بتحتاج وقت طويل عشان تكتشف الناس اللي في حياتك .. و لما تبلش تكتشف اقنعتهم كتير راح تتوجع،
مش كل مكان بنشتغل فيه ممكن يكون يشبهنا، الوظيفة اللي اخترناها هي اللي بتشبهنا وهي شغفنا.. والمكان اللي احنا فيه اكيد بنحبه لكن المعضلة بتكون بالتفاصيل المحيطة، بالناس اللي حواليك من تصرفاتهم لنظرتهم للأمور لطريقة تفكيرهم وعاداتهم..
كتير بتخاف أنه أفكارهم وطريقة تعاملهم مع الحياة والجو المحيط تعكس عليك وعلى شخصيتك، بتخاف يصيبك نوع من ثنائي التفكير و النظر للأمور اللي أنت تعودت عليها وتربيت عليها ورسختها براسك، مع أنك مقتنع بحالك و أفكارك ومتمسك بمبادئك بس ممكن للحظة تضطر أنك تتعامل مع الناس اللي حواليك حسب شخصياتهم مش حسب شخصيتك..
وأنا مقتنعة 100% أنه المحيط اللي احنا منقضي فيه وقت أكثر من الوقت اللي منقضيه في بيتنا مع أهلنا وأصحابنا الخارجيين هو المكان اللي بعكس علينا وعلى أفكارنا، هو اللي بغيرنا وببني شخصية بعيدة جداً عن شخصيتنا بس عشان نمشي على هواهم وما نكون مختلفين والخوف الكبير بكون لما الأمور هاي المحيطة فينا والأشخاص يغيروا نظرتنا لأمور حياتنا الخارجية ونظرتنا ومشاعرنا للناس اللي في حياتنا، اسوأ شي ممكن تواجهه هو أنك تتعامل مع شخص اثر فيه وبشخصيته وبمشاعره الجو والناس المحيطين فيه داخل بيئة ما بتشبهه، بس اختار يمشي مع القطيع ويتخلى عن ناس كانوا بيوم من الايام بالنسبة أله كل الحياة ويكبر عليهم..
قديش ممكن هالاسلوب والتغيير يأثر سلباً على الشخص وقديه ممكن يخسره ناس؟ أكيد ما في حدا مستعد يتحمل يكون مش كافي بعين شخص ولا راح يتقبل شخص بأثر فيه الناس ويقلدهم تقليد اعمى بس عشان ينضم الهم ويكون واحد منهم، احنا مش محتاجين متقلبين الود ولا متصنعين الحب والصحبة، محتاجين ناس حقيقة ما بتتبدل ولا بتتغير ولا باثر فيهم شو طريقة تفكير الناس ونظرتهم للحياة وتعاملهم، محتاجين ناس بحياتنا قد ما شافوا ناس يضلوا شايفينا أحسن من كل حدا ومعبيين عينهم وكافيين.
كونوا حقيقيين.
التعليقات