تأثير بجماليون

أسطورة بجماليون ونظرية تأثير بجماليون في علم النفس

بقوللكوا إيه.. تعالوا احكيلكوا حكاية كده الأول قبل ما ندخل في موضوع النهاردة.. حكاية ليها علاقة بالموضوع.. وهي أسطورة بجماليون..

بجماليون نحات إغريقي بارع جداً كان عايش في قبرص.. وبسبب احتكاكه الدايم بنوع معين من الستات "العاهرات" كره الستات كلهم وعشان كده قرر ينحت تمثال لواحده ست على مزاجه نسخه من اللي رسمها في خياله..

بدأ ينحت وأفرغ كل ما يملك في جعبته من فن وإتقان وحرفيه ودقه في التمثال لدرجة إنه بقي جميل جداً أشبه بالحقيقي كانت ست في منتهي الجمال ومن شده جمالها حبها وقع في غرامها بجد سماها جالاتيا وبقي يجيبلها هدايا وورد وعطورإ

تجنن بيها لدرجه إنه استني يوم الإحتفال بفينوس آلهة الجمال وراح المعبد معاه قربان وفضل يتضرع لفينوس انها تبعث الروح والحياه في التمثال جالاتيا لانه بيحبها بجنون وعايز يتجوزها " خلي الراجل ياخد راحته يا جماعة دي أسطورة في إيه ! "..

وبالفعل أمنيته إتحققت وصل لبيته لقي جالاتيا مستنياه وفيها الروح واتجوزوا وانجبوا ولد إسمه بافوس..الكاتب الأيرلندي جورج برنارد شو عمل من الأسطورة دي مسرحية فيما بعد وكمان الكاتب المصري توفيق الحكيم ودخلت في أعمال أدبية كتير..

بس اللي يهمنا النهاردة استخدامها كنظرية في علم النفس والعلم التربوي.. نظرية تأثير بجماليون Pygmalion effect أو Rosenthal effect.. اللي اتعملت بناءاً على دراسة للعالم روزينتال والنظرية دي بتوضح مدي تأثير التوقعات والقناعات الإيجابية على قدرات أي شخص وعلى أفعاله وردود أفعاله.. قال روزينتال إن تأثير بجماليون بيمشي بالتسلسل الآتي..

إعتقاد الناس فينا بيأثر على أفعالنا معاهم

وأفعالنا مع الناس بتأثر على اعتقادنا في نفسنا

واعتقادنا في نفسنا بيأثر على أفعالنا مع الناس

وأفعالنا مع الناس بتأثر على اعتقاداتهم فينا وعننا

يعني الفكرة كلها إن توقعاتك وقناعاتك الإيجابية في نفسك وفي غيرك بتأثر على قدراتك وتصرفاتك إنت وغيرك.. يعني لو مثلاً مدرس أب أم مدير مدرب توقع من الطالب أو الإبن أو... التفوق النجاح الصدق .. وده وصله بلغة الكلام أو لغة الجسد.. هاتساعده انه يضاعف مجهوده ويبذل أقصى ما عنده انه يكون كده وأكتر وهايحب اللي بيعمله..

اللي بنستناه ونصدقه في اللي حوالينا بيكون ليه تأثير على إيمانهم بنفسهم وثقتهم في آدائهم وهكذا احنا اللي بنصدقة في نفسنا وثقتنا في قدراتنا ليه دور مهم في تحقيق أهدافنا وفي آدائنا وتصرفاتنا مع الناس.. سواء اللي صدقناه ده حلو أو وحش سلبي أو إيجابي..حب نفسك وحب اللي بتعمله واتقنه.. الحب بيصنع المعجزات..

صدق نفسك وخليك مؤمن بقدراتك..

كن مؤثراً..

ثق في اللي حواليك ساعدهم وشجعهم.. الكلمة بتفرق والدعم النفسي بيفرق