الحمدلله على نعمة الشجاعة، ونعمة الكلام، ونعمة التعبير، ونعمة إني بشر عنده عقل بيفكر ويبدع ويقرر
وأما بنعمة ربك فحدّث💙
مش لازم يكون فيه حدث عظيم أو أمنية ربنا حققهالنا عشان نعتبرها نعم ونتكلم عنها، فيه نعم كتير أوي إحنا فيها بس من كتر ما اتعودنا عليها ممكن ننسى نشكر ربنا عليها -إلا من رحم ربي-
أنا كمان من فترة قريبة كنت ببص لأي مشكلة صحية بقابلها وعلاجها بياخد وقت، إنها عبء عليا وإني مستحيل ييجى يوم وأخف، وكنت باخد جنب وأفضل أعيط؛ لحد ما ماما جات قالتلي "انتي عبيطة؟!، انتي أحسن من غيرك!، قولي الحمدلله، لا انتي عندك مرض مزمن، ولا انتي بتلفي ع المستشفايات، قولي الحمدلله وقومي صلي ركعتين لله، واطلبي منه يفك كربك"
كل مرة بكون متضايقة فيها، بتضايق أكتر لما حد بيقولي انتي أحسن من غيرك، عشان ساعات كتير ببقى حاسة إني أيوة أحسن من غيري، بس أنا مش كويسة! ..
لكن من قريب بدأت أسرح في نعم ربنا فعلًا، ولاقيت إني في نعم لا تُعد ولا تُحصى، وكل ما أحمد ربنا على حاجة اكتشف حاجات تانية
اكتشفت إنه الحمدلله إني لسه فيا الروح وعندي فرصة استغفر ربنا وأذكر الله وأتوب عن أي ذنب صغير أو كبير، عن أي ذنب عملته وقولت ان شاءالله ربنا يسامحني، وعن أي ذنب عملته وأنا معرفش إنه ذنب!
اكتشفت إن الحمدلله على نعمة الإحساس والحواس، العين اللي بتشوف الطبيعة وتخليني أسرح في ملكوت الله وجمال صنعه وخلقه، والشم اللي بيخليني عارفة أميز الحلو والوحش، الإيد اللي بتكتب وبستخدمها في حاجات كتير، ورجلي اللي بتوديني مطرح ما أحب
الحمدلله على المشاعر اللي لما بحس بضيق بتخليني أحتاج لربنا وألجأله، واللي لما بفرح بتخليني أحس بالامتنان، واللي بتخليني راضية ومتصالحة مع حاجات كتير أوي،
الحمدلله على نعمة الشجاعة، ونعمة الكلام، ونعمة التعبير، ونعمة إني بشر عنده عقل بيفكر ويبدع ويقرر
الحمدلله على كل الحاجات اللي عرفتها واكتشفتها، وكل الحاجات اللي عندي بس لسه ملمستهاش
الحمدلله على نعمة الابتلاءات اللي ربنا بيأجرني عليها، وعلى العسر اللي بعده يسر، وعلى الأبواب اللي اتقفلت وفتحلي غيرها، وعلى الأيام العادية اللي بتعدي في سلام، وعلى كل حاجة بمر بيها وبتعلمني وبتديني خبرة💙
الحمدلله دائمًا وأبدًا 💙🙏🏻
#الحمدلله #الحمدلله_كثيرا #الشكر_لله
التعليقات