إيه هو النظام الأبوي؟ سؤال اجابته مش كفاية في مقالة واحدة.. المقالة دي تعتبر افتتاحية لسلسلة مقالات بتناقش البطريركية من وجهة النظر المتواضعة للكاتبة.
من كام يوم.. دبت خناقة لرب السما بيني وبين أخويا عشان ماكنش عايز يشيل مطرح ما أكل كريب الفراخ المشكل، وعشان يداري على غلطه، قالي كلمة لسه صداها بيرن في ودني: "وماتشيليهاش إنتي ليه؟ ما انتي فعلًا مالكيش لازمة في البيت أصلًا!" بضحكة سمجة كده. ماكدبش عليكوا، اتاخدت في نفسي وزعلت بصراحة، بقى أنا بعد التعب ده كله قيمتي تتربط بكيسة كريب فراخ!
لحظتها.. نورت في دماغي كل المفاهيم المجتمعية فيما يخص شئون المرأة والذكورية السامة اللي بحاول أعرف عنهم أكتر مؤخرًا, أبرزها كان البطريركية أو النظام الأبوي المتأصل في معظم مجتمعات العالم بشكل يصل إلى السُمَية.
في البداية لازم نعرف، إيه هو النظام الأبوي؟
النظام الأبوي هو نظام اجتماعي، مرتكز على الذكور كونهم مصدر للسلطة -مطلقة كانت أو جزئية- على الفئة "الأقل" من وجهة نظره، ألا وهي الإناث.
بيأثر على حياتنا في إيه؟
بيجهض دور المرأة في نواحي حياتية كتير، بحيث إنه بيمنح الرجل التفوق والأولوية في أهم المؤسسات والنظم الحياتية زي: النظم الإدارية والسياسية والإقتصادية وغيرهم، بالإضافة لإنه بيحصر المرأة في أدوارها -من وجهة نظره- التقليدية: زي التنظيف والطبخ والإنجاب وكل ما هو آخر يخص "البيت". مش بس كده، ده بيربط قيمتها وانتاجها المجتمعي بكفاءة ممارستها للأدوار دي.
ليه المفروض نكون واعيين بالنظام ده؟
الوعي بالمشكلة جزء كبير من حلها، ممارسات لا عدد لها بتتم بشكل يومي ضد المرأة -والرجل كمان بالمناسبة، لكن هنتطرق للنقطة دي في موضوع لاحق- من قِبل مختلف الأفراد تحت مسمى البطريركية. أحيانًا بتوصل الممارسات دي للقمع والعنف وأجهاض الأحلام والحرمان من أبسط حقوق الإنسان، زي التعليم والصحة.
مقالة واحدة فعلًا مش كفاية، بالتأكيد سنكمل عزيزي القارئ الكتابة عن هذا الموضوع في مقالات لاحقة!
التعليقات
@eslammostafa
عزيزي استاذ اسلام، أنصحك بالقراءة عن الموضوع بشكل أكبر لأن من الواضح أن وجهة نظرك مُشكلة عن سطحية.
لأن مش معنى أن البنات أو الستات وصلوا لأعلى المناصب الأدارية في العالم يبقى كده النظام الأبوي خلاص مش موجود، النظام الأبوي لسه موجود في العالم كله وبيتم عن طريقه مش بس قمع السيدات لأ والرجال كمان.
أنصحك بالقراءة، وأنا تحت أمر حضرتك لو احتاجت أي توضيح.