مرحلة التوجيهي مرحلة مفصلية في حياة الطالب العربي بشكل عام والطالب الفلسطيني بشكل خاص، لماذا؟
مبارك لكل طلاب التوجيهي الرائعين🌸
اللي ما نجح قبل اللي نجح لانه بالنهاية كلهم تعبوا واحنا اليوم بنهنّي كل طالب تعب بغض النظر شو كانت النتيجة
كلنا عارفين قديش كانت سيئة ظروف هالسنة ووالله اللي نجح منهم نفد بأعجوبة واللي ما حالفه الحظ هالمرة بكون حظه بمكان تاني أحلى وأعظم وأفضل اله وبرضه هو محظوظ لحد هلأ الحمدلله يملك صحة جيدة وعيلة بتحبه وناس خايفين عليه وهاي نعم ونجاحات أعظم بمراحل من نعمة النجاح بسنة "لا تقدم ولا تؤخر لللأسف" .. ليش بقول هيك بعد ما صرت أعتبر خريجة حالياً؟
لانه المعدل هاد للأسف عدد كبير جداً من هدول الطلاب اللي بطمحوله ماعندهم هدف معين بعد المعدل اللي ماقدروا يحصلوا عليه .. يعني عدد كبير بس بده يجيب معدل عالي بدون سبب ولا حلم للمرحلة التالية لهالمعدل، برأيي فقط احزن لما معدلك ما يدخلك تخصص حلمت فيه من صغرك
واحزن مش تنكد عحالك وتدخل حالة اكتئاب لفترة طويلة، احزن بالقدر الكافي للحزن واعرف انه ربنا ما اخترلك الا الخير وما أبعدك عن هالتخصص الا لانه عارف انه ما بناسبك او مافيه الخير الك .. ومين عارف ممكن حتى بعد سنين تقدر ترجع تدخل التخصص اللي حلمت فيه أو تلاقي خيط يوصلك اله بدون حتى المعدل هاد🙌للطلاب اللي نجحوا وبدهم يدخلوا الجامعة ويكملوا بالسلك التعليمي الجامعي، نصيحة أخوية اوعوا تدخلوا الا اشي انتوا مقتنعين فيه مش لاشي بس عشان كمان كم سنة بس بدكم تسبوا عاللي دخلكم هيك تخصص تسبوا عحالكم 😁، اسألوا شو بلزم لسوق العمل أولاً مش مين التخصص الاسهل ولا اللي الجامعة بدها تعبيه طلاب
جامعة النجاح مش أعظم جامعة بالكون وربما غيرها أفضل منها وهذا لا يعني انها سيئة بهذا القدر اللي بحاولوا الطلاب دايماً وأنا منهم نوصلها للطلاب اللي بعدنا ..
ممكن أنا ما ناسبتني ظروف الجامعة أو مريت بتجارب سيئة فيها بس هاد مابعني انها سيئة بهالقدر أو انها رح تكون سيئة عالجميع وهيك كل الجامعات .. اصنع مكانك بايدك واختار تخصصك بشغفك واوعى تروح مهندس عشان الوالد هيك حابب رغم تعبه عليك واحترامك الكبير اله بس بالنهاية انت اللي حتتعب بالتخصص وانت اللي حتكمل حياتك فيه في حال استمريت بالشغل بنفس المجال ..
عادي جدا تكون ناجح توجيهي وماتكمل جامعة مش دائماً بكون هالفرق الكبير بالحالتين سوى سنين بتضيع من عمرك اعرف اختار صح وفكر كتير هاد مستقبلك لحالك انت الأحق باختياره ..
خلوا التوجيهي بداية الطريق مش نهايتها والله يبعتلكم أيام أحلى وأنجح وأكثر استقرار من أيامنا♥️
التعليقات
👌🏼👌🏼
حبيتت.