خطوات بسيطة لو مشينا عليها نكون مصدر دعم وتشجيع لكل الي حولينا, ونتعلم ازاي نطلع أحسن ما في الناس الي بنحبهم.
الإحسان المعنوي❤
"الإحسان إنك تطلع أحسن ما عندك وأحسن الإحسان إنك تطلع أحسن ما في الي حواليك"🥰
كل ما تحب تشوف الي حواليك كويسين وفي أحسن حال وواصلين لأحسن نسخة من نفسهم،ربنا يعينك تطلع أحسن ما فيك، كل ما تيسر علي الخلق ربنا ييسر عليك ، وكل ما تعين الناس ربنا يعينك ،وكل ما تكون سند للناس ربنا يكون ليك سند ،وكل ما تجبر بخاطر الناس ربنا يجبر بخاطرك ،وكل ما تحب وتتمني ليهم الخير ربنا يبعتلك كل الخير🌿
{هَلۡ جَزَاۤءُ ٱلۡإِحۡسَـٰنِ إِلَّا ٱلۡإِحۡسَـٰنُ}
والأصل في دا حاجتين
١. إن قلبك يكون ممتلئ بحب الله ،فيفيض الحب من قلبك لكل خلق الله، فتحبهم علشان هم خلقه وتبقي عايز تشوفهم حلويين
لأن "حب الصنعة من حب الصانع"
صنعة الله حلوة، حتي لو عليها تراب بس فيهم نفخة من روح الله
فلازم هيكون فيهم خير وجمال❤️
٢. لازم نؤمن و نصدق إن كل الناس فيها خير وسر، إن كل حد فينا ربنا وهبه بقدرات ومواهب مميزة وفريدة ، كل حد فينا عنده قدرات خارقة🥰
🌟هتلاقي في كل إنسان بتقابله حاجة جميلة و خير كثير، وتميز ، كل إنسان بتقابله بيضيف ليك حاجة وبيعلمك حاجة مهما كان سنه أو دينه أو جنسيته أو مستواه العلمي أو الإجتماعي.
حُب الناس بصدق وإنك تصدق فيهم وفي الجمال الي جواهم بجد، أساس علشان تقدر تدعمهم وعلشان مشاعرك تكون حقيقية فتوصلهم وتفرق معاهم فعلا🙏🏻
وطاقة الحب دي بنستمدها من الله ومن حب الله لخلقه جميعا❤
🍫شركة Mars بتقبل عدد معين من الموظفيين المتقدمين ،والي ماتقبلش بتدي كل واحد فيهم List بالمميزات بتاعته، لأنهم فاهمين قيمة البشر وفاهمين إنك لما تطلع أحسن ما في الخلق بتساعد إنك تطلع قادة ناجحيين☺️
الخطوات:
🌷إحسن الإستماع بإنتباه وأهتمام شديد للناس الي حواليك
(تفهم وتعاطف وتواصل عميق)
🌷إستوعب الناس برحمة وحكمة
الرحمة أولا بالإحتواء إنك تتقبل وتحتضن الضعف/النقص
وإنك تشوف الجمال وتظهره،
والحكمة بالنصح الجميل لمواطن الضعف
وبالتأييد والمساندة لمواطن القوة.
🌷خليك قدوة حسنة للي حواليك
🌷الكلمة الطيبة صدقة ،جبر الخواطر وإدخال السرور من أحب الأعمال الي الله🥰
🌷ساعد الناس تطلع مواهبها،
لما تشوف حد موهوب في حاجة ،قوله وشاور له علي موهبته، دا هيخليه يصدق فيها أكثر ويشتغل عليها وينميها🙏🏻
🌷شجع الي حواليك تشجيع صادق مستمر وأرفع من روحهم المعناوية⬆️
🌷وفر المناخ المناسب للناس علشان تقدر تبدع أكثر وتطلع أحسن ما عندها
وفر مساحة آمنة ومريحة لكل واحد أنه يعبر عن نفسه بحرية ويبدع ،من غير أحكام وبحب وتقبل غير مشروط.
🌷شارك الناس الي بتحبهم في الحاجة الي بيحبوها وتابع معاهم النتائج بأهتمام وحماس.
🌷فن تحويل الأعداء لأصدقاء ودا بيحتاج سعة صدر وحكمة، لما تحسن لشخص أساء ليك دا بيحرك الخير الي جواه و بيساعده يراجع نفسه ويحفزه يطلع أحسن ما فيه❤️
{وَلَا تَسْتَوِي الْحَسَنَةُ وَلَا السَّيِّئَةُ ۚ
ادْفَعْ بِالَّتِي هِيَ أَحْسَنُ
فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ
وَمَا يُلَقَّاهَا إِلَّا الَّذِينَ صَبَرُوا
وَمَا يُلَقَّاهَا إِلَّا ذُو حَظٍّ عَظِيمٍ} ❤️
💌الخلاصة في كلمتين:
لو كل واحد وفر الأمان و الدعم والحب الغير مشروط للدايرة الي حواليه وساعد غيره يخرج أحسن نسخة من نفسه ، هنبقي في مجتمع محسنين كل واحد بيعبر عن تكوينه البديع و بيطلع أحسن حاجة عنده في مجاله وحتته وبينفع بيها الناس وبيعمر الأرض🌍💓
إستبدل إصدار الأحكام والنقد بالتقبل والتشجيع
لأن الحاجة الي بنركز طاقتنا عليها هي الي بتزيد والحاجة الي هنسقيها هي الي هتنموا و هتزدهر🌷.
#حياة_الإحسان
التعليقات