فى مفاتيح كتير للنجاح بس الصبر اهم حاجة فيهم. فى ناس كتير عايزين كل شيء فى نفس الوقت .



حتى الأشياء البسيطة فى الحياة اصبح ناس كثيرون لا يستطيعون الإنتظار أو الصبر عليها مثلآ الإنترنت بطئ ، الرسالة لم تصلني وقتها ، توصيل الطلبات إتأخر ، الطريق زحمة.


أنا اعتقد ان توقع نتائج فورية بيشكل خطورة على مستقبلنا. عدم صبرنا بيمنعنا نحقق احلامنا و نضيع الفرص اللي فى إيدينا و دة السبب اللى بيخلينا ندور على أهداف سريعة و لو الطريق طويل و محتاج مجهود كبير ناس كتير بتستسلم.


فى الحقيقة الناس اللى حققت نجاحات كبيرة طريقهم كان طويل و فشلوا كتير أوى و كان عندهم صبر كبير إنهم يعملوا خطوات بسيطة فى سنين كتير .


من الصعب أن تتخيل إن مايكل جوردن تم فصله من فريق مدرستة الثانوية و إنه أخفق فى أكثر من ٩٠٠٠ رمية و إن فى خلال مسيرتة خسر حوالى ٣٠٠ مباراة منها ٢٦ كان واثق إنه هايفوز برميه واحدة نحو السلة .مايكل جوردن وصل إنه يكون أفضل لاعب في العالم بعد فشل كتير و صبر على النجاح.


صعب جدا إنك تصدق لما تتفرج على أفلام ديزني إنه اترفض قبل كدة لما كان عنده ٢٢ سنة واتفصل من الجريدة اللى شغال فيه علشان مش مبدع بعد كدة أثبت العكس و كسب أكتر من ٣٠ جائزة أوسكار عن أفلام الرسوم المتحركة اللى شارك فيها.


فشل و صبر و محاولات ٧ سنين. كل الأطباء كانوا بيقولوا إن مستحيل طبيآ إنى أرجع طبيعي. طرد عكسي مزمن(حرب بين النخاع العظمى الجديد و الجسم)، علاج كيماوي، ٧ سنين كورتيزون و هو دواء بيضعف العضلات ة و يعمل هشاشة فى العظام و بيزود المياه و السكر فى الجسم ، وزنى وصل ل ١٤٠ كيلو ، مشاكل فى الكبد و الكلى و الجلد و توقف الجهاز الهضمي و أخيرا غرغرينا فى اليد و لا يوجد حل غير البتر .كنت دايما بدور على أى أمل أو شخص رجع للرياضة تانى و ماكنتش بلاقي حد ، الصورة الوحيدة اللى كانت أمامي إنى هاكمل حياتى على كرسى و هاكون عاجز و إن حلمى إنتهى و لكني لم أيأس .فضلت أحاول ٧ سنين كل لما أخد خطوة إلى الأمام ارجع ١٠ خطوات إلى الخلف. فى الآخر نجحت و كسبت الحرب و أصبحت أول رياضى فى العالم يعود للتنس بشكل إحترافى بعد عملية زراعة النخاع العظمى اللى هو كان أخطر من السرطان بقيت أمل لناس كتير علشان تصبر و ماتستسلمش مهما كانت الظروف ضدها.


الإستعجال و عدم الصبر يؤدي الى الفشل و القرارات الخاطئة.

النجاح دايما بيروح للناس الصبورة المتحمسة لأهدافها و عارفين إن الفشل مرحلة مؤقتة.



إنتظروا الفيديو الخاص بالمقالة كل يوم ثلاثاء الساعة ٧ بتوقيت القاهرة



الحاجة الوحيدة اللى تخلى حلمك مستحيل هو الخوف من الفشل.


إقرأ المزيد من تدوينات أنور الكمونى

تدوينات ذات صلة