إجازة أبوه

كتير من الأمهات بتعاني من الأدوار الثانويه لشريك حياتها.. وبتقوم بدور البطولة لوحدها!

هو قرار الإنجاب قرار فردي؟ هو الأب دوره بس إن إسمه يجي بعد إسم إبنه في شهادة الميلاد؟ ولا هو بس الATM في حياة أسرتة؟

طيب ليه كتير بنسمع الجملة الشهيرة "طبعاً يا هانم ماهو تربيتك!!"؟

طيب هو المدرسة والحضانة والدكتور والنادي والمذاكرة والهموم والمشاكل على ماما بس طبعاً ممكن تكون بتشتغل أصلاً وغير شغلها في البيت؟؟

طبعاً في البداية أحب أقول إن كلامي (بدون تعميم كالعاده).. بس للأسف النسبة الأكبر من المجتمع بتجبرك تسأل الأسئلة دي..

وده لأن الأم بتتحمل عبء كبير جداً من المسئولية لوحدها بتقوم بدور البطولة في حين إن الأب علاقتة بالبيت والمسئوليات شكليه..

ضيف شرف.. اللي أثار الموضوع ده عندي موضوع " إجازة الأبوه" واللي أكيد في كتير مننا آخره يسمع عن إجازة الوضع..

والإجازات التانية اللي معظمها إهدار للوقت وبس ..

إجازة الأبوه أو الإجازة العائلية.. ودي الأب بياخدها بمجرد ما مراتة تضع " تولد بالبلدي يعني"..

ونتائج البحث عن الدول اللي بتطبقها أسفرت عن الآتي: في فرنسا سنتين بدون مرتب.. أسبانيا 16 أسبوع مدفوعه الأجر.. السويد 480 يوم،

النرويج 46 أسبوع،الدول العربية بقي لبنان والإمارات والأردن 3 أيام وتونس يوم واحد والحمد الله

ويقال إنها ماتنفذتش في لبنان.. طبعاً الفرق واضح وملحوظ بين الدول الغربية والعربية..

طيب الإجازة دي إتعملت ليه أصلاً.. كل علماء النفس والأبحاث قالت إنها بتتيح للأبوين إنهم يقسموا ويوزعوا الأدوار مع بعض

وإن الأب يحس بأهمية وجوده ودوره.. في دراسة أمريكية بتشير إلى إن 99% من الموظفين في الشركات اتفقوا إن الإجازة دي

بترفع من معنويات العاملين والعاملات وليها أثر ملحوظ على ربحية الشركة.

تاني دراسة قدمتها جامعة هارفارد عن الإجازة بتقول إنها بتحسن من صحة الطفل النفسية ولما بيكبروا بيعاملوا أولادهم بعناية أكبر..

وبتقوي الترابط الأسري وبتخفف نسبة اكتئاب مابعد الولادة.

عالم النفس جاك لاكان مؤلف كتاب Name of the Father أكد إن الأب دوره كبير جداً ومهم جداً

وده لإنه بيفرض الحدود في ذهن الطفل اللي بتخليه يندمج مع الناس والمجتمع وبتمنعه من إرتكاب الأخطاء

وبتخليه يكون مستعد لمواجهه الحياة لوحده بعيداً عن حياة "النشوه المطلقة" اللي عاشها في أحشاء أمه.

من الآخر انا لا مع الإجازة دي ولا ضدها.. لإن أهم ما في الموضوع كله هو الأب الزوج يكون فاهم وعارف دوره كويس حتي لو من غير إجازات أصلاً ..

يبقي فاهم إن الأم لو ربه منزل فهي عندها شغل جوه البيت ومسئوليات وهموم يمكن تكون بتداريها عنه..

الأب الزوج يكون متأكد إن وجوده في حياة أسرتة وتربية أولاده أهم بكتير من انه يقول انا باصرف عليهم كويس..

أو إنه يقول لمراته إتصرفي انتي.. روحي لوحدك ويتنصل من مسئولياته.. هي حياة مشتركة ومسئوليات مشتركة..

والأب الزوج اللي إنفصل عن زوجته يكون فاهم إن مش دي النهاية وإن في أولاد ملزم بالتكفل بمصروفاتهم وتربيتهم

وإن مشاكله مع زوجته سابقاً مهما كانت ماتخصش الولاد في شيء..

يبقي فاهم إن الطبيعي هو وجوده ولعب دوره أما العكس فهو مش طبيعي إطلاقاً.. مش كده ولا إيييييه "بصوت فؤاد المهندس".