تطوير الذات

أنت مين؟

هل كلنا واحد؟ هل كلنا كبشر بنستقبل المعلومات بنفس الشكل والآلية؟؟ أكيد لأ.

Rawan_Adel
٢٢ كانون أول ٢٠٢٠ | ٤ دقائق قراءة
أنت مين؟
shutterstock

هل كلنا واحد؟ هل كلنا كبشر بنستقبل المعلومات بنفس الشكل والآلية؟؟ أكيد لأ.

الناس عمومًا مختلفين في طريقة استقبالهم وتفاعلهم مع كل حاجة، جزء كبير من الاختلاف دة نابع من نمط كل شخصية واستقبالها من خلال الحواس.

الحواس مش بس أننا نسمع ونشوف ونلمس، تخيل أن حواسّك داخلة كمان في طريقة تفاعلك مع الأمور و عرضك لآرائك و طريقة مناقشتك ليها!

أنت والناس اللي حواليك في منكم البصري وفي منكم السمعي وفي منكم الحسي أو "التذوقي" كل نمط من دول بيتعامل مع الناس وبيشتغل وبيستمتع ويبدع ويتكلم ويحس على حسب نمط شخصيته. كل نمط من دول بيكتسب معلوماته وبيقدر يتعلم أو يدرس بطريقة مختلفة تمامًا عن باقي الناس.

*طيب حلو أوي الكلام دة، أعرف منين بقى أنا مين في كل دول؟ أنا سمعي ولا بصري ولا حسّي؟

*أقولك يا سيدي: راجع الشات اللي بينك وبين أي حد بتتكلم معاه كتير.

*نعم؟!

*آه والله زي ما بقولك كدة، أكتر حاجة تخليك تعرف أنت مين بعيدًا عن احتبارات الشخصية والأنماط والكلام الكبير دة، وتكاد تكون أسهل طريقة، هي أنك تركز في كلامك أو تراجع شات بينك وبين حد بتكلمه كتير


_ لو بتتكلم عن حاجة مثلًا ولقيت نفسك بتقول: اسمعني، كلمني عن، احكيلي عن، خليني أقولك، يبقى أنت "سمعي"

بتفهم أكتر بالكلام والشرح، بتحب تسرد وتسترسل، ،بتحب تسمع، بتركز في أصوات حواليك مش أي حد ياخد باله منها، تحب تسمع كلام حلو وتحب تقوله، بتحب بودنك، وبالتأكيد هتلاقي نفسك ميال للكتب المسموعة والراديو، المزيكا والعزف...


_ لقيت نفسك بتقول: بص، أنا شايف، وجهة نظري، وريني، خليني أشوف، يبقى أنت "بصري"

بتفهم أكتر بعرض الصور، بتحب تتفرج، بتحب تشوف، بتركز بصرك على حاجات معينة غيرك ممكن ميشوفهاش، بتحب بعينك وذاكرتك البصرية ممتازة، وبالتأكيد هتلاقي نفسك ميال للتصميم والفوتوشوب والألوان والأشكال والتصوير...


_ لقيت نفسك بتقول: أنا حاسس، مش حاسس، حلو، مر، يبقى أنت "حسي"

بتفهم أكتر وتستوعب بالتجربة، بتحس أكتر بالتلامس الجسدي، القرب، بتهتم بشم وتذوق كل حاجة بتركيز قبل ما تاكلها أو تشربها، بتحب بحواسك المادية، ميال أكتر للحرف اليدوية والفك والتركيب...


*طيب أنا طلعت كل دول!

_أحب أقولك أن كلنا تقريبًا جامعين بين الـ3 أنماط، لكن المهم هو النمط الغالب على تصرفاتك وكلامك، ركز كويس هتعرف أنت مين

هتلاقي نمط واحد أو بالكتير نمطين يعني ممكن تكتشف أنك سمعي بس أو سمعي بصري/ حسي بس أو حسي سمعي... وهكذا

*طيب دة هيفيدني في إيه؟

_يفيدك أنك تعامل نفسك زي ما هي عايزة بالظبط، مش زي ما الناس عايزة، يعني ماتضيعش وقتك في محاولة اكتساب مهارة أو معلومة بطريقة مش مناسبة ليك لمجرد أن كل اللي حواليك بيعملوا كدة، متجبرش نفسك على القراءة مثلًا عشان تبقى مثقف وأنت ممكن تستوعب وتستفيد أكتر لو تابعت أفلام وثائقية.

_يفيدك أنك متحكمش على حد مش بيعرف يعمل نفس اللي انت بتعمله ومعندهوش استعداد يعرف لأنه بالتأكيد مميز في شيء تاني أنت ممكن متعرفش تعمله.

_يفيدك أنك تقدر تساعد نفسك وغيرك سواء كان كبير أو صغير أنه يفهم نفسه ويعرف يدور على المعلومة ازاي ويطور من نفسه من غير ما يحس أنه أقل من حد ولا مضطر يعمل حاجة هو مش حابب يعملها.

أنماط-شخصية سمعي حسي بصري اختلاف شخصية
Rawan_Adel
ألهمني ألهمني
ألهمني ألهمني أضف تعليقك

التعليقات

إقرأ المزيد من تدوينات Rawan_Adel

تدوينات ذات صلة