كل حدا بهالدنيا بنولد وفي جواته شغف، والشغف هو الإشي اللي لو تضل ليل نهار تعمله مستحيل تمل او تتعب منه.
كل حدا بهالدنيا بنولد وفي جواته شغف، والشغف هو الإشي اللي لو تضل ليل نهار تعمله مستحيل تمل او تتعب منه، بل على العكس تماما بتحس بأنه بمدك بحيوية وطاقة رهيبة .. بالنسبة الي شغفي هو الكتابة.. ما بعرف شو طبيعة العلاقة اللي بتربطني بالكتابة بس بحس بأنه روحي بتتحرر لما ابلش اكتب.. بحس انه ما حدا قادر يوقفني من اني اعبر عن رأيي وعن كياني وافكاري..
بعدك مش مقتنع ؟ طب خليني اقنعك..
عمرك بلشت تكتب والورقة حكتلك خلص يا زلمة بكفيك كتابة وجعتلي راسي؟ او مثلا تحاورت مع الورقة وحكتلك بكفي فلسفة.. القلم والورقة هم اعز اصدقائي .. بحس انه الكتابة بتحطلي جناحات وبتخليني احلق بسماء أفكاري بدون اي قيود تربطني لانطلق بهالحياة زي العصفورة الطايرة من سماء لسماء بكل حرية. بحس عندي كتير افكار محبوسة بعقلي بتستاهل انها تتحرر وانه العالم يسمعها لأنه ياما كان في حكي جواتنا وما قدرنا نعبر عنه.. انا قررت ابلش هالمدونة لأعبر عن دواخلي وعن افكاري وكمان لأنقل الكم المعرفة اللي عندي بمختلف جوانب الحياة من خبرتي المتواضعة فيها .. رح تهتم هاي المدونة بمختلف حقول المعرفة من تطوير الذات ،والوعي وكمان بمجال التربية كوني أم بتسعى لتربية جيل واعي بما فيه الكفاية ليقدر يتكيف مع هالحياة مع صعوباتها ومطباتها...حابه انه تكون هالمدونة بمثابة الفراشة اللي على الرغم من خفتها الا انها قادرة تأثر بالناس.. واخترت ابلش كتابة بالعامية لعلها تلمس ما بداخلك ولتكون اقرب لقلبك وعواطفك وهذا لا يعني اني ما رح اكتب بالفصحى بل على العكس تماماً انا درست اللغتين الاسبانية والانجليزية وكل ما تعمقت باي لغة اجنبية زاد حبي للغتي الأم ولجمالها وبلاغتها في التعبير واكيد بيسعدني اساعد بزيادة المحتوى المُلهم باللغة العربية على الانترنت .. يعني باختصار رح تكون هالمدونة بمثابة كلام من القلب.. للقلب وتجارب مفيدة ممكن تحفزك لتحقق احلامك.
التعليقات
بالتوفيق إن شاء الله