حديث جميل و مختصر عن بعض الأعمال الصغيرة في الحياة التي ستجلب منافع كبيرة , و كيف تبدأ مشروعك الخاص.
اليوم رح احكي بالعامية لان الموضع شوي مختلف، و هو تابع لموضوع أين روبن هود اللي كتبتو قبل فترة.حل معضلة روبن هود هو انك تبدأ تعملك شغلة تطلع منها قرشين.
كيف؟
الحديث دايما بس يجتمعو الصحاب مع بعض هو دايما عن الطفر و عن الوضع الاقتصادي الصعب، و في كثير من الشباب بكون عندوا فكرة و مش عارف يبداها لانو ما عندو راس مال عشان بدو المشروع يكون كبير، بس حتى لو كان المشروع كبير هل عندك القدرة لإدارة هيك مشروع؟
عشان هيك رح أخوض بتفاصيل مختلفة و بعناوين مخلتفة عشان اقدر اوصل المعلومة بشكل صحيح و لائق.
- محل الشاورما و الكوفي شوب:
كثير سمعنا و احنا قاعدين مع أصحابنا عن فكرة محل الشاورما و الكوفي شوب بحجة انو اكيد المشروع رح ينجح، و بصراحة تعرفت على ناس فتحت محل شاورما و خسرت لأنهم ما بعرفوا عن المطاعم و ادارة المطاعم و شو مشاكل ممكن تواجهك بس تفتح مطعم و نفس الاشي الكوفي شوب.هون قبل ما تبدأ مشروعك لازم تخرج من دائرة انك تعمل شغلة بتحبها، و تفصل بين شو الشغلة اللي بتحبها و شو الشغلة اللي انت ضليع فيها.
على سبيل المثال انا شغفي و حبي الفنون القتالية، و لكن انا ضليع في الإدارة و التحليل. منطقي اني افتح نادي فنون قتالية؟ او المنطقي اكثر اني اعمل مشروع خدمات إدارية و استشارات؟بعرف المنطقي اكثر اني اعمل مشروع خدمات إدارية و استشارات، بس برضوا رجعت دخلت بموضوع راس المال اللي هو بالاصل دائما عقبة عند الكل.
طيب ما دام المشاكل نفسها شو الحل، رجعنا على راس المال اللي مش موجود و ما استفدنا؟
لا عزيزي القارئ،
الحل موجود بكلمة وحدة، طقطق.
- الطقطقة:
كيف يعني طقطق؟ و ليش اطقطق؟الطقطقة انك تشتغل شغلة انتا بتحبها بدخل إضافي تكون سند الك بدفع فواتيرك و تغطية مصاريفك.
زي ما حكيت قبل انو انا بحب الفنون القتالية، فمش غلط اروح اتدرب لحد ما يصير عندي القدرة اني اكون ضمن المنظومة التدريبية للنادي اللي انا تدربت فيه و ادرب فنون قتالية في وقت فراغي بدخل إضافي و بقدر بنفس الوقت اشتغل بالويكيند بعمل استشارات إدارية لشركات صغيرة و ناشئة سواء بالمبيعات و التحليل او الإدارة.
ممكن اشتري و ابيع منتجات موسمية، مثلا موسم زيت الزيتون بتروح بتشري اكم تنكة زيت و بتبيعهم بربح بسيط.
- شو الفكرة من الطقطقة؟
الفكرة انك تتعلم كيف تنظم وقتك و تتعلم كيف ممكن تستغل كل ايام الاسبوع. توفر على نفسك و ماتدفع من راتبك، خلي راتبك ما تصيبو و اصرف من الطقطقة. لقدام رح تعرف تحسب معادلات ربحك و خسارتك و مصاريفك التشغيلية لأنك عشتها. رح تفتح لحالك أبواب جديدة من خلال المعارف اللي رح تحتك فيهم خلال عملك الخاص. انت بس تعرف خبايا و أسرار طقطقاتك، رح تحول هاي الطقطقة لمشروع ريادي متكامل.
شو بتستنا؟ روح لاقيلك شغلة طقطق فيها.
- قصة طقطقة:
صديقي الي موظف بشركة، و قت فراغه بصنع يدويا سكاكين.فكرة عادية و بسيطة و لكنها طقطقة.
- الربح و الخسارة:
طالما انت بتطقطق ما تفكر بالربح و الخسارة قد ما تفكر انك تطلع مصاريفك و تدفع الفواتير اللي عليك.
و بحب انهي بمقولة انا بحبها:"اذا بدك تصير مليونير، لازم تكون عندك عقلية المليونير"
التعليقات