علم النفس بالمصري - الإنطواء و الإنبساط

الفرق بين الشخصية الإجتماعية و الشخصية الإنطوائية

الفرق بين الشخص الإجتماعى و الشخص الإنطوائى فى علم النفس

فى البداية تعالوا نشوف مجتمعنا شايف الموضوع ازاى ، لما حد بيقول كلمة إنطوائى اول حاجة بتجى فى دماغنا ( شخص حزين قاعد فى ركن مظلم مُنكب على كتبه فى وحدة و صمت ) , أما كلمة إجتماعى فـ يحضر فى ذهننا (شخص يجلس برفقة مجموعة كبيرة من الناس يتبادلوا الحديث فى اريحية تامة) . و دى الصورة الذهنية الى وصلتنا من خلال شاشات السينما و التيلفزيون. هتلاقى دايما بطل الفيلم شخص إجتماعى محبوب محاط بشلة كبيرة من الصحاب سواء كان فى منطقة ثرية او منطقة فقيرة شعبية , اما الشخصية الذكية ذات الطابع الهادئ فغالبا هتكون الشخص المنطوي.

فى علم النفس

فى اوائل التسعينات كده ، بدأ علم النفس يتطور كعلم منفصل و بدأ كارل يونج يكتشف تفاصيل سيكولوجية الشخصية و يتوصل لمفهوم الإنبساط و الإنطواء . يونج قال ان العامل الأساسى الى بيفرق بين الشخص الإنطوائى و الشخص الإجتماعى هو الإجابة على السؤال ده ( بتلاقى طاقتك فين ؟ ) . الشخص الإجتماعى طاقته بيلاقيها بمساعدة مصدر خارجى اما الشخص الإنطوائى طاقته داخلية بيلاقيها بإختلائه مع نفسه.

كارل يونج رفض تصنيف الأشخاص كإنطوائيين او إجتماعيين بشكل صريح و قال ان كل شخص فينا فيه الخاصيتين و لكن قد تغلب واحدة عى الأخرى فى النسبة.

There is no such thing as a pure introvert or extrovert. Such a person would be in the lunatic asylum. Carl Jung

الفروق فى الشخصية بين الإنطوائى و الإجتماعى

المواقف الإجتماعية

تخيل معايا حفلة او اى مناسبة إجتماعية فيها تجمع كبير .هتلاقى الشخص الإجتماعى منغمس جدا و عايش اللحظة بكل تفاصيلها ، الشخص الإنطوائى هيكون مبسوط برده لكن طاقته هتقل و هيبقى عايز يمشى بعد مدة قليلة .فى عام 1938 العالم أبرنيثى عرف الشخص الإجتماعى و قال " هو شخص يدخل فى النقاشات و الأنشطة الإجتماعية بثقة و إهتمام بشكل واضح و صريح لكن لا يجيد التنظيم و لا الملاحظات الدقيقة"اما الشخص الإنطوائى " فهو شخص اقل من المتوسط فى التفاعلات الإجتماعية و اعلى من المتوسط فى التفكير و الملاحظة و التحليل".

التواصل

هتلاقى الشخص الإجتماعى بيتكلم اكتر بصوت اعلى و بيستخدم إيماءات اكتر و بيتحرك كتير و هو بيتكلم ,

كمان هتلاقيه بيستخدم التواصل البصرى بنسبة اكبر من الشخص الإنطوائى و يتمتع بنسبة اكبر من الثقة فى الكلام .

إتخاذ القرارت

فى وقت الضغط هنا الإنطوائى منطقى اكتر ، لأنه بيفكر كويس قبل ما ياخد اى قرار و بيعتمد على المعلومات الى قدر يجمعها مسبقاً .

بينما الإجتماعى هيخد قرارات سريعة بناءاً على الى هيحسه فى اللحظة و هيحتاج دعم من شخص تانى اما الإنطوائى هيتجنب سرعة إتخاذ القرار و هيعتمد على نفسه كليا.