الكتابة لا عمر لها ، تحرر من أفكار محيطك و انطلق بحثاً عن شخصياتك الرئيسية و ارقص مع الثانوية .. فهم لك و أنت لهم .
اذا بتعرف تكتب و شايف عندك هاي الموهبة فاكسر القاعدة ! ما تستنى تخلص عدد معين من الكتب ولا تاخد مشورة اكمن شخص و تقنعهم و بس يقتنعوا تبلش تشتغل ع مشروعك الكتابي سواء كان قصة او رواية او حتى كتاب
تجاربنا بالحياة مختلفة ، شخصياتنا مختلفة و كمان هبات الله تعالى علينا مختلفة ، في ناس بتحتاج اربعين سنة عشان يكتبوا اول رواية الهم و سبعين عشان يكتبو قصة نجاحهم ، بينما في غيرهم كتبوا رواياتهم الاولى على مقاعد الدراسة و كتبو همه و حكو الناس عن قصة او قصص نجاحهم قبل ال30 ..
اهم اشي لازم تشوفه بكل الموضوع هو الخطوط الحمراء ، يعني انت لازم تكون عارف انه حروفك الي بتنشرها للملأ انت محاسب عليها ، ممكن كلماتك او قصة و رواية الك يهدوا حدا لفكر و سلوك معين فتؤجر عليه و تؤجر على كل شخص علمه هذا الشخص مما تعلم في كتابك ، بس بالقابل أنت آثم اذا نشرت شيء غير اخلاقي بداعي التوجيه و او تحبيبه للناس و حثهم عليه ، او ترسيخ بصورة مباشرة او غير مباشر شيء حرام و مش منيح ..
قلمك سلاح عنجد ، انت قادر تدافع فيه عن الحق و تدعو الناس اله .. كتابك و صفحاتك هي منبرك اللي بتنادي الناس منه و بتخاطبهم من خلاله ، انت تمتلك موهبة عظيمة بتفقد شيء كبير من بريقها اذا ضليت تاجلها و تخفض وهجها لانه بنظر اللي حواليك " هاد مو وقته " او " لسا صغير "
و طبعا بالنهاية حابة احكيلكم اشي ، مش مهم انك تحدث تلك الضجة الكبيرة باول كتاب او تاني كتاب او حتى سابع كتاب الك ، هاد رزق من الله .. و لو كتابك ما احدث الصدى اللي انت متوقعه هاد مو معناه انه انت كاتب سيء او مليء بنقاط الضعف اللي بتحتاج شغل و توجيه .. انت يمكن لسا ما لقيت الشريحة المستهدفة .. باختصار الناس اللي بتقرا لاجاثا كريستي مش نفس اللي بيقرؤوا لاحلام مستغانمي .
المهم هو انك توصل جملة كفيله بانها تستوقف الشخص اللي بيقرأ كتابك عشان يتفكر فيها ، تذكره بشي من الماضي او تستدعيه للتفكير بجانب من المستقبل او تغيير حاضره حتى ! انت قادر على غسل الادمغة يا عزيزي انت امتلكت الاسلوب الفكرة .. فاستغلها بطرقة صح ..
لذلك و عشان هيك ما تنسى انك تحافظ ع مستوى معين من الثقافة و العلم ، ما تكتب فقرة فارغة .. وصِّل فكرة او قيمة او خلق ، ان شاء الله ياخد معك الخلق الواحد رواية او سلسلة روايات مش مهم .. المهم هو انك توصل كلشي عندك و كلشي انت قادر انك تعطيه لغيرك .. الكتابة و الاستمرار بطريقها كفيل بانه يغيرك ، يصقلك من اول و جديد .. حافظ عليها و لا تكبحها
لا تهملها
ولا تتركها تائهة بين افواه غير القادرين على تقديرها .
التعليقات
رائعة كالعادة