ألعـاب نفسية

(المباريات أو الألعاب النفسية) هاتكشف وتكتشف نفسك وغيرك

الكلام اللي هاقوله دلوقتي غير إنه مهم جداً .. هايوصلك لتلات حاجات.. أولهم هاتتكشف قدام غيرك.. تاني حاجه هاتكشف غيرك.. والتالته هاتتكشف قدام نفسك ‼.. والتلات حاجات دول هايوصلوا بيك لحاجتين..إنك هاتتصدم في غيرك أو هاتتصدم في نفسك ‼والحاجتين دول هايوصلوك لحاجه.. أيوه اصبروا عليا بس.. إنك هاتفهم هاتعرف هاتتعلم وهاتدور على حل.. فنجان قهوتك.. وركز معايا..وكن مستعد نفسياً إنك هاتلاقي نفسك هنا أو أقرب الناس ليك ‼هابدأ بجملة واقعية جداً صادقة جداً قلتها قبل كده للكاتب الأميريكي آرثر ميلر " في مرحلة معينة كلنا مجرد عقاب في حياة البعض "

ايه الحكاية.. الحكاية إن طبيب نفسي إسمه إيريك بيرن ألف كتاب سنة 64 إسمه الألعاب التي يلعبها الناس.. يقصد ألعاب أو مباريات نفسية كتيره جداً الناس بتلعبها على بعض أو على نفسهم بشكل يومي بصفة دايمه.. وللأسف أهدافها كلها غريبة ضد مصلحتنا سواء إحباط تخلي ابتعاد هروب سيطرة.. شرح #دكتور_محمد_طه كتير منها في كتابه الأخير #لأ_بطعم_الفلامنكو.. وهاتكلم عنهم وهاصيغهم ببساطه وإختصار .. " خلي بالك" قد تكون بتلعب الألعاب دي بكامل وعيك عن عمد قاصد ده أو بتلعبها بدون وعي ولا قصد ... يلا بينا...

⚠أول لعبة.. ناس موجودة حوالينا وما أكثرهم وقد تكون واحد منهم الhelp rejecting complainers الشاكين رافضي المساعدة.. ناس تشكيلك من حاجات كتير وتجرجرك لنفس إحساسها وتحاول تعرض كل الحلول المتاحة عندك وكلها تطلع اتجربت ومانفعتش أو مرفوضه تجيبلك إكتئاب وتملاك طاقة سلبية تستهلك طاقتك تحسسك بالذنب .. هما بيتلذذوا بالشكوي حابين دور الضحية الغرقان اللي مستحيل يلاقي طوق نجاه.. دي لعبته خلاص عرفت هو مين :) ؟! الحل معاه بعد كده عبرله عن اهتمامك وإحساسك بيه وحمله المسئولية كامله وخليه يطلب نصيحه من حد غيرك موثوق فيه ماتضيعش وقت ع الفاضي معاه..

⚠تاني لعبة.. إخترلي بر وانا أرسي عليه .. حد قد يكون ولد أو بنت طبعاً.. تقرب منك جداً وتعشمك والحياه حلوه أول إنت ماتطمن تتغير هي وتبعد فجأة بدون سبب تقرب وتبعد تعشم وتصد تلخبطك تحيرك تشكك في نفسك و أول انت ماتيأس وتبعد ترجع تاني... بتكون الحالة دي تعرضت لصدمه نفسية من شخص قريب منها وبتكون عايزة تقرب تشبع حاجتها النفسية وتبعد خايفه من تكرار الصدمه بس انت لازم توقف الشخص ده لحد كده وتبعد تماماً اختار لنفسك بر واحد بس بر الأمان النفسي..

⚠تالت لعبة .. الندل/الندله.. خلينا نتكلم بدون تحديد للنوع لإن كل الحالات وارده من ذكر أو أنثي.. ندل و ده أشيك مسمى هنا حد بتنبهر بيه يقرب منك بشكل أو بآخر يتابعك نظرات وحركات وكلام موجه ليك وأغاني يغرقك أحاسيس ومشاعر بيوصل رسايل نفسية بس من تحت لتحت عشان مايبقاش مسؤل عنها وقت الجد .. وأول ماحضرتك تسلم وتحس ناحيته بحاجه وتنطق" يخلع" ماحصلش لا فهمت غلط لا كلام غريب.. هو عايز يعلقك يتجنب الوحدة وعايز يبعد يتجنب الإرتباط.. لما تقابله قول له ماسمعتش عن حاجه إسمها snacks قبل كده بدل ماتتسلي على الناس :) ..

⚠ أربعة.. لعبة خطيرة غريبة عبارة عن اتنين بيحبوا بعض اختاروا بعض بس عارفين.. لأ واثقين إن عمرهم ما هايتجوزوا.. آه واثقين.. بيلعبوا لعبة الحب المستحيل وبيعملوا دماغ عذاب.. ليه عشان الاتنين بيهربوا من نفس الحاجه الإلتزام والمسئولية والخوف من المجهول في العلاقة.. بيهوموا نفسهم ان الظروف والدنيا ضدهم لكن هما اللي ضد نفسهم..

⚠خمسة.. أملOverdose.. ناس بتحط أمل في حاجه مش هاتحصل أو صعب تحصل يعني مثلاً حد مابيعملش أي حاجه في حياتة وعايز يبقي معاه مليون جنيه وأكتر.. الأمل لازم يكون في حدود لا تنفصل عن الواقع يبقي أمل مش وهم ولا تهريج..

