المطلقة --انسانة

المطلقة انسانة حرة ومخيرة ---لا تسمحى للاخرين بالتحكم فى حياتك تعلمى التوازن وانطلقى

((المطلقة))

هى انثى قررت الا تكمل فى علاقة غير مناسبة لها او قرر طليقها ذلك او قرر الاثنان ذلك او اخذ احدهما او كلاهما قرار عشوائي غير متزن

المهم اصبحت مطلقة بغض النظر عن الاسباب

المطلقة

1- مش واحدة درجة تانية

((هى انثى مرت بتجربة غير مناسبة وخرجت منها ذى اى حد فى الحياة بيمر بأى تجربة ويخرج منها وكانت تظن مثل اى متزوجة ان حياتها ستظل مع زوج .. ولكن مرت بتجربة الطلاق واصبح ذلك واقعها وعليها ان تتعلم ان تتجاوزه بهدوء واتزان بنفسها او تطلب مساعدة متخصص ))

2-مش خطافة رجالة

(( الست الخوافة الغير واثقة فى نفسها تراها كذلك

والرجل الضعيف هو من يمكن خطفه

ولكن القوى المتزن صاحب القرار يختار ما يناسبه لا يحتاج الى من يخطفه

والانثى الخطافة قد تكون متزوجة او مطلقة او ارملة او single لو فى طبعها الخطف-- انتبهوا لذلك ))

3-مش بتدور على المتزوجين

((اذا قررت الزواج مرة اخرى فهذا اختيارها واختيار اى انثى غير متزوجة -- ان تتزوج اعزب او ارمل او متزوج او لا تتزوج فهذا اختيارها الحلال الحر واختيار من يوافق ويناسبه ذلك وما يناسب البعض قد لا يناسب البعض الاخر

فكل انسان له ما يناسبه فى الحياة طالما انه مخير ومتزن ويعرف كيف يدير حياته بوعى ))

4-مش محتاجة تعاطف

((لان ده بيضايقها جدا لان التعاطف المصطنع او المبالغ فيه يشعر الانسان انه غريب او مجرم او عنده مشكلة --عادى واحدة اتجوزت واتطلقت او خلعت لعدم التوافق --وقررت تكمل حياتها بشكل طبيعى مناسب لها ))

5-مش لاقية راجل

((دى نظرة الخوف داخل بعض المتزوجات ونظرة المستغلين من بعض الرجال --لو هى انثى قوية حرة متزنة لن تتأثر بذلك وستختار ما يناسبها باتزان وحرية ولو هى غير ذلك فهى تحتاج الى تطوير ذاتها مثل اى انثى فى اى مرحلة وكذلك الرجل ))

6-مش ضعيفة ومكسورة الجناح

(( لان الاصل انها تتعلم ان تتجاوز صدمتها او وجعها او تطلب المساعدة لتجاوز ذلك ذى اى حد بيمر بمشكلة ثم تتزن وتختار الطريق الذى تكمل فيه حياتها بشكل صحى وطبيعى بغض النظر عن المجتمع الجميل))

لان اى اختيار فى الحياة له من يؤيده ومن يعارضه

الاتزان مهم جدا

فى متزوجة غير متزنة

وفى single غير متزنة

وفى مطلقة غير متزنة

وفى ارملة غير متزنة

هى فى النهاية انثى متزنة او غير متزنة دى قضيتها فى الحياة ومهم انها تطور نفسها وتختار ما يناسبها

نظرية ولى الامر اللى بيلعبها المجتمع او بيحاول يلعبها على اى حد ((غير حر ومسئول وراقى)) تناسب الطالب القاصر فى مدرسته ولكن البعض يدمنها مع من حوله حتى الممات ليجد حل لمخاوفه الدفينة ويشعر بالاطمئنان النسبي

مرحلة الفطام ليست فقط للرضع ولكن يحتاج بعض الكبار الى الفطام النفسي

وان يسمح للاخرين ان يختاروا بنصح منه لا اجبار

الحياة تجارب كثييييرة ومتنوعة

وكل متزن حر مخير

من فضلك ركزى وطورى ذاتك واتزنى

او اطلبي المساعدة ان لم تستطيعى وحدك

الامر بسيط قد يحتاج بعض الجلسات لتعودى الى توازنك وتختارى ما يناسبك باتزان ووعى

لا تختارى ابدا وانتى تحت ضغط او غير متزنة -انتبهى

اختارى ما يناسبك ويناسب مرحلتك برقى وتوازن

واسألى المتخصصين الواعيين اذا اختلط عليكى الامر

يومك جديد ومتزن

⚘