اليقين هو إنك تشعر وتحس بـ معيّة الله في كل حاجة.. في ابتلاءك اللي ربنا بيأجرك عليه، وفي وجود حكمة ورا كل حاجة بتحصلك وإنك هتعرفها في الوقت المناسب



الوصول لليقين هو مفتاح الحلول لكل المشاكل المُعقدة♥


سمعت كتير ناس بيقولوا:

"دعيت بيقين"

"كان عندي يقين إن ربنا هيحلها"

"أنا مُتيقن إنها هتُفرج"


اليقين بالنسبالي كان لفظ أشبه باللغز، الشئ السهل الممتنع.. اليقين يعني الثقة والثقة يعني مفيش أي نسبة شك أو خوف من الخسارة أو الفشل أو حتى الخوف من حدوث شئ مش على هوانا!


طب أوصل إزاي لليقين؟.. كنت بسأل نفسي دايمًا بيعملوها إزاي دي؟!

طب بنقول إيه لربنا عشان نوصل لليقين ده؟

طب هعرف منين إني دعيت بيقين؟!


سألت ناس، وشوفت فيديوهات ناس، وسمعت حكاوي ناس.. بس فضلت برضو محتارة هل أنا بدعي ربنا بيقين ولا لأ؟!


دعيت ربنا كتير يرزقني اليقين..

جربت أدعي وأطلب اللي أنا عايزاه بس كنت لسه خايفة لا دعايا ميتحققش، رغم إني عارفة إن كل الدعاء مقبول عاجلًا أو آجلًا أو بيتشال لينا في الجنة، بس أنا لسه مش متأكدة هل أنا دعايا بيوصل ولالأ؟!، أصل ساعات الواحد بيكون مقصّر مع ربنا وملوش عين يطلب أمنية منه وهو مقصّر.. لحد ما وقع قدام عيني نقاش بين اتنين؛ مضمونه إنه ربنا عز وچل مش بيتعامل معانا زي ما بنتعامل معاه بتقصير، ربنا غفور رحيم ورحمته وسعت كل شئ، وإحنا دايمًا عندنا فرصة نرجعله ونتوبله ونقربله♥


من اللحظة دي.. بدأت أدعي ربنا يقربني منه ويعيني على طاعته وحسن عبادته، ولو قلبي متعلق بحاجة بس هي ذنب بطلب من ربنا إنه يغفرلهالي ويديني الإرادة عشان أكمل وأبطل تعلق بيها


قررت من جوايا أصدق حكاوي تجارب الناس مع اليقين، وأطلب من ربنا علامات وإشارات، قررت أسعى لليقين بيقين!


علامة فـ إشارة، ودعوات كتير بسيطة بتتحقق بمجرد ما أتمناها، فأتشجع وأدعي تاني بيقين واستنى الإجابة✨


فبدأت اكتشف إن كل الرحلة دي هي العبادة اللي بنفضل نعبدها لحد ما نوصل لليقين، وإن اليقين ده مش بس مجرد دعوة بندعيها وإحنا واثقين إن ربنا هيقبلها؛ عشان كمان هو عبارة عن ثقة في إن قدر ربنا مهما كان بالنسبالنا صعب أو مش هو ده اللي اتمنيناه فهو الاختيار الأفضل لينا


اليقين هو إنك تشعر وتحس بـ معيّة الله في كل حاجة.. في ابتلاءك اللي ربنا بيأجرك عليه، وفي وجود حكمة ورا كل حاجة بتحصلك وإنك هتعرفها في الوقت المناسب، في المشوار التقيل على قلبك اللي مش قادر تروحه، وفي المكان الزحمة اللي مضطر تدخله عشان تخلص ورقك، وفي السوبر ماركت وإنت بتشتري الطلبات، وفي المكالمة اللي إنت متوتر منها، وفي مقابلة الشغل اللي خايف متتقبلش فيها، وفي الخروجة اللي بتقعد تخططلها وبتتمنى تكون سعيدة، وفي كل حاجة حرفيًا


اليقين هو إنك تطمن إنك في رعاية الله وأمانه، ومهما حصل فإنت في خير، وهو عز وجل جنبك ومحاوطك وهيحلهالك مهما كانت صعبة ومستحيلة👌🏻


يلا ابدأوا الرحلة وادعوا الوصول لليقين🙏🏻✨

سلمى كوك

ألهمني ألهمني أضف تعليقك

التعليقات

ربنا يسعدك ويحفظك..
فعلا ملهم هنا يفتقد للمدونين مثلك بهذا المحتوى الرائع..
هذا هو المحتوى يلي يرقى بالإنسان وبيسعده ويبسطه! 🌸🌸
استمري.. ماشاء الله عليكِ.

تدوينات من تصنيف خواطر

تدوينات ذات صلة