كن سيد قرارك

كُن سيد قرارك كُن الشخص الذي لاطالما حلمت ان تكون مهما كانت الصعاب و التضحيات

صباح الخير او مساء الخير حسب توقيت قراءتك لأول مقال لي علي منصة ملهم

حبيت اول مقالة لي علي المنصة تكون مقالة عن قصة كانت مُلهمة لي في المقام الأول و اتمني انها تكون مُلهمة للغير ايضا

اعرف اتنين زمايلي للأسف دخلوا كليات و مشيوا في سكه مش بيحبوها ارضاءا لأهلهم و النتيجة انهم مش حابين المجال الي هما فيه و بالتالي صعب تبدع في مجال انت مش عاوزه فنصيحتي لأي حد عينه تيجي على المقال كُن سيد قرارك و حياتك الشخصية دي حياتك لوحدك و انت الي هتعيشها فعيشها كما تشاء

هحكيلكم عن حلمي و هدفي الأول

هدفي اني ادخل كلية الطب من عُمر اربع سنين كنت بشوف في عمي دكتور احمد شرف كدة و فخر في عيون جدي لما اقعد معاه و وقتها قررت ابقي دكتور علشان اهلي يتشرفوا بيا بالرغم من كوني عبقري رياضيات بشهادة كل الي يعرفني

انا بداية مدخلتش حضانة بس الوالدة كانت بتذاكرلي علشان لو كنت دخلت حضانة كنت هتأخر سنة عن دفعتي

انا كنت شاطر جدا في مادة الرياضيات

جدي الله يرحمه كان بيلم احفاده كل يوم جمعه بالاخص في اجازه آخر العام لان أبناء عمومتي اغلبهم في قنا

انا و اخواتي و أبناء عمي سعد الله يرحمه بس الي عايشين في اسوان

جدي كان بيجمعنا و بيعمل مسابقات جمع و طرح و الي يكسب اعتقد كان بياخد نص جنيه و اكبر حفيد وقتها كانت بنت عمي الأكبر و عُمرها ٩ سنين و انا كنت لسه ٤ سنين

بالرغم من كده مفيش حد كان بيكسب غيري انا

كنت بكسب كل الفلوس بعدين اعزمهم بيها على اي حاجه

و في المرحله الابتدائية و الاعدادية منقصتش درجة في مادة الرياضيات و لا أعمال سنة و لا امتحان آخر العام و افتكر في اعدادي استاذ احمد عارف قالي انك هتبقي مهندس عبقري بس ردي عليه انا هدخل علمي علوم انا عاوز اكون دكتور

و افتكر في امتحان ماده الرياضيات في الشهادة الاعدادية كنت بخرج من اللجنة قبل نهاية الوقت بكتير اكتر من صديق كان فاكر ان الامتحان بيكون معايا

و وصلت المرحله الثانوية و افتكر اني في تانية ثانوي بدأت اخد درس ميكانيكا قبل الامتحانات بشهر و للأسف استاذ محمود كان فاكرني طالب عاوز ينجح و خلاص بعد اول حصة

و الحمد لله استاذ محمود عثمان عجبه مستوايا جدا حصة بعد حصة و كان مبسوط مني جدا و من مستوايا معاه بالرغم اني بدأت متأخر عن باقي زمايلي

و في حصه مراجعة ليلة الامتحان كانت ليلة مميزة كده انا كنت بحل المسألة حرفيا قبل متكمل على السبورة كنت بتوقع الاستاذ هيكملها ازاي او هيطلب منها ايه فببدأ في الحل مع نفسي

افتكر وقتها ان فيه بنت قالتلي خلاص عرفنا انك شاطر ادينا فرصتنا بقي

انا بحب اخد ذكرى مع اساتذتي فطلبت من استاذ محمود يكتبلي ذكري في نوتة شخصية معايا من أولى ثانوي فكتب إلى المهندس حسن قولتله لا يا استاذ محمود انا عاوز اكون دكتور و اتفاجأ جدا وقتها برضه

بعد نهايه تانية ثانوي الأمر كان شائك و مقلق كل ابناء عمومتي الأكبر مني سنا في الثانوية العامة فرقت معاهم طب على درجتين تلاتة و نصيحة عمتي وقتها قالت لي ادخل علمي رياضة انت عبقري رياضيات لان علمي علوم غدارة و الدرجه فيها تعمل الف حساب

الوالد الحمد لله قالي ده اختيارك انت لو دخلت علمي رياضة انا واثق انك هتبقي حاجه كبيرة بس انا معاك في الي هتختاره و واثق انك هتنجح سواء هنا أو هنا و الحمد لله ان القرار كان قراري انا بدون ضغط او تدخل من الأسرة

و اصدقائي الي ممتن للظروف انهم اصدقائي في الوقت ده كلهم نصحوني ادخل علم رياضه يا حسن انت اشطرنا في الرياضيات و احنا داخلين علمي رياضه ازاي انت متدخلش بس انا هدفي اني اكون طبيب مش مهندس

قررت ادخل علمي علوم لإني انا عاوز كده و انا شايف نفسي كدة مش هدخل مكان مش شايف نفسي فيه علشان نصيحة غيري

و آخر موقف في بالي دايما موقفي مع د. هلالي كنت بسأله على مسألة في الفيزياء في كتاب اسمه الوسام في نهاية شهر مايو قبل بداية امتحانات ثانوية عامة بإسبوع

اجابتي الحمد لله كانت صح و حبيت برضه اني اخد منه ذكرى في النوتة الشخصية بتاعتي

كتبلي فيها إلي المهندس حسن ان شاء الله

قولتله لا يا دكتور انا هكون دكتور ان شاء الله و هو كان فاكرني طول السنة علمي رياضة

و الحمد لله ظهرت نتيجة ثانوية عامة و بقيت دكتور

بفضل ربنا و دعوات اهلي و مجهودي

و ده كان أول هدف شخصي احققه في حياتي الحمد لله

ختاما...

"اكتب احلامك على ورق فإن لم تصبح اليوم واقعًا تراه فغدًا ستكون أمامك بإذن الله، فلا تستعجل عليها مادمت تخطو لها و إتجاهك صحيح، فأحيانًا يكون بناء الحلم أصعب من تحقيقه لمن يملك كل شيء و لا يعرف كيف يحلم"

الخاطرة دي سر تحقيقي لأهدافي انا اي هدف عاوز اوصله او احققه بكتبه في دفتري و أسعى علشان احققه و الحمد لله ربنا دايما بيوفقني