تحليل لمسلسل خلي بالك من زيزي والأبعاد النفسية للعلاقات والشخصيات في المسلسل
#خلي_بالك_من_زيزي
مسلسل يخليك يصعب عليك كل شخصيات المسلسل وفي الآخر تصعب عليك نفسك!
سهل تلاقي نفسك في شخصية من شخصيات المسلسل ويمكن تلاقي نفسك فيك ملامح من كل الشخصيات أو تلاقي في شخصيات المسلسل ناس عرفتها في فترة من حياتك.
أول حلقة من المسلسل أزعجتني ووترتني بشكل مش معقول لدرجة إني قررت إني مش هتابعه لأني مش ناقصة توتر أنا عايزة أتفرج على مسلسل يفصلني عن التوتر وأفك بيه عن نفسي واتفرجت عليه بعدين على رواقة لأن مهم لما تتفرج على حاجة تكون في مود مناسب لها.
نرجع لشخصيات المسلسل:
هشام: بني آدم ناجح وذكي من الناحية الأكاديمية لكن من ناحية المهارات الاجتماعية محتاج ينميها هو شخص إرضائي دايمًا بيجي على نفسه عشان يرضي اللي حواليه لكنه في الآخر بني آدم ليه طاقة وده أكده لما قال لزيزي حسيت إن حبي ليكي مبقاش كفاية إني أستحمل تعبك. هشام ارتاح لما عمل اللط على مزاجه هو سواء لما باع العربية وطلق زيزي وإداها المؤخر ولا لما رفض سفر الجونة وساب الجامعة وراح يدور على نفسه في المصنع اللي كان دايمًا مجهول بيخوفه وأخيرًا لما قرر يسيب ياسمين وما يستسلمش لضغطها عليه وكمان علاقة الصداقة مع سراج اللي كل واحد فيهم ساعد التاني يكتشف حاجة جديدة في نفسه ويبقى أحسن. صحيح استسلم فترة لغيره يمشي له حياته وجاله panic attack لما حس إنه بيضغط على نفسه وبيعمل حاجة مش عايزها لكنه كان صريح وعنده الشجاعة الكافية إنه ياخد قرارات سليمة رغم أخطائه.
ياسمين: البنت اللي بتقبل ترتبط براجل متجوز وفاكرة إنه هيشيل لها استحمالها ليه ووقوفها جنبه ومش شايفة إنها مجرد rebound مجرد عتبة بيخطيها أو دواسة بيمسح فيها رجله وهو خارج من علاقة قديمة داخل في واحدة جديدة. محدش بيقعد على العتبة العتبة بنخطيها بس ونروح لحال سبيلنا.
كاريمان وناريمان: مثالين على زوجات كتير مكملين في جوازات من باب أهو يلا عيشة والسلام سواء عشان خاطر الأولاد ولا عشان خاطر ملهاش لا قريب ولا حبيب ولا غريب ولا ملهاش مصدر دخل تصرف منه ولا حتى عشان الشكل الاجتماعي. على الرغم إنه من السهل التنظير على الستات دي لكنهم ضحايا ووضعهم صعب جدًا ولازم يبقى فيه آلية تضمن لهم حياة كريمة ميبقوش مضطرين يعيشوا حياة مش عايزينها متهانين فيها عشان ملهمش ضهر ولا مصدر رزق.
نيللي: اللي بتخاف من كل حاجة. اللي باختصار مفتقدة الأمان في حياتها. كل واحد منا عنده البعبع بتاعه وشاف نفسه في نيللي.
هدى ووليد: العلاقة الشائكة التي تجمع ما بين الزواج من حد مش عاجب الأسرة والسكن في بيت عيلة والتدخلات الأسرية. إنه مثلث الرعب.
مراد: صديق الكل صديق لا أحد اللي بيكتشف إن أمه مثله الأعلى بني آدم عادي بيغلط وإنه مشي وراها مغمض متساق ماداش نفسه فرصة يفكر بدماغه. فاكر نفسه بيساعد اللي حواليه لكنه عادي ممكن يأذيهم من غير ما يحس. اكتشف إن دور البطولة مش مجرد كلام وإنه أفعال بجد وفي أول علاقة التزام بجد خاف من دور البطولة.
تيتو: الطفلة اللي حظها حلو إنها لقت اللي يساعدها من بدري بدل ما تتحول لزيزي جديدة.
زيزي: الجانية المجني عليها. إحساس صعب إنك تعيش طول عمرك بيتقال لك إنك فاشل وبتعمل كل حاجة غلط وما وراكش غير المصايب. بس الجميل إن زيزي إنسانة شجاعة معاشتش في دور الضحية وواجهت مشاكلها ومشيت في طريق حلها بالاعتماد على نفسها في إنها تقف على رجليها.
تابعوا #صفية_مختار
التعليقات