عندما لا يكون لديك مكان أو شخص تنتمي اليه، عندما لا أحد يشبهك
عندما لا تنتمي
في أماكن أول ما بتدخلها بتحس أنك لا تنتمي اليها
وفي أشخاص لما تبدأ تتكلم معهم تحس أنهم مش شبهك
وده بيحصلي طول الوقت
عمر ما حصل توافق بين الاثنين المكان والناس
يا الناس متشبهنيش
يا المكان ميخصنيش
وبيصادف أحيانا الاثنين في ذات اللحظة لا المكان ولا الناس
أنتم أكيد عارفين دور الام صعب ازاي
دائما بتفكر في أولادها
في أي مكان ومع أي حد
هتسمعها دائما تقول "انا ابني الكبير هيحب ده اوى، انا بنتي هتستمتع هنا جدا"
طول الوقت أولادها في بالها
ده بقي يشبه دوري في الحياة
انا دائما الام
في اي مكان بدخله دائما بيكون مناسب لحد ثاني اعرفه
أي شخص بتكلم معه دائما بيكون شبه حد ثاني اعرفه
وأفضل اقول من جوايا لو فلان هنا كان هيفرح اوي
لو فلانه هنا كانت هتبدع جدا
انا معرفش ايه السبب؟
وليه ده دائما بيحصل معايا؟
لكنه عمره ما كان شعور كاذب
بل هو احساس حقيقي جدا
لأنه كثير بيكون نابع من الناس اللي حوليا
زي تيار الهواء مليش يد فيه
لازم أقف امامه واستحمله
هل ده بيحصل مع ناس غيري؟
مكتوب على كل انسان أنه يقضي فترة من حياته
يبحث عن موطن يحس من خلاله بالأمان
يا في مكان يا في اشخاص
ولو محظوظ بيعرف يوصل للإثنين
وغالبا مرحلة البحث بتستمر للأبد
لكنها مش معدومه
بتتحرك مش ثابته
وفي الاخر بيوصل للنتيجة
بيوصل للموطن والامان
في حالتي مرحلة البحث مستمره
لكنها بدون نتيجة
أكيد في حل في النهاية
أو مفيش
التعليقات