في أعماق البحار 🌊 بتعيش سمكة قرش طيبة وجميلة اسمها "نينو"
في أعماق البحار 🌊 بتعيش سمكة قرش طيبة وجميلة اسمها "نينو"، كانت بتحب كل الحيوانات وبتتمنى تعيش معاهم في سلام وهدوء دايمًا 😇 لكن للاسف كلهم كانوا بيخافوا منها عشان شكلها 😞 🦈
محدش كان قادر يقرب منها او يكون صاحبها عشان فاكرين انها ممكن تاكله او تعامله وحش لان ده المعروف عن اسماك القرش انهم اشرار ومش بيحبوا اي حيوان معاهم في البحر 💔
بس الكلام ده مكانش موجود في نينو، بالعكس، هي كان نفسها يكون ليها اصحاب وتروح تلعب معاهم ويتجمعوا كل يوم سوا ويروحوا يصطادوا 🎣 وعشان كدة تلاقيها حافظة اسماء كل حيوانات البحر مع ان ده صعب جدا على اي حيوان، بس هي عشان كانت مهتمة بهم حفظت اسمائهم كلهم 📝
مش بس كدة، ديه كانت كمان عارفة كل حيوان عايش فين وامتى بيطلع من بيته عشان يدور على أكله، وبيحبوا ايه وبيكرهوا ايه وكل حاجة عنهم، بس هما مكانوش عارفين مدى حب وتعلق نينو بهم ☹️
نينو بقت تحس انها خلاص هتكون وحيدة وملهاش صحاب، لحد ما في يوم وهي رايحة تجمع أكلها لاقيت ان فيه صنارة كبيرة في البحر بتاخد أكبر عدد من السمك الصغير والكبير 😱
كل الحيوانات كانت خايفة جدا ومش عارفين يتصرفوا وفيه أمهات عمالة تصرخ وتقول ان عيالها الصغيرين دخلوا الصنارة ومش عارفين يتحركوا 🥺
أول ما نينو شافت المنظر ده راحت ساعدتهم على طول من غير تفكير، وبدأت تطلع السمك الصغير من الصنارة واحدة واحدة وبعدين استخدمت اسنانها الحادة في قطع الصنارة بالكامل لحد ما طلعت السمك الكبير كمان 💪🏻🦷
مع اخر سمكة كانت بتنقذها للاسف ديلها اتشبك في طرف الصنارة ومكانتش عارفة تتحرك وكانت خايفة جدا عشان الصياد كان عمال يشدها لفوق الماية بكل قوته 😔
لما السمك شاف المنظر ده قالولها: "متخافيش يا نينو احنا مش هنسيبك" وراحوا واتجمعوا كلهم وفكوا ديلها من الصنارة 🥰
اول ما اتحررت نينو راحت حضنت كل حد ساعدها وشكرتهم على موقفهم الشجاع معاها واتفاجئوا انها وهي بتكلمهم عارفة اسمائهم كلهم 🫠🫣
ده خلى السمك يحس قد ايه نينو طيبة وكويسة وبتحبهم وقرروا يكونوا أصحابها ويقدروا اللي بتعمله عشانهم ♥️ وبقوا يروحوا كل يوم يجيبوا الاكل لبعض ويتفسحوا في البحر الكبير ويوصلوا نينو لبيتها زي ما كانت بتحلم طول عمرها 🐠😊
"مهما كان شكلك مختلف عن اللي حواليك، هتلاقي دايمًا طيبتك وقلبك الأبيض هما اللي هيخلوا الناس يحبوك بصدق وهيلاقوا فيك الصديق الحقيقي اللي بيدوروا عليه!" 🌟🦈
يمكنكم قراءة المزيد من قصصي على صفحة فيسبوك https://shorturl.at/z1LsI
#سمكة_قرش #سمكة #قصص #قصص_اطفال #حواديت #قصة_للاطفال #قصة #الاطفال #قصةـوعبرة
التعليقات