في هذه المقالة جمعت لك أهم المعلومات التي ستساعدك علي اكتساب مهارة من أهم المهارات التي ستحتاجها في العصر الحديث حيث توافر المعلومات و التأثير علي القرارات
((((( المهارة التي يستخدمها الكوتشز Coaches لمساعدة الناس علي اتخاذ قرارات سليمة )))))
..-------------------------------------------
التفاعل مع المقالات اللي بنزلها بيقل ، أرجو من الناس اللي طلبت المنشن و بمنشن لها تتفاعل تفديرا للمجهود المبذول ....
المهارة دي لو أتقنتها و بقيت بتفكر في كل حاجة من كزا زاوية علشان تصدر أحكام منطقية و عادلة ، هتلاقي حاجات كتير ف حياتك هتتغير علشان الأحكام المنطقية بتساعدك انك تصدر قرارات منطقية و صائبة ، و القرارات المنطقية مش هتيجي الا من حكم منطقي عادل علي الموقف و الحدث ، دة غير ان أحد المهارات الل بيستخدمها الكوتشنج هي مهارة التفكير الناقد لمساعدة العميل علي اتخاذ قرار صائب ....يلا بينا بقي علي المقالة .....
.-------------------------------------------
_ انت صدقت اللي سمعته من الراجل دة ؟
= آآآآه طبعا.
_ طيب انت تعرف منين انه صح ؟
= دة س ص ع يا بني ( س ص ع يعني اسم ثلاثي )
_يا صديقي أي س ص ع في الدنيا بيقدم محتوي ، هو شخص له خلفية دي أول حاجة .
تاني حاجة هو بيبقا عنده أهداف من المحتوي مش هدف واحد ، و في أهداف بتبقا ظاهرة و أهداف تانية مش بتبقا ظاهرة.
تالت حاجة هو بيبقا عاوز يوصلك رسالة معينة من اللي بيقدمه .
قولي بقي تعرف ايه عن الشخص دة و مرجعيته؟ تعرف ايه عن أهدافه عند تقديم المحتوي ؟ طيب تعرف ايه الرسالة اللي هو بيقدمها ولا انت بتتبعه و بتنشرله و خلاص ؟
طيب تعرف اي الحاجة اللي بتكون فكرك و واقع فكرك و حالتك النفسية؟
= المعلومات
_ برافوووو علشان كدا النهاردة هنتكلم عن أهم مهارة تخليك تفلتر المعلومات...
.-------------------------------------------
أهلا و سهلا بيكم في مهارة من أهم المهارات علي الإطلاق في تكوين أي شخصية مستقلة الفكر ، كلمة مستقل بالنسبالي يعني حاجتين ( واعي بنفسي _ عندي القدرة علي التفكير الناقد ) علشان كدا هتكلم النهاردة عن ( التفكير الناقد Critical thinking) أيووووا هتعرف النهاردة ازاي متعديش حاجة من تحت ايدك كدا و ازاي ما تبقاش بتشير اي معلومة و خلاص .....
ايه الاجزاء و المواضيع اللي هتكلم عنها النهاردة يعني ؟ هقووولك هقووولك
1_يعني ايه تفكير ناقد؟
2_ ايه الهدف من التفكير الناقد ؟
3_ ايه صفات الشخص المفكر الناقد؟
4_ ايه مهارات الشخص المفكر الناقد؟
5_ خطوات الوصول لنتيجة وحكم نهائي.
___________________________________________________________________
(((1)))_يعني ايه تفكير ناقد؟
_ التفكير النقدي هو التحليل الموضوعيّ للحقائق لصياغة حُكم.
_ للموضوع العديد من التعريفات تتفق جميعها في أنه تحليل عقلانيّ شكوكيّ غير متحيّز، أو هو تقييم الأدلة والحقائق.
_ التفكير النقديّ هو عملية موجهة ومنظّمة ومتابَعة ذاتيًا وتصحح نفسها بنفسها. إنه يفترض التوافق بشأن معايير معينة والاستخدام اليقظ لها.
___________________________________________________________________
(((2)))_ ايه الهدف من التفكير الناقد ؟
فهم الحقيقة ، اعطاء نفسي حرية الاختيار و الايمان بالشئ للاقتناع به ليس بسبب الانبهار واني لااتبع شئ غامض ، تطبيق التفكير الناقد علي أي محتوي نتعرض له ليس الهدف منه ان نرفض كل محتوي يقدم لنا لكن الهدف منه أن نتعرف علي الموضوع بشكل أكثر وعي بحيث نقرر اذا كان المحتوي يستحق أن ننشره او نتقبله و نصدقه أم أن هناك أبعاد اخري نحن لم نفهمها و لا يستحق أن نصدقه أو لا يستحق ان ننشره بين الناس....
