طبعًا غريب أن يكون في مصطلح "خطاف ستات" لكن مش غريب أبدًا يكون في مصطلح "خطافة رجالة"!
هل الست بتخون؟ أيوة
هل الست بيتم إغوائها واستدراجها؟ أيوة
هل المجتمع بيعترف؟ لأ
هل لما بتتحاسب على خيانتها بيتقال غصب عنها ضعفت ودي مجرد نزوة؟ لأ
هل شائع لدى المجتمع وجود "خطاف ستات"؟
يعني واحد بيحب الستات المرتبطة/ مخطوبة/ متزوجة وبيحاول طول الوقت خداعهن، إغوائهن، خطفهن من أزواجهن وتخريب بيوتهن؟ لأ طبعًا
طيب نعكس الأسئلة.
هل الرجل بيخون؟ أيوة
هل الرجل بيتم إغوائه واستدراجه؟ أيوة
هل المجتمع بيعترف؟ أيوة!!
هل لما بيتحاسب على خيانته بيتقال معلش غصب عنه ضعف ودي مجرد نزوة؟ أيوة برضه!
هل شائع لدى المجتمع وجود "خطافة رجالة"؟
يعني واحدة بتحب الرجال المرتبطين/ خاطبين/ متزوجين.. وبتحاول طول الوقت خداعهم، إغوائهم، خطفهم من زوجاتهم وتخريب بيوتهم؟ أيوة طبعًا
نستنتج من إجابات الأسئلة اللي فوق دي:
1. أننا متفقين على عدم الاعتراف بوجود خطاف ستات وأن الست عامةً مسؤولة عن أفعالها والمجتمع عمره ما يرحمها لو غلطت في حق زوجها "ودة جميل جداً"
2. نستنتج أيضًا أننا متفقين على وجود خطافة رجالة وأن الرجل بهذا المفهوم غير مسؤول عن أفعاله والمجتمع ممكن يرحمه عادي ويدافع عنه كمان لأنه راجل غلبان ضحية خطافة الرجالة "ودة هزلي جدًا"
وطالما هنعترف بيه؛ يبقى معلش يا "ذكر" إحنا هنسحب منك كدة صفة القوامة لأنك ضعيف والست هي اللي بتخلي بالها عليك عشان سوري أنت بتتخطف بسهولة، معلش نستأذنك برضه نسحب منك صفة الرجولة كدة لأنك لسة طفل أي حد يقولك أوديك عند ماما بتروح معاه!
سحبنا منك كل حاجة أهو.. أنتِ كست بقى مكملة مع مين؟ أو بتدافعي عن مين؟ بتعادي "ست أخرى" غير مؤثرة في القصة إطلاقًا لحساب مين؟
ذكر مخطوف؟ فاقد للقوامة والرجولة والأهلية، بيتعامل كطفل لازم نحوط عليه من كل ناحية لأنه غير واعي لتصرفاته، غير مسؤول عن أفعاله، سريع الهروب والملل ولازم طبعًا نجدد له كل حاجة كل شوية عشان مايزهقش! تجددي في أكلك، لبسك، شكلك، لون شعرك، لو تخينة تخسي ولو رفيعة تتخني، علشان الطفل الغير ناضج نفسيًا اللي معاكي ما يزهقش وتضمني ولائه وحبه وانبهاره الدائم.
طب أنتِ ليه مش بتزهقي وتروحي لأي حد غيره؟ هل لأنه كائن جميل متجدد دائم التألق مثلاً؟ ولا عشان انتِ نضجت نفسيًا وعقليًا بما يكفي وعارفة أن مفيش حاجة اسمها كدة؟
هل بعد ما سحبنا منه كل صفاته اللي هو علشانها راجل، لسة شايفة أنه راجل؟
لسة عندك استعداد تنتقمي من ست عشان خطفت زوجك منك؟ وكأنه غير واعي؟
هل لسة مقتنعة بوجود خطافة رجالة؟
التعليقات
للأسف أن المجتمع يلصق بالمرأة نقصان الأهلية في كل شيئ سواء في مشاعرها وجسدها يحملها وزرها ووزر القبيلة.