لو طفلك خجول ،مش عارف يعبر عن نفسة او عن احتياجاته , مش متفاعل في المدرسة زي ما هو منطلق في البيت او العكس "بيرجع البيت بشد منه الكلام "......!!
التعبير عن المشاعر
-في المقال ده عايزة اتكلم عن اهمية التعبير عن المشاعر وعن طرق تساعدنا كأباء.
-ساعد ابنك يعبر عن مشاعرة ويتكلم لانك ممكن تكتشف ان عنده مشكلة حقيقية مع المدرسة/الحضانة ، الاصحاب.
وعدم تعبيرة عن مشاعرة ناحية الامر ده بيزود المشكلة جواه (الضغط) وبيصعب عليه فهم نفسة وفهم المشكلة والتعامل معاها ،
ولو الموضوع انه الطفل مبيتكلمش بردوا التعبير عن المشاعر بيفتح سكة للحوار والنقاش.
-المشكلة:
اننا كآباء احيانا بيكون عندنا احنا صعوبة نعبر عن مشاعرنا (حتي مشاعر الحب لأولادنا) ويمكن ده نتيجة طريقة التربية اللي اتربينا عليها اوعادات وتقاليد مجتمعنا,
والحقيقة ده بيسبب ضغط نفسي كبير علينا وعلي اللي حوالينا وبالتالي كمان أطفالنا.
جمل غلط بنستخدمها مع أولادنا ونتيجتها :
- "انت راجل والراجل ميعيطش".
- "طفل موجوع (متبقاش ضعيف كدة - استرجل)".
- "علي فكرة مفيش حاجة تزعل".
- "انسي اللي حصل".
ليه نعلم اولادنا التعبير عن مشاعرهم؟
- يتعلم ان يقبل نفسة ومشاعرة من غير خجل او خوف من اظهارها.
- يقدر الطفل يفهم ويقدر مشاعرة ومشاعر الأخرين.
- يقلل من نوبات الانفعال والغضب اللي مش مبرر.
- يسهل عليه التواصل مع نفسه ومع الأخرين.
- يساعده ينمو بشكل صحي نفسيا.
- يساعدة علي حسن التصرف.
- يقلل من ضغط المواقف.
ازاي أقدم المشاعر لطفلي واساعده في التعبير عنها؟
1. القدوة ..من أهم الوسائل وأكثرها فعالية في أنك تأثر على الطفل. لما نعبر بشكل واضح وصريح مع استخدام تعبيرات الوجه والجسم،
سواء كانت مشاعر إيجابية أو سلبية.شارك ابنك بتفاصيل يومك (الممكن منها).
استخدم كلمات زي :أني عيان/عيانه، أنا غضبان/غضبانة، أنا زعلان/زعلانه ، أنا مبسوط/مبسوطه ، أنا مفتقدك/مفتقداك، أنا نعسان/نعسانة، أنا بحبك.
2. لما ألاحظ علي الطفل مشاعر معينة مش قادر يعبر عنها احاول اساعده عن طريق سؤاله: «حاسس بإيه؟» أنت نعسان؟، أنت حزين؟، هل أنت جعان؟. وأحاول تجنب الأسئلة المقفولة اللي اجابتها كلمة واحدة مثال: سؤال «عامل اية؟» لأنه سؤال مش محدد ومش يسأل عن المشاعر بوضوح، ويمكن الإجابة عليه «كويس».
3. في مرحلة متقدمة لما ألاحظ أن الطفل يقدر يستوعب الأمور بشكل أفضل، أعرض عليه صور للمشاعر المختلفة وأسمي كل شعور في الصورة، وأسأله في أوقات مختلفة في اليوم أنه يختار الصورة االلي بتعبر عن مشاعره الحالية.
4. استخدام بعض الأنشطة والقصص اللي بتشجعة على التعبير عن مشاعره وفهمها بشكل أفضل، وأشجعه على استخدامها في التعبير عن نفسه لما يتعرض لموقف ما أسأله عن شعوره «حاسس بإيه دلوقتي؟».
انشطة علشان تساعد الطفل للتعبير عن مشاعرة:–
-ممكن تتصور طفلك في حالات مزاجية مختلفة وتسمية كل شعور لكل صورة وتساعد الطفل أنه يوصف الشعور اللي بتشعر بيه.
– عصيان خشبية ممكن أنك تستغلها في رسم المشاعر المختلفة وكتابة أسمائها، وممكن أنك تلعب اللعبة دية مع طفلك بحيث تطلب منه أن يختار شعور ليقلده في موقف درامي وممكن تمثلوه سوا بحيث يعرف الطفل بطريقة مش مباشرة من خلال اللعب الدرامي أزاي يتصرف في الموقف ده مع الشعور ده.
–من الأنشطة الممتعة بالنسبة لكِ وللطفل سيكون الرسم بالرمل أو الدقيق على الطاولة المشاعر المختلفة والتعرف.– لعبة سيفيلنيجز (Safeelings)لعبة مصرية جديدة تتيح للاسرة انكم تلعبوا مع بعض وبتساعد الطفل والاسرة من خلال الرسومات اللي بتساعد علي فتح مجال للكلام والمناقشة والتعبير. اللعبة علي سوق.كوم..
حلقة هتساعدك علي قناة اليوتيوب:
حلقة رقم "45" أزاي أبنك يوصله محبتك"
إمضاء : هايدي المصري
التعليقات