أنا ذلك الشخص السام المنتهي صلاحيته في قصة حياة أحدهما
كل حاجة في حياتنا ليها فترة انتهاء صلاحية "عمرنا ، شكلنا ، صحتنا" حتى علاقتنا مع بعض ليها فترة انتهاء صلاحية وعلشان العلاقات دي تعيش وتكمل معانا لازم نحفظها ونحافظ عليها ونتعامل معها بالشكل المناسب ، يا أما هيملها العفن وتفسد وساعتها يا أما نلحق نرميها أو منلحقش فتسممنا ..
لو دورنا في حياتنا هنلاقي ان علاقات كتير سواء كانت (حب ، صداقة ، شغل) اتغيرت شكلها وطعمها علشان مالها العفن وإن الأوان خلاص ولازم نرميها بعيد عننا علشان متفسدش وتسمم اللي باقي من حياتنا ، عشان كده مطلوب مننا كل فترة إننا نكشف عن تاريخ إنتهاء صلاحية علاقتنا ..
طيب هنعمل ده إزاي ؟
ممكن نعمل ده لما نفتح تليفوناتنا ونتفرج على صور الناس اللي نعرفهم او اللي بقينا شاكين في تاريخ صلاحية علاقتنا بيهم ونراقب قلوبنا وأحاسيسنا ناحيتهم دلوقتي مش وقت إلتقاط الصور ،
ونسأل نفسنا هل ياتري لسه ليهم نفس الطعم والريحة ودرجة الحب في قلوبنا وله أتغيرت ؟
طيب لو اتغيرت ، هل هي اتغيرت بشكل مؤقت عشان شوية عفن بسيط بسبب الفتور في علاقتنا بيهم وله العفن ده تراكم وحان وقت التخلص منها للأبد ؟
وممكن كمان نفتح قوائم البلوك الكتير اللي بقيت عندنا ونبص نشوف مين بقي موجود فيها يااااا هنلاقي ناس كانت عزيزة اوي علينا ونبتدي نسأل نفسنا هو ايه اللي جاب الناس دي هنا مع المنتهي صلاحيتهم بعد ما كانوا أحب واقرب ناس لينا في يوم من الأيام أو هكذا ظننا يومآ ما ؟
وهل احنا حجبناهم عننا عشان نعتزل أذاهم لينا وله عشان نحافظ عليهم ونحميهم من أذانا ليهم ؟!
متتفاجئش يا صديقي ما احنا برضه مش ملايكة ، أحنا ممكن نكون ذلك الشخص السام المنتهي صلاحيته في قصة حياة أحدهما بس مش واخدين بالنا او عاملين مش واخدين بالنا عشان شكلنا قدام أنفسنا وإحساسنا بالذنب ، عشان كده الموضوع ده محتاج مننا كثير من النضج وقليل من الصدق وبعض من الشجاعة مع أنفسنا عشان نقدر نعترف بالحقيقة دي حتي ولو لأنفسنا ، حتى ولو لمرة واحدة بس في الحياة..
قولها يا صديقي ولا تخجل أنا ذلك الشخص السام المنتهي صلاحيته في حياة ...... (فلان)
هكذا يتطهر البشر .. بالاعتراف بالخطأ.
مهما كان حجم العشرة ودرجة الحب في قلوبنا للناس اللي حوالينا ، لازم نكشف عن تاريخ إنتهاء صلاحية علاقتنا بيهم و لحد ما نصل لتاريخ معين يقدر يقولنا ساعتها اذا كنا سامين او مسمومين لازم كل ما نفتكرهم ندعي لهم "اللهم طريقا لايجمعنآ بكم أبدا"
التعليقات