___________________________________________________________________
(((3)))_ صفات المفكر الناقد :-
أ - فضولي و يبحث دائما عن الحقيقة.
ب - عادل في تقييمه للأدلة و آراء الآخرين(العدل والمساواة).
جـ - مدرك و قادر علي إقامة روابط بين الأفكار.
د - واعي لعمليات التفكير الخاصة به.
هـ - متفتح و مستعد لتحدي إعتقاداته.
و - يستخدم الأدلة و الأسباب لصياغة القرارات.
ز - قادر علي صياغة الأحكام مع الأدلة و المنطق.
ح - الرغبة في الحصول علي معلومات موثوقة.
___________________________________________________________________
(((4)))_ ايه مهارات الشخص المفكر الناقد؟
أ- مهارات البحث.
ب- مهارة طرح الأسئلة للوصول للحقيقة
ت- مهارة التحليل.
ث- مهارة التوقع العادل.
ج- يتجنب إجراء الإفتراضات.
___________________________________________________________________
.
(((5)))_ خطوات الوصول لنتيجة و تفسير نهائي.
أ- الحجة.
v خلينا نعرف الحجة بتتكون من ايه علشان نقدر نفهم يعني ايه حجة ، اذا الحجة تتكون من :
1. الإدعاء المركزي و هو النظرية التي يريد صاحب المحتوي أو المتحدث إيصالها اليك.
2. التبريرات و هي إدعاءات مساندة و نظريات أخري تدعم الإدعاء المركزي .
3. دلائل و هي أشياء موثوق فيها يستخدمها المدعي ليثبت صحة حجته و يقنعك بها، مثل (بيانات تجريبية_ التقارير و الدراسات البحثية_الإحصاء_آراء الخبراء_المراجعات المنهجية_المقالات الصحفية)
--------------------------
v كيف يمكنني معرفة الحجة التي يريد صاحب المحتوي اقناعي بها ؟
1. اقرأ الملخص او لو فيديو شاهد البرومو لأن صاحب المحتوي ضع فيها حجته في الغالب.
2. لاحظ الكلمات الرئيسية أو لو فيديو لاحظ الأمور الذي يكررها صاحب المحتوي بأساليب مختلفة.
3. ثم حدد مكونات الحجة.
يعني ايه حجة بقي ؟ هي مجموعة منظمة من الأفكار ( الإدعاءات المساندة و الدلائل ) التي تسعي إلي دعم أو دحض الإدعاء المركزي ، يعني مجموعة منظمة من الأفكار علشان تقنعك بفكرة أو تخليك مش حابب فكرة.
--------------------------
v كيف أقوم ببناء نقد ؟
1. تحديد الفرضية أو الفكرة الرئيسية.
2. تحديد التبريرات الذي يبرر بها صاحب المحتوي.
3. تحديد الدلائل الذي يستعين بها.
4. بناء اعتراضك و نقدك ( و المرحلة دي طبعا بعد ما نعمل باقي الخطوات اللي جاية).
________________________________________________
ب- تفصيل الحجة.
1. متي تم إنتاج أو نشر المعلومة؟
2. هل المعلومات ذات صلة يعني لها علاقة ببعض ؟
3. مين قام باعداد هذه المعلومات ( إنتمائه_خبراته _ مؤهلاته_.....).
4. ما مدي دقة المعلومة؟ هل يمكن التحقق منها بأدلة موثوقة؟ هل تم تكرار التجارب في أبحاث أخري؟ هل طرق إيجاد الأدلة موثوقة؟
5. لأي غرض أنتجت المعلومات؟ ( إستكشاف_إقناع_إبلاغ_بيع_ترفيه_تعليم) ومن هوالجمهور المستهدف؟
( الأسئلة دي بتديك صورة عن الحجة المقدمة ، بتديك نظرة عامة عنه يلا نروح لباقي المراحل )
________________________________________________
ت- التحليل.
يعني ايه تحليل؟
التحليل يا سيدي يعني فحص المعلومات بعناية من أجل فهمها و تفسيرها و شرحها.
