هل فعلا مخاوف الأطفال حقيقية!! هل هذه المخاوف طبيعية ولا لأ؟
هل فعلا مخاوف الأطفال حقيقية؟
هل اللي بيخاف منه الأطفال ممكن يكون فيه خطر على حياتهم!!
خوف الطفل يبدأ عابر ولكن سوء التعامل معاه يحوله إلى دايم، ويؤثر على حياته.
معظم الأطفال في فترة ما خلال سنوات طفولتهم يمروا بالخوف، ويأتي على رأس مخاوفهم:
- الظلمة.
- الوحوش.
- الثعابين.
- الأقنعة.
- الغرباء.
- وحتى المكنسة الكهربائية.
غالبا ما يسأل الأهل هل المخاوف ديه طبيعية ولا لأ ؟!
-نعم كل مخاوفه طبيعية تماما....
الخوف في حد ذاته شعور يساعد الإنسان على التكيف ويحميه من الخطر وبيعلمه كثير، كما يعتبر خوف الطفل دليل على تطور عقله الصغير، كونه يتخيل ويتوقع سيناريوهات مختلفة،المشكلة في أن معظم خيالاته بتكون مش حقيقية، كون عقله لا يملك الحكمة والخبرة الكافية للربط والتقييم.
-إذن مفيش داعي للخوف على طفلك، الخوف مش المشكلة، ولكن طريقة التعامل معه هي التي تحدد لو كان هيبقى ولا هيزول، فالخوف يبدأ عابر، وسوء التعامل معه ممكن يجعله خطر، إذن أنت مش مسئول عن التحكم في خوفه، لكنك مسئول عن مساعدته علشان يعمل هو ده.
إليك 10 نصائح ستساعدك :
1. احترم مشاعر الطفل:
ممكن تبان النصيحة ديه سخيفة ومش عقلانية ولكنها حقيقية جدا بالنسبة ليه، لذلك حاول تجنب الضحك وأنت تنظر أسفل سريره بتدور عن الوحش، فالتقليل والسخرية من مشاعره يجعله في وضع الدفاع عنها، وممكن يقرر أنه ميقولكش عنها مرة تانية لو أتعاملت معها بسخرية.
بدلا من ده احتضنه واستبدل بجملة «مفيش حاجه تخوف أنت كبير متخافش» جملة «أنا فاهم إنك خايف أوي من الظلمة وحاسس بيك.. تحب أساعدك ونمشي سوا ولا ننور بكشاف؟».
2. لا تجبره على المواجهة:
من أشهر الأخطاء في معاملة الخوف أن تجبر طفلك على انه يتعامل مع حاجة بيخاف منها قبل ما يكون مستعد لده،عليك انك تدربه تدريجيا، فلو بيخاف من صوت المكنسة الكهربائية فشجعه على لمسها وهي مطفأة، ثم شغلها وهو في غرفة أخرى واجعله يقترب تدريجيا.
دعه يقرر أمتى يريد أن يواجه خوفه بنفسه.
3. أعلمْه عن المجهول:
ممكن يخاف الطفل لقلة خبراته ومعلوماته وده بيجعله يتصور أشياء مش حقيقية، فممكن يتخيل أنه هيقع في المرحاض أو أن المكنسة الكهربائية ستشفط رأسه الصغير، فقط اشرح له عن الحاجة اللي خايف منها وأزاي بتشتغل وأيه أهميتها، مثلا إن كان بيخاف من الحيوانات، رحلة صغيرة الى حديقة الحيوانات ممكن تساعده انه يتجنب خوفه من الحيوانات، وكون بجانبه دايما علشان تطمئنه وتشجعه.
4. اجعله يعبر عن مشاعره:
بعض الأطفال مبيعرفوش يعبروا كويس باللغة عن مخاوفهم، علشان كده ممكن تقوله أنه يقدر يعبر عن خوفه بالأرقام من (1 إلى 10) أو حتى باليد «خايف قد إيه؟ قد كده؟» أو حتى بالرسم، مع تكرار هذه الطريقة يمكن تقييم الخوف مره تلو الأخرى بسهولة.
5. تحكم فيما يشاهده:
الطفل مبيعرفش يميز بين ما هو حقيقي وما هو خيالي في عمره المُبكر، ممكن يشاهد على الشاشات مشاهد عنيفة أو مرعبة أو حتى غريبة عن أفكاره،فمثلا الديناصور في الكرتون ممكن يتحول لوحش أسفل سريره. ساعده باختيارك وتحكمك فيما يشاهد، واخلق معاه حديث و نقاش حوالين كل مشاهداته.
6. حدثه عما كان يخيفه:
أتكلم مع طفلك عن ذكرياته مع الخوف، وأن شخصيته أصبحت أقوى، فده بيزيد من ثقته بقدراته وإمكانياته في مواجهة مخاوفه، زي ما حصل قبل كده، كلمه كمان عن مخاوفك أنت كمان وأزاي أتعاملت معها لعلشان يعرف أنه مش مختلف وأن ده شعور طبيعي.
7. كن صادقا معه وقدوة له:
في أشياء مخيفة مفيش جدال فيها، يخاف منها الكبار والصغار، فمثلا كلنا بنخاف من ألم الحقن، يبقي متكذبش عليه ولا تتجمل، أخبر طفلك باللي هيحصل وأنك أنت كمان بتخاف من الألم، ولكنك تواجه الخوف ده بالدعاء ,بالتخيل بالتنفس فإن الألم سيزول سريعا.
8. لا تخيفه أنت!
ممكن يلجأ أحيانا بعض الأهل أنهم يخوفوا الأطفال للضغط عليهم في سماع بعض الأوامر: «لو ما أكلتش كل الأكل العو هيجي»، «لو نزلت معايا الدكتور هيدي الحقنة».. هذه العبارات تتردد في عقله وتخيفه وتعزز وجود الخيالات في ذهنه.
9. ابحث فيما وراء الخوف
قد يكون الخوف رسالة مش مباشرة لمشاعر مكبوتة بداخله كطريقة التعامل العنيفة،اللوم والنقد الكثير لشخصه، طفل جديد في العائلة، مسكن جديد أو مدرسة، مشاكل الأب والأم أو حتى موقف عابر .
ساعده في التنفيس عن المشاعر ديه بأنك تبدأ الكلام معاه توتحاول تعرف ايه اللي يدور جواه فمثلا «أنا عارف أنك مش عايز البيبي ونفسك يمشي لكن هو لما يكبر هتلعبوا كتير أوي مع بعض».
10. الصبر.. الصبر
لا تتوقع حل سحري خلال أيام (في بعض الحالات تحتاج استشارة متخصصة) ولكن اصبر على طفلك وتقبل مشاعره ومتيأسش واحترم رغباته أيا كانت.
الخوف نعمة كبيرة من الله متجبرش طفلك على مقاومتها وكبتها، قدم ليه يد العون دوما بأن تكون سنده وأن تُشعره بأنك تشعر بما يمر بيه، وأنك تتقبله في كل حالاته.
فتعامله الصحيح مع الخوف واحد من أهم دروس تعامله مع مشاعره الإنسانية كلها، واللي هتستمر طول عمره.
يمكنك قراءة مقال" ثقة الطفل بنفسة"
حلقات هتساعدك علي قناة اليوتيوب:
حلقة رقم "2" تعديل سلوك الطفل الجزء الأول
حلقة رقم "3" تعديل سلوك الطفل الجزء الثاني
حلقة رقم "20" التواصل مع الطفل"
حلقة رقم "45" أزاي أبنك يوصله محبتك
إمضاء : هايدي المصري
التعليقات