يعني ايه "كأنك تراه"؟ وايه الحاجات الي ممكن تساعدنا أننا نقرب من المعني دا ونعيشه في حياتنا؟
الإحسان (أن تعبد الله كأنك تراه فإن لم تكن تراه فهو يراك)
الإحسان هو كمال السمو الروحاني في معرفة الله🙏🏻💜
(الإحساس بالإله) هو أهم حاجة لازم نتحقق منها في الحياة، لازم نستشعر المعية الربانية والرعاية والعناية والمحبة والرحمة الي ربنا مغرقنا فيها🥰
"...ممن سيظلهم الله في ظله يوم لا ظل إلا ظله: رجل حيث توجه علم أن الله معه"
لازم نحس التواصل والصلة القائمة بيننا وبين ربنا في حياتنا اليومية،
العبادات دورها إنها تخلينا دايما فاكرين التواصل دا،
وكل ما نفتكر و نصدق في الحقيقة دي أكثر هنكون في حضور مع الله اكثر و دا هيساعدنا نشوف ربنا في حياتنا بشكل أكبر وأكبر💗
👈 ٥ عادات تساعدنا نشوف ربنا في حياتنا اليومية:
١. أسماء الله الحسني💚
أول حاجة هي إننا نعرف معاني أسماء وصفات الله سبحانه وتعالي، ونبدأ نشوف تجليات (ظهور) الصفات دي في أفعال الله وآثاره في الكون،
ربنا سبحانه وتعالي هو الي خلق كل شيء في الكون {وَٱللَّهُ خَلَقَكُمۡ وَمَا تَعۡمَلُونَ}، وبالتالي مافيش أي حاجة إلا وهتبقي بتعكس صفات من صفاته،
فمثلا، هنبدأ نشوف الله المنعم في النعم،
ونشوف الله الودود في كل مرة الناس الي بيحبونا بيعبروا لينا عن حبهم،
نشوف الله الرقيب فنطمن ونعرف إن ربنا بيخلي باله مننا دايما،
نشوف الله الحكيم اللطيف في الإبتلاء فنسكن للطف ربنا بينا وحكمته في تدبيره وإختياره... وهكذا، كل ما نعرف أكثر كل ما نشوف اكثر.
٢. المناجاة✨🌟
إن يكون عندك وقت كل يوم حتي لو ٥ دقايق بتتكلم فيهم مع ربنا ،
تخصص"Quality Time" مع الله سبحانه وتعالي ،تفضفض، تطلع كل الي جواك، تتكلم عن أحداث اليوم ،عن مخاوفك، عن أحلامك، تشتكي! "الشكاية لله عبادة"
{ إِنَّمَاۤ أَشۡكُوا۟ بَثِّی وَحُزۡنِیۤ إِلَى ٱللَّهِ}
☁️"أختلس من الدنيا وقت تجلس فيه مع الله"☁️
دا هيقوي جدا ترابط العلاقة والإحساس بالتواصل بيننا وبين ربنا🙏🏻
٣. الدعاء🤲🏻
أطلب من ربنا كل حاجة،
قال رسول الله صلى الله عليه وسلم:“لِيَسْأَلْ أَحَدُكُمْ رَبَّهُ حَاجَتَهُ حَتَّى يَسْأَلُهُ الْمِلْحَ وَحَتَّى يَسْأَلُهُ شِسْعَ نَعْلِهِ إِذَا انْقَطَعَ”
النبي بيعلمنا لما نكون عايزين حاجة نروح لربنا ونطلب منه يعملهالنا،
(الي بيرفع كل حاجة لإيد ربنا، بيشوف إيد ربنا في كل حاجة)🥰
٤. الذكر📿
{فَٱذۡكُرُونِیۤ أَذۡكُرۡكُمۡ}
"ومن ذكرني في نفسه ذكرته في نفسي"💙
{وَلَذِكۡرُ ٱللَّهِ أَكۡبَرُۗ}
المقصود من الذكر هو دوام حضور القلب مع الله، وتصفية الذهن وتطهير القلب وتزكية النفس، تكرار المعاني القوية الي ورا الذكر بيأثر علي الأفكار وعلي القلب وبالتالي علي حال الإنسان وتصرفاته ومنظوره في الحياة.
٥. التفكر🌌📖
إن الواحد دايما يدرب عقله يشوف الحكمة من وراء الأحداث، المواقف، الأشخاص وكلام الله سبحانه وتعالي في كتابه... يشوف آيات الله ورسايله،
يشوف "الله" ،حقيقة وأصل ومصدر كل شيء، فيفهم كل حاجة بشكل أصح، يفهم ويستقبل الرسايل الي بتوصله من ربنا، فيتعلم وينضج ويتطور في رحلته الروحانية✨💫☄️
📒🖊️وهيكون جميل جدا إن يبقي عندك مكان مخصص بتسجل فيه خواطرك أثناء رحلتك الروحانية مع الله وأثر العبادات💛
🔖تسجل تجليات أسماء الله الحسني في حياتك اليومية
🔖تسجل فيه خواطر التفكر اليومي
🔖تعمل تدريب الإمتنان وتشوف نعم ربنا الي بيبعتها ليك مخصوص كل يوم وتشوف المنعم في النعم
💌الخلاصة في كلمتين:
إبني يوميا في علاقتك الخاصة بالله وقوي الترابط والصلة بطريقتك الي تلاقي قلبك عندها وحاول دايما تحس بمعية ربنا سبحانه وتعالى وقربه
{وَإِذَا سَأَلَكَ عِبَادِی عَنِّی فَإِنِّی قَرِیبٌۖ}
{وَنَحۡنُ أَقۡرَبُ إِلَیۡهِ مِنۡ حَبۡلِ ٱلۡوَرِیدِ}
وخلي العبادات تفكرك بالتواصل دا🙏🏻
ونقصد وجه الله في كل حاجة بنعملها {فَأَیۡنَمَا تُوَلُّوا۟ فَثَمَّ وَجۡهُ ٱللَّه}☝🏻
ونطلب دايما من ربنا كل إحتياجاتنا {یَـٰۤأَیُّهَا ٱلنَّاسُ أَنتُمُ ٱلۡفُقَرَاۤءُ إِلَى ٱللَّهِۖ وَٱللَّهُ هُوَ ٱلۡغَنِیُّ ٱلۡحَمِیدُ}🤲🏻
ونشوف ربنا دايما في كل حاجة، ونشوف المنعم في النعم🥰
#حياة_الإحسان
التعليقات