التحليل دة بقي يا سيدي له 3 أجزاء
v الجزأ الأول هو تحليل الحجة:-
1. هل تحتوي الحجة علي إفتراضات؟ و ما هم ؟
2. هل الحجة منطقية؟
3. هل الإدعاءات مدعومة بدلائل كافية؟
4. هل هناك حجج مخفية؟
--------------------------------------------
v الجزأ الثاني هو تحليل المنهجيات:-
1. لماذا تم إختيار هذه المنهجية؟ هل كانت هذه المنهجية هي الإختيار الأفضل؟
2. كيف تم تصميم منهجية المحتوي؟
3. ما هي فوائد وعيوب هذه المنهجية؟
--------------------------------------------
v الجزا الثالث هو تحليل الدلائل:-
1. هل يشكل الدليل أفضل نوع من الأدلة المتاحة؟
2. هل تم جمع الأدلة بشكل صحيح؟
3. هل هناك تحيزات في جمع الأدلة؟
4. هل الأدلة تدعم حقا الإدعاءات المقدمة؟
( فاكر ان خلصنا كدة ، طبعا لسة ما خلصناش ... يبقا يلا بينا علي خطوة التقييم )
________________________________________________
ث- التقييم.
ü و المرحلة دي مرحلة شبه نهائية ، لأنها المرحلة اللي فيها هنبدأ نحط فيها أحكامنا عن المحتوي اللي قدامنا و نقرر ايه اللي نقدر ناخده منه و ايه اللي مينفعناش ، و ايه الصالح و ايه الطالح .
1. هل تذكر الفرضية بوضوح ؟ هل لها معني ؟
2. هل يتم تقديم أدلة موثوقة لكل سبب؟
3. هل التبررات و الأدلة تدعم النظرية بشكل كامل؟ أي هل هناك علاقة منطقية بينهم؟
4. هل التبريرات هزمت أي إعتراضات عليها؟
5. هل هناك أي مغالطات منطقية.
.
يعني ايه مغالطات منطقية ؟ و هي زي ايه كدة علشان ما أوقعش فيها؟
هقولك يا ابو عمو
أما هي ايه دي ؟
فالمغالطة المنطقية هي الفخ اللي ممكن تقع فيه و انت بتقيم شئ ، فتلاقي نفسك قيمت بشئ غير عادل.
أما زي ايه ، يعني ايه هي المغالطات الشائعة فهي التالي :-
1. مغالطة الشخصنة.
انك و انت بتقيم المحتوي نفسك و اعتقاداتك تتدخل في الموضوع ، و أراءك الشخصية.
2. مغالطة النتيجة المرتبة.
و في المغالطة دي انت بتبني فيها نتايج معينة علي أساس نتايج وصلتلها يعني مثلا تقول " طالما لما كلمت محمد و ما ردش عليا كويس يبقا صديقي لو كلمه مش هيرد عليه كويس... او انك تقول طالما انا ما ذاكرتش يبقا مش هحل في الامتحان كويس يبقا هسقط يبقا مش هعرف اتجوز جوازة محترمة لأن انت ممكن بدون النجاح تقدر تتجوز جوازة محترمة عادي "
3. مغالطة عدد الأشخاص المؤمنون.
و في المغالطة دي تقيم فكرة بنفس الطريقة اللي ناس بتقيمه بيها ، يعني تقول طالما البرنامج دة الناس كلها بتقول عليه رهيب يبقا اذا البرنامج دة مفيهوش غلطة.
4. مغالطة الأبيض والأسود.
و في المغالطة دي تقول اما البرنامج وحش و مالهوش لازمة او كويس و مفيهوش غلطة ، لكن الصح انك تقول هو كويس في كزا و وحش في كزا ، يعني الموضوع نسبي.
5. مغالطة التسفيه من شئ.
و دة معناه مثلا لو دخلت في حكم بين اتنين تقرر ان حد فيهم سفيه جدا فبالتالي متيمعش لأراؤه و وجهة نظره فبالتالي حكمك و تقييمك مش هيكون كامل و هيبقا غيرعادل ، او مثلا علشان انت شايف فئة من الناس انهم قليلين ما تشوفش اللي بيعملوه ولا تسمع لآرائهم.