⚠السادسة.. مين الريس مين اللي هايمسك الكنترول في العلاقة وهايتحكم ويسيطر مين هايمشي التاني ودي بتكون في علاقات الإرتباط والخطوبة والج.. ده لو كملت لجواز.. هدف فظيع جداً مين هايمشي التاني مع إن في مليون حاجه و أكتر في العلاقة أهم من كده بكتير.. هي مش خناقة ولا دور بطولة دي حياة (حياااة) .. هابدأ أختصر أكتر وألفت النظر سريعاً للي جاي عشان الموضوع كبير..

⚠ سبعة.. المن الذي يتبعه أذي إنسان معطاء وكريم غالباً أب أم أخ أخت يقولك انا باصرف بأكل باشرب يبقي تسمع كلامي يبقي ماسمعلكش رأي..

⚠تمانية.. مالك؟ مافيش، مالك؟ مافيش.. برده؟؟ شخص بيقصي عنه شريك حياته أو الطرف التاني بيقول بالرد ده قلتلك زي ما قلتلكش.. خليك واضح بسيط قصر المسافات افتح باب المناقشة..

⚠تسعة.. أنا اتغيرت بتكون أكتر بين الأزواج هو بيتعامل بشكل سيئ جداً وهي ساكته أول مايفيض بيها وتقرر تبعد بجد يوهمها بالتغيير وتصدقه يومين ويرجع أسوأ مما كان وطالما هنا المشكلة مزمنه يبقي لازم حل جذري أو بتر العلاقة تماماً.

⚠عشرة.. هابدأها بجملة غريبة " العلاقات بتبدأ بأوعي تتغير بعد كده إنت اتغيرت بعدها لازم تتغير "طرف كان بيشتكي من التاني مر الشكوي ونفسه يتغير ولما يتغير بعد عذاب يبقي ناكر التغيير ده ويعتبره تمثيل وعايزة بينه وبين نفسه يرجع زي الأول لأنه كان مستمتع بالأذي والشكوي!!!

⚠أحد عشر.. الحالة الإجتماعية في البطاقة متجوز أو متجوزة والواقع غير كده.. ناس موجودة بالإسم فقط في حياتك بيكملوا غلط ومصايب عشان الأولاد ماتتإذيش علي أساس انهم في تربة خصبة لنشأه صح وتربية سليمة دول هايتملوا أمراض نفسية وهايكبروا يبقوا نسخة تانية منكم للأسف...

⚠اثني عشر.. خلينا اصحاب.. النص حالة.. احنا ننهي قصة الحب اللي بينا بس نفضل على تواصل.. بتتحرم من العلاقة نفسها ومن حلاوة أي علاقة جديدة.. والحل زي حماقي ما قال بالظبط لو هاتمشي امشي حالاً.. لو فضلتي ماتبعديش!!

⚠ثلاثه عشر.. التأجيل.. لما..بتأجل فرحه وفرصه وأحلام لما.... أي حاجه تحصل ولما بتاخد معاها من عمرك كتير وبتفضل هي معاك.. إحسم ما تأجلش!

⚠اربعة عشر.. انا مش لاعب... دي للإبن اللي بيساوي عند أهله مجموع درجاتة.. حبهم ليه مشروط بنجاحه وتفوقه بيبدل أحلامه بأحلامهم وفجأة عقلة الباطن يقرر ينتقم من أهله في نفسه ويفشل ويتحول لمريض نفسي!!

⚠خمسة عشر.. الإسقاط أو قلب الترابيزة إستبدال انا بإنت بغيري عموماً بدل ماتعترف بخطأك وتواجه نفسك بتهرب وتنكر وتلوم غيرك..

⚠ستة عشر.. السخرية والإستهزاء اهانه غيرك لإنك محروم من الحاجه دي وممكن تكون في أشد احتياجك ليها بس تسخر من اللي بيعملها يحبطك وييإسك من علاقتك من شغلك من دورك من لبسك من مشاعرك.. ناس بتعوض نقصها بأذية الناس!!!

⚠سبعة عشر.. إستغلال نقطة ضعف اللي بيحبك استغلال حبه ليك عشان تنفذ طلباتك استخدام ضعفك ودموعك او تبعد عنه وتهدده عشان توصل لهدفك ..

هاااابعد كل ده.. لقيت مين تعرفه موجود هنا؟؟طيب لقيت نفسك مين فيهم؟؟؟ لكل اللي كان بيلعب بينا وبنفسيتنا بكامل وعيه عمدا ً.. إنت إتكشفت ‼واللي كان بيلعب بدون وعي.. أديك فهمت ووعيت.. وأول خطوه تعملها إنك ماتنكرش اللي حصل وإن عندك مشكله حقيقة محتاجه علاج...

أوعي تعمل نفسك بطل وتنكر وتثبت للناس إنك تمام زي الفل وتدي نفسك مسكنات... أوعي.. إنت كده هاتروح لحالة أسوأ..انت محتاج تعرف وتعترف إنك إما مريض نفسي أو علي مشارف المرض النفسي اللي يشبه الأمراض الجسدية كل ماعالجتها ولحقتها في البداية هاتعيش في سلام ووقاية من المرض ولو أهملتها هاتتفاقم وتسوء..

المرض النفسي لا هو عيب ولا عار ده شيء عادي وارد يحصل لنا كلنا بدرجات.. هايبقي الحال إيه لما اللي لا اختارتهم ولا إختاروك بتإذيهم أو بيإذوك زي أب أم أخ أخت إبن واللي اخترتهم بكامل إرادتك واختاروك برده بتإذيهم أو بيإذوك حبيب زوجه صديق.. أين المفر ‼ نعيش على كوكب تاني ‼ولا نواجه ونتصالح مع نفسنا ومع الناس.. إحنا محتاجين نرحم نفسنا ونرحم بعض..محتاجين نفكر من أول وجديد..