لماذا لا نعلم؟

قصص لأمهات عانت مع أطفالها المتأخرين لغوياً ونطقياً، لأمهات يسألن سؤال لماذا لم يُخبرونا؟ قصة لماذا لانعلم2؟

اليوم 3/5/2019 صار زيد عمره سنة.. عملت إله عيد ميلاد بجنن كانت تجهيزات فخمة بالنسبة إلي وللجميع، تعبت وأنا بنسق و برتب للحفلة لانه مبسوطة انه صار سنة وبنفس الوقت صار يمشي يعني الفرحة فرحتين.. الكل اجا وكانوا مبسوطين وجابوا هدايا اشي سيارات اشي ليغو.. ألعاب من كل الأشكال والأنواع والألوان.. بس ولا لعبة لفتت انتباهه.. ماكنت معطي الموضوع أهمية لأنه بهمني عيد ميلاده وفخامته تعجبني 😶😶..

لحد ماصاحبيتي لفتت انتباهي بآخر الحفلة.. 🙎‍♀️ابنك مافي لعبة لفتت انتباهه ابنك زي الضايع ولسة ما بحكي لا ماما ولا بابا..

أنا مباشرة أعطيتها المبرر.. آه لسة صغير مش فاهم😳

🙎‍♀️لا انت غلطانة لازم أقلها يفهم أنا ما بدي أعلق من باب التعليق بس مشان أنبهك وتصيري تتبعي تطوره..

اقرئي اتعلمي شوفي إذا هو مناسب أو لا..

خلصت الحفلة🥳🥳 ونمت وأول ما فتحت عيوني بلشت أعمل بحث على عمو جوجل.. بلشت تتفتح عيوني على أشياء أول مرة بعرفها😳.

ليش ماحد حكالي؟

نعم! 🤔

ليش ماكنت أسأل أصحاب الإختصاص؟ 😳

هون بلش الشك يدخل قلبي.. صرت أقرأ هون وهون لحد مااجا قبالي مقال👇🏻👇🏻

وقتها اكتشفت انه ابني ما بعرف يلعب ما بعرف يقلد.. مزاجي.. ما بتواصل معي بصريا.. ما بفهم علي.. وأشياء كتيرة..

هون بلشت أركز أكثر وكل خلل عنده أعمل بحث علي و أعمل معه أنشطة لتطوير مهاراته اللغوية و الكلامية..

طبعا وقتها صار عمره سنة وشهرين، صرت أحاول أعلمه كيف يلعب وأشياء كثيرة.. قعدت معه للسنة ونص تقريبا يعني 4 أشهر وأنا أعلمه كل اشي، فرق معي 50٪ بس مش زي ما بدي عالتعب الي تعبته معه.. كنت أواسي حالي مش مهم تعبي المهم يتطور ويتحسن..

تواصلت مع الأخصائية وسألتها عنه وحكتلي أشتغل معه وخبرتني انه احتمالية انه يتأخر بالكلام احتمالية عالية، أنا وقتها اقتنعت بكلامها لأنها حكت بعلم ومنطق، لكن كمان أعطتني نصائح أشتغل عليها من شهر ل3 أشهر بعدها بنحدد موعد نقيمه، خبرتني انه بتقدر تقيمه من هلأ بس دايما بتحب تعطي الأم فرصة وبعدها بتتدخل.

كملت معه واشتغلت أكثر بس صرت أنهار وأتعب وما ألاقي نتيجة لانه ما بده يعمل معي اشي لأنه مزاجي وعنيد وبكابر بس بده يعمل إلى بده إياه الي بناسبه..

ما بنكر انه ماتحسن بس كان تحسنه بمهارات حركية بس بالكلام مافي أي إضافة غير بابا وماما.. يعني شغل 7 أشهر طلعت بكلمتين يعني كمان 7 أشهر لأطلع بكمان كلمتين😭😭 هون انا انفجرت.. ورجعت حكيت معها وخبرتها باللي صار وطمنتني مشان أرتاح وبنفس الوقت حطتني بالصورة انه في مؤشرات بتدلل انه الطفل رح يعاني ويتأخر بالحكي وهي ماخبت علي بالمرة الأولى.. بس للأسف المجتمع واحنا بنكابر..

وبنصير نحكي لا همي ببالغوا.. هون كان صار عمر زيد سنة وتسع أشهر.. ولأنه من وجهة نظري جزء منهم ببالغ تركت الموضوع ما هو آخرته بحكي ع قولتي وقولة الناس🥺

و ما بصير نقارن كل طفل اله قدراته.. لحد ماشفت ابن أختي كان مسافر واجوا من السفر 😳 الولد عمره سنتين ونص يعني الفرق بينه وبين ابني 3 أشهر بسسس.. بس هو بحكي الله يحميه🤲🏻

هون حكيت أنا غلطانة وكانت كل المؤشرات تدلل انه ابني متأخر عن المستوى الطبيعي.. وكان لازم مش لحالي أشتغل علي.. كان لازم عملت تقييم وياريت رديت على كلامها انه إذا حسيت خلال ال3 أشهر من شغلي معه مافي تطور وقتها لازم يتقيم.. كان مفروض سمعت كلامها لما حكتلي انه إذا الفجوة زادت من ست أشهر لسنة يعني أبدأ علاج معه عند أخصائي نطق.. للأسف أخّرت ابني وضيّعت من وقته وعمره... 🥺🥺

صار عمره هون سنتين ونص وما بحكي أكثر من 10 كلمات يعني زي طفل عمره سنة.. يعني هو متأخر سنة ونص وأنا بماطل وبحكي زيه زي ابن فلان وآخرته بحكي.. مهو آخرته بحكي بس بعد مايكبر بعد مايتأثر نفسيا لأنه مابعبر وبعد مايتنمروا علي وبعد مايتأخر عن جيله بالمدرسة..

هون أخدت موعد والحمدلله صح ماكان عنده بالبدايات مهارات ماقبل اللغة ومن شغلي صار أحسن وكان ضايل شوية مهارات مع الكلام.. يعني شوي أعطتني دفعة أمل اني مساعديته بشوية شغل مني ع تطوير مهاراته بس بشكل عشوائي..

النا تقريبا 3 أشهر بناخد جلسات وزيد صار عنده كلمات أكثر من 50 كلمة يعني أنا اشتغلت 7 أشهر على كلمتين.. اكتشفت إني أنا ربة بيت بفهم بشغلي وبتخصصي بالكمبيوتر مش بمشاكل النطق.. همي بيعرفوا كيف يصححوا المعلومات الغلط ويفسرولي سلوكيات بشكل علمي.. ويساعدوني كيف أعلمه على الكلام ويحددولي بالزبط شو مشكلته..

نصيحة من أم عانت ماخبروها غير العادي الي بتضيع أجيال وأمهات ..لاتسمعوا لكلام الناس اسمعوا احساسكم وكلام أصحاب الإختصاص الخبرة..