العقل الواعي و العقل اللاواعي (الباطن)

في المدونة نتكلم عن الفرق بين العالم الداخلي والخارجي لكل منا

عالمين متوازيين...قلب واحد...عقل واحد...نفس واحدة...

ايه الكلام ده؟ وعالمين ايه بس اللي بتتكلم عليهم؟

هقولك يلا بينا نسافر في رحلة صغيرة نكتشف ونتعرف فيها على اللي جوانا من أفكار ومشاعر...والآن خد نفس عميق...تمسك جيدا...واحضر يقظتك وذهنك...

ذكر دكتور محمد طه استشاري وطبيب علم نفس في كتابه "لأ بطعم الفلامنكو" إن كل واحد فينا عايش في عالمين متوازيين؛ عالم خارجي وعالم داخلي...

هيقولي عالمين تاني؟! أيوة بظبط عالمين تعالي اقولك ازاي...

- العالم الخارجي: وده العالم اللي انت واعي بيه...بتشوف وبتسمع وبتحس...ناس وأصوات وأحداث وأماكن وأزمنة وده الجزء اللي بنسميه " العقل الواعي" أي منطقة المنطق

وده الجزء المتعلق بالعمليات الإدراكية في الدماغ وبيعمل في حالة اليقظة،

ولك أن تتخيل أن الجزء الواعي من عقلك ده بيدير من) 5-10% (فقط من وظائف العقل المتمثلة في:1- معرفة وجمع المعلومات. 2- التفكير وتحليل المعلومات. 3-ربط المعلومات والمقارنة بينها. 4- اتخاذ القرار.

وبكدة بيخلص دوره لحد هنا بعد اتخاذ القرارات ولكنه يقوم بنقل كل اللي حصله إلى مخازن الذاكرة والمشاعر وهوالجزء من العقل الذي يسمى ب "العقل اللاواعي / الباطن".

كلام كبير أوي، بس مش ده العقل بتاع الأحلام؟!

أيوة بظبط هو ده الجزء من العقل المسئول عن الأحلام بس الأحلام ديه مجرد نقطة صغيرة من دوره الكبير...نفس عمييييق وتعالى أقولك ازاي!!

- العالم الداخلي: الجزء ده من العقل بيعمل بعيدا عن الإدراك، وفي أوقات معينة كالنوم زي ما قولت...بس المفاجأة هنا إنه بيدير من) 90-95%( من وظائف العقل...متخيل النسبة؟!

طبعا من قبل ما تسأل ازاي؟ وبيعمل ايه عشان يكون بيدير الجزء الكبير ده من عقلك؟

هقولك عقلك الباطن مسئول عن تنظيم المدخلات اليومية زي الذكريات والمواقف والأحداث والناس وتخزينها كلها...

كلها كلهااا؟؟؟

أيوة كلها كل حاجة عدت عليك طول حياتك وكل إحساس حسيت به وكل موقف وكل فكرة...مع العلم كمان إنه مبيفرقش بين خير وشر أو شيء إيجابي وسلبي أي "لا يمنطق الأشياء" يسجل فقط....

عشان كدة بيصبح مركزا لانفعالاتك والمشاعر الخاصة بك وسلوكك وردود أفعالك المختلفة (وتصرفاتك اللي ساعات كنت بتتفاجئ بها في موقف من غير ما تعرف انت عملت كدة ليه!)

تهت مني ولا لسة؟

تعالي نبسطها مع بعض؛ ببساطة هنشبه جزء العقل الباطن بالتربة بس مش أي تربة، تربة بتقبل أي نوع من البذور وبتنمو سريعا...والبذور ديه هي الأفكار "أفكارك اللي بتقولها لعقلك الواعي فبتتزرع جوة عقلك الباطن فتفضل تنمو ويتغذى عليها عشان يعيدها لعقلك الواعي لما يحتاجها....

وبناء عليه بيظهر سلوكك وتصرفاتك ورد فعلك تجاه كل المواقف...وده ببساطة نتيجة كل حاجة متخزنة متراكمة مزروعة جواك....

دلوقتي جيه دورك! دورك انك تكون مدرك لذاتك

اسأل نفسك ايه الأفكار اللي بتزرعها جواك؟ بتكلم نفسك وتفهمها ولا بتقسى عليها وتجرحها؟ بتجلدها ولا بتشجعها؟ بتقاوم نفسك وترسم أهدافك ولا بتحبط وتيأس؟ بتساعد اللي حواليك وتوصلهم كلام إيجابي بالتالي تسجل ردود أفعال وذكريات سعيدة؟ ولا أناني بتهتم بنفسك بس وتخبط في اللي حواليك؟ بتتناقش وتسمع لنفسك ولمن حولك بهدوء وانفتاح عقل ولا بتنفعل وتظلم نفسك قبل اللي حواليك؟

خليك مدرك إن كل شيء من فكرة، فعل، موقف ، اعتقاد ، قناعة ،شخص وغيره بيأثر عليك سواء بشكل مباشر أو غير مباشر....

وانت اللي بايدك تختار تأثيره يكون إيجابي أم سلبي!

تعالى أقولك على بعض الخطوات اللي هتساعدنا في حياتنا الجديدة "حياتنا المدركين لها"

1- تحدث لنفسك بالكلام الإيجابي والأفكار الإيجابية.

2- لا تستخدم أسلوب النفي في التفكير؛ مثال: متقولش أنا مش عايز أسقط في الامتحان - قول: أنا أريد أن أنجح في الامتحانلأن العقل لا يفهم أسلوب النفي: يعني لو قولتلك متفكرش في حصان أبيض!ايه أول حاجة هتيجي في دماغك...بالظبط الحصان الأبيض.

3- اجعل لك أهداف صغيرة وكافئ نفسك عليها بكلام تشجيعي.

4- شارك نجاحاتك الصغيرة مع المقربين هيساعدك أنه يعزز أفكارك وصورتك الإيجابية.5- عندما يتزايد الضغط والتوتر والمشاعر والأفكار السلبية...راجع أفكارك ورؤيتك لداخلك.