تعريف عن المدونة

دعوة اننا نعيش حياة بجودة أعلي وبتناغم مع نفسنا الحقيقية

تخيلوا معايا 🥰 :")

ان كل حد فينا عايش حياة بتعبر عنه، متناغمة مع كيانه ومع الي نفسه يوصله ويحققه، حياة ب نية وهدف وإتجاه حياة فيها توازن وسلام داخلي، عايش القيم والمعاني الي بتهمك وبتفرق معاك، بتستمتع بالرحلة قبل الوصول,

١. تكون "روحك" موصولة بالله ،ومفعل علاقتك الخاصة بيه فعايش معاه وحاسس بيه معاك في كل لحظة، فمعرفتك بالله بتزيد كل يوم وبتعبده عبادة صحيحة بالقلب وبالجوارح، مش وقت الصلاة بس لأ وكمان طول اليوم في كل حاجة بتعملها وفي كل حاجة في الكون، والروح المتصلة بالله هي المحور الأساسي لكل حاجة بعد كدا

٢. "عقلك" بيتملي بعلم ومعارف كثير محتاج لها في رحلتك في الحياة

٣. عقليتك إيجابية، "أفكارك" إيجابية ومبدعة ، والأفكار بتأثر علي جزء كبير جدا من تصرفاتنا في الحياة

٤. بتزكي "نفسك" وبتتصف بصفات الله وبتتخلق بأخلاق النبي فعلاقاتك كلها بالناس وبالحياة وبنفسك تتحسن ١٨٠ درجة

٥. بتطهر "قلبك" وبتخليه جاهز لإستقبال المعاني ،وبتزود حدسك وبصيرة قلبك والإحساس المعنوي والتذوق عندك

٦. بتزود "الوعي" عندك فبالتالي تعيش حياة فيها تنوير وتطور و ووعي بالذات وتشوف كل حاجة علي حقيقتها الأصلية

٧. تعبر عن "بصمتك" في العالم ، تكون نفسك الحقيقية الأصلية وتعبر عنها بحرية ،تكتشف العطايا والهبات الي ربنا خلقها جواك وإختصك بيها ، تعرف شغفك وقدراتك الخارقة، ويبقي معاك أدواتك المميزة في الحياة الي هتساعدك تعيش حياة شبهك يكون ليك فيها أثر وتعبير فريد ، تكون في حالة تدفق وإبداع في مجالك الي بتعمله بحب وتكون شخص ملهم للي حواليك ، تعرف إنك مش محتاج تتغير أو تكون أي حد غير نفسك، كل المطلوب منك تكتشف نفسك ، تكون نفسك وتتطور مش تتغير، فتعيش بأحسن نسخة منك في كل يوم جديد.

والإنسان بيتكون من كل العناصر دي (من روح وقلب ونفس وعقل ووعي ومنظومة أفكار وبصمة طاقية)

ودا كله بيتجلي في حياة كل واحد فينا وبيكون له تأثير كبير جدا علي شكل حياته و القرارات والأختيارات والتصرفات وردود الفعل،

‏وفي علاقتنا بربنا وفي العلاقات الي بيننا وبين كل الي حوالينا وفي علاقتنا بنفسنا وفي علاقتنا بأحداث الحياة وإزاي وبنتعامل معاها.

وهدف المدونة إننا في كل مرة هنتكلم وهنغذي جانب أو أكثر من الجوانب دي،

في كل مرة هنكتشف مع بعض معلومة أو موضوع أو فكرة تساعدنا في التطور

وهنتكلم عنها في ٣ محاور

‏١. الشرح والتوضيح

‏٢. خطوات عملية للتطبيق في حياتنا

‏٣. أمثلة عليها