب جدته عزيزة اللي هي مش جدته وهايكشفوا الحقايق كلها مع بعض.

عزيزة مش عزيزة لأ عائشه حبيبه نصوح اللي اتخلى عنها بعد حريق المزرعه في معتقدها

ولكن هو كان فاكر إنها ماتت! هزار ابن عزيزة اللي كانت فاكراه مات ,ميران حفيد عزيزة فعلاً لأنه إبن هزار من ديلشاه وهو برده مايعرفش !!

قصة جميله جداً فيها شخصيات موجوده على أرض الواقع بنقابلها في حياتنا مع اختلاف الأحداث والظروف والزمان والمكان!

فيها ظلم وقسوه وكراهيه وحب ورحمه وحق وعدل ..

فيها آداء قوي واتقان للشخصيات ,تتطور الأحداث جميل جداً وتغيير مشاعر كل شخص فيهم مرسوم صح ,

الشخصيات منتقاه بدقه ماعدا أصلان,حتى الخلفيات الموسيقية ممتازه.

قد نتفق أونختلف على بعض الأحداث وبعض الأشخاص ولكن في النهاية هو عمل درامي رائع.