تخيل ممكن تقابل حب حياتك بطريقة غريبة زي فايكنج وباولينا ..
عرفاكوا بتحبوا الحاجات دي أوي..
وانا كمان ..
في السويد سنة ١٩٥٤ كان فيه بحار من شاب إسمه Ake Viking..
فايكنج ده كان عازب مش مرتبط ومش لاقي بنت يحبها لأن طبيعة شغله كبحار بيقعد بالشهور في البحر تخليه ميقابلش بنات أصلاً
وده غير انه ماكانش شايف نفسه وسيم أوي.. وفي يوم من الأيام في نص رحلة بحرية كدة كان مكتئب وحاسس بالملل
طلع قلم وجاب ورقة كتب فيها:
"للبنت الجميلة البعيدة، أكتبي لي أياً كان إنتِ مين" وقام ماضي بإسمه وحاطت عنوانه
حط الورقة دي في إزازة وقفلها كويس ورماها في البحر وكمل شغله ونسي الموضوع خااالص..
سنة ١٩٥٦م في صقلية _ إيطاليا، بنت عندها ١٧ سنة إسمها Paolina أبوها صياد سمك كان بيصطاد في يوم
ولما سحب الشبكة لقى إزازة مقفولة جواها ورقة،. مفتحهاش وراح واخدها لبنته باولينا..
البنت فتحت الرسالة مفهمتش حاجة لأنها بلغة غريبة ..تاني يوم الفضول خلاها تاخد الرسالة وتروح الكنيسة تسأل الكاهن عن اللغة دي،
قاللها دي لغة سويدية..
باولينا جابت قاموس سويدي وبدأت تترجم بالراحه كدة لحد ما فهمت،
وقررت تكمل اللعبة دي وتبعتله رد وتشوف أخرتها إيه،
فايكنج في يوم بعد ما رمى الإزازة بسنتين ونص، رجع بيته لقى في صندوق بريده جواب عليه ختم صقلية،
فتحه لقاه بالإيطالي إستعان بصاحبه يترجمهوله، لقى مكتوب فيه إنها لقت الإزازة على الشط من كام يوم ..
وإنها مش جميلة أوي بس مستغربة إن الإزازة تسافر كل المسافة دي عشان توصلها تحديداً فا قررت تجاوب،
طبعاً فايكنج استغرب جداً ،. لدرجه إنه شك إن حد بيضحك عليه وده متوقع، بس ملقاش قدامه غير إنه يبعتلها ويجرب،
وعلي مدار سنتين كمان كانوا بيبعتوا جوابات لبعض فيها أوصافهم وعاداتهم وكده،
وبعدها بعتوا صورهم لبعض، وصارحوا بعضهم بحبهم لبعض.
سنة ١٩٥٨م سافر فايكنج لصقلية، وقابل باولينا وقصتهم اتشهرت في أوروبا وأمريكا وقتها ولفت العالم،
واتجوزوا جواز ملكي بحضور كل اللي مهتمين بالقصة الغريبة دي وتشجيعهم،حتى إن فرحهم كان بيتذاع في السينمات والقاعات بإسم" Love in a bottle"
وده لينك مقطع للفرح: https://youtu.be/d9VQvkFI1Ak،
واتجوز حب حياته وخلفوا وعاش معاها باقي حياته.. رغم اختلاف اللغات والبلاد إيطاليا والسويد إلا إن نصيبه جاله بأغرب طريقه ممكنه،
عن طريق ازازة في عرض البحر بس برده لقاها في النهاية..
أوعى تفقد الأمل..
التعليقات