علشان نزود مساحة الأمان لنفسنا وللناس الي حوالينا محتاجين نخلي كل مشاعرنا غير مشروطة!
لازم نفهم حاجة مهمة جدا🙏
إن (السهل) بالنسبة لنا ممكن يكون (صعب) بالنسبة لحد ثاني والعكس...
الحاجات الي إحنا (شاطرين) فيها غيرنا شاطر في حاجات ثانية
إن (مشاعرنا) مش زي بعض
طريقة (تفكيرنا) مش زي بعض
(ضعفنا/قوتنا) إتجاه إرتكاب الأخطاء مش زي بعض
الحاجات الي(بنخاف) منها مش زي بعض
(طبيعة) و(ظروف) كل واحد مختلفة تماما عن الثاني
تجاربنا ،(أهدافنا) و(رحلتنا) في الحياة مختلفة
(المعتقدات) ، (القيم) و(الأولويات) في حياة كل واحد فينا مش زي بعض،
طيب، دا يفهمنا ايه؟
إن كل واحد إستقباله للحياة مختلف تماما! ف ماينفعش أشوف كل الناس من (نظارتي) أنا بس،
لا نحكم علي حد ولا نقلل من مشاعر حد، ولا نقلل من قيمة أحلام حد، ولا نستهيف الحاجة المهمة بالنسبة له، ولا نستنكر علي فعل هو عمله ،ولا نشوف نفسنا أحسن من حد، ، ولا ننقد حد لمجرد إنه مختلف عننا، ولا نستسهل حاجة صعبة علي حد....إلخ.
🌟وعلي النقيض من دا تماما، دا المفروض يزود عندنا قدرتنا علي التعاطف والتفهم
ويعلمنا حاجة مهمة جدا ،ممكن تكون أهم حاجة بين البشر وهي الحب (الغير مشروط)
التقبل (الغير مشروط) ؛مش لازم تبقي زيي علشان أتقبلك
الدعم (الغير مشروط) ؛مش لازم اكون متفق معاك ومقتنع علشان أدعمك وأشجعك
مش لازم أحس نفس إحساسك علشان أقدر مشاعرك
مش لازم يكون عندنا نفس طريقة التفكير علشان أحترم افكارك وآرائك
مش لازم يبقي عندنا نفس الأولويات في الحياة علشان نفرح لبعض
مش لازم تكون قيمك ومعتقداتك هي هي قيمي ومعتقداتي علشان أفهم ليه الحاجة دي مهمة بالنسبة لك!
ومش لازم أكون مصدق في أحلامك علشان أقدرها وأصدق إنت شايفها مهمة ازاي من عندك...وهكذا💙
ياريت نزود شوية تعاطف و حب وتقبل ودعم ((غير مشروط)) في حياتنا 😊💓
![[ هَكَذا نَحنُ || لَم نُخلَق لنَتشابَه ]](https://cdn.molhem.com/public/articles/7594/small/1623306968678251338-7594.jpg "[ هَكَذا نَحنُ || لَم نُخلَق لنَتشابَه ]")
التعليقات