( خلصنا من مرحلة التقييم ، انت كدة بقي عندك صورة كاملة عن المحتوي أو الموضوع تقدر تصدر أحكامك تجاهه و تقدر تصنفه لو يناسبك او ما يناسبك و تقدر تقرر ايه اللي يناسبك فيه و ايه اللي ما يناسبكش )
________________________________________________
ج- الوعي بالتفسير النهائي.
المرحلة دي بقي هي الأخير ، لا مش شبه الأخيرة هي الأخيرة فعلا أنا عارفك قطعت شوت كبير ، و هي مرحلة بسيطة لكن مهمة جدا ، المرحلة دي اسمها خلي بالك من التحيزات المعرفية ،يعني خليك واعي و انت بتاخد قرار معين انك ما تبقاش متحيز ، ايه هي التحيزات دي ...
1. تحيز البحث عن مؤكدات إعتقادك.
وهنا انك تميل في القرار للأفكار لاعتقادادتك يعني لو انت مؤمن مثلا ان المحتوي دة فاشل فتلاقي قرارك ان المحتوي لا يستحق المشاهدة ، و دة يكون بعد ما.
2. تحيز للمعلومات الأولي.
و هنا معناه انك تنحاز للأفكار الاولي ، يعني مثلا لو دخلت في حكم بين اتنين و في واحد قالك الموضوع كزة كزة كزة يبقا حكمك الطرف الاخر مخطئ حتي لو الطرف الاخر عنده تبريرات أحق ، لا تقع في ذلك و شوف الطرفين .
3. تحيز وجود آخرون.
و هنا طالما في آخرون بيحكموا علي الموضوع بكدة يبقا الحكم كدا ، طالما في ناس تانيين شايفين ان الفكرة دي مش نافعة يبقا الفكرة دي مش نافعة.
4. تحيز القلق من إهدار الطاقة و الوقت.
و التحيز دة لما تكون أهدرت وقت و طاقة كبيرة اوي تجاه فكرة معينة ، و تلاقي ان الفكرة غلط بتبقا منحاز تجاه هذه الفكرة خوفا من بذل مجهود كبير مرة اخري ، و دة ممكن يخليك ما تشوفش الحقيقة ، زي مثلا ناس تبقا بتحارب علشان تلغي اللحية و الرجال الملتحين ، لما يشوف الحقيقة بيخاف يغير رأيه علشان هو بذل كتير تجاه الموضوع دة ، أو بنت دفعت سنين كتير من عمرها في علاقة محرمة بتبقا خايفة تسيب العلاقة لأن مخها متحيز لهذا للقرار اللي هي ضحت علشانه حتي لو غلط.
( فخليك واعي و انت بتصدر أحكام و انت بتاخد قرارات انك متقعش في التحيزات اللي ذكرتها ، طبعا في تحيزات كتيرة ، لكن دي أهم التحيزات و أكثر التحيزات اللي بيقع الناس فيها علشان كدة ذكرتها )
___________________________________________________________________
و بعد ما انت قرأت عن هذه المقالة اللي خدت مني وقت كبير في كتابتها ، و اكيد اخدت منك انت كمان وقت كبير في التفكير و القراءة ، حابب أقولك علي الهدف الرئيسي من الحديث عن هذه المهارة المهمة جدا جدا جدا ، لكن لازم تقرأ المقالة كاملة و تتخيل و انت بتطبقها علي محتوي معين و الافضل انك تمسك محتوي معين و تشتغل عليه بالخطوات المذكورة علشان تكون حققت الهدف اللي أنا هذكره الآن و هو
((( ما تبلعش أي معلومة بتتصدرلك كدا ، بدون ما تتفحصها و تفكر فيها و تحللها ، علشان ما تكونش سبب في نشر ضلال مغلف بغلاف جميل ولذيذ ، أكيد هتلبس أحيانا لكن ركز انك ما تلبسش دايما )) )
.
عاوز أقولك معلومة اخيرة ، انت لو طلعت من المقالة دي بأن مينفعش أصدق معلومة الا لما أراجعها كويس و مبنفعش أميل لاتجاه معين بدون ما أكون فكرت في الموضوع كويس و تبينت منه ، و مينفعش أخد كل قراراتي بدون دراسة غير متحيزة .... يبقا المقالة حققت هدفها ..... استناني بقي في المقالة الجاية .
بس اوعا تنسا #منشن لحبايبك #شير لتفيد غيرك ، و تكتب الجزئية اللي شةفتها مهمة علي صفحتك بهاشتاج #مهارة_في_مقالة
التعليقات