سألت نفسي مرة شو هو العيد؟ بس ما عرفت الجواب إلا بهاي القصة
#موقف_لطيف
قصة اليوم 🙋♂️ موقعها أوروبا، وإليكم التفاصيل: ✍
في سنة 2013 كنت مع مجموعة من الأصدقاء الطيبين في ألمانيا، وكان نصيبنا إنه نقضي ليلة عرفة في برلين، ونقضي العيد في باريس، بس المواقف الي صارت خلت يكون إلي نظرة مختلفة للعيد!
أول إشي قررنا أنا وبعض الأصدقاء إنه نصوم يوم عرفة، وكان إشي كثير مهم بالنسبة إلنا إنه قدرنا نحافظ على هاي السنة حتى واحنا عنا شغل وفي دولة أجنبية!
وفي المساء، طلعنا مع مجموعة كبيرة كان فيها العرب مسلمين وغير مسلمين، إضافة للأجانب (تقريبآ العدد كان 25 شخص) طلعنا على شوارع برلين، وبلشنا نهلل ونكبر ❤ بصراحة للوهلة الأولى كنت خايف إنه يفكرونا دواعش 😅😅 لكن بحمد الله كان شيء لطيف جداً.
الأشخاص الي كانوا معنا، جدآ احترموا شعائرنا، وضلوا ساكتين لحتى كملنا، بعدين بكل إحترام سألونا عن الموضوع وليش هيك بنعمل، والحمد لله قعدنا نشرحلهم قصة عيد الأضحى، وليش بنصوم، وليش في عيد وهكذا 🙏🏻 كنت في قمة السعادة إنه قدرنا ننشر شيء جميل بين الناس، والناس شاركونا فيه من مختلف الأطياف والدول واللغات!
ثاني يوم الصبح، انطلقنا إلى عاصمة الحب (باريس) ❤ كنا في غاية الشوق لزيارة المدينة، وبصراحة نسينا إنه الدنيا عيد 😅
المهم، بعد ما وصلنا وارتحنا قليلاً طلعنا على الشارع الأهم (الشانزلزيه)، وبدأنا في استكشاف الشارع، وافترقنا لبعض الوقت بحيث إنه كل حدا فينا يزور المحل الي بحبه في الشارع 💪🏻 أنا كان نفسي أزور محل ديزني 😍😍 وبالفعل أول ما شفته، نسيت الدنيا ودخلت المحل وقضيت جوا ساعتين كاملين!
لكن المميز بهاي التفاصيل، إنه طول فترة وجودي داخل محل ديزني، لمست أجواء العيد الي كنت أنا نسيت إنها موجودة، لقيت هناك عائلة مصرية عم بشتروا لأولادهم ألعاب العيد، تعرفت عليهم وقضيت الوقت معهم، بعدين بس إجا الوقت الي لازم نفترق فيه، حكالي الزلمة جملة عمري ما بنساها، قال (لو إنت عايز تفضل معانا عشان ما تفضلش لوحدك في العيد، بيتك ومطرحك، أسوأ حاجة الإنسان يكون لوحده في يوم زي ده) ❤
أصدقائي، أحبتي، كل حدا فيكم مع أهله، قدر كل لحظة معهم.
وكل حدا بعيد عن أهله، إنت مش لحالك، كلنا معك ❤🙏🏻
كل عام وأنتم بألف خير يا رب
#withammourah
التعليقات