ايه هو البيزنس موديل و كيفية استخدامه؟ (الجزء ال2 والاخير)
دلوقتي هنتكلم في تفاصيل تفاصيل البيزنس موديل
زي ما قولنا البيزنس موديل بيتكون من 9 أجزاء هنشرحهم دلوقتي بكل أسرارهم وخباياهم
بسم الله
1- القيمة المقترحة أو العرض المقدم
قولنا إنها القيمة اللي بيقدمها المنتج بتاعك وبتميزك عن منافسيك ، القيمة دي بقي ليها 3 طبقات
- أول طبقة هي الطبقة الخارجية أو العناصر المعنوية اللي بيحصل عليها العميل من منتجك أو خدمتك
زي الشعور بالتميز أوالثقة
- تاني طبقة هي الطبقي الوسطي أو العناصر الملموسة زي شكل المنتج و حجمه و الماتريال المستخدمة في تصنيعه
- تالت طبقة ودي هي قلب القيمة وجوهرها وبتكون هي الحل اللي بتقدمه لعملائك للمشكلة اللي بتواجهم وبتتحل بمنتجك
و بتخلي العميل يختارك إنت ، كل ده طبعاً بالإضافة للطبقتين اللي سبقوها
طيب تعالوا ناخد مثل :
الساعة الـ rolex مثلاً ليه حد ممكن يشتريها دوناً عن باقي الأنواع رغم إنها غالية جداً
أقولك أنا : أولاً هو بص للطبق الخارجية (أول طبقة) وحس بالتميزوالفخامة لمجرد إنه لابس ساعة من صنع rolex
بعد كدة بص للطبقة الوسطي (تاني طبقة) ولمس جودة الماتريال ودقة التصميم
و آخر طبقة لما بصلها (الجوهر) لقي إنها هتلبي رغبته في معرف الوقت والتاريخ وإنها هتحتفظ بجودة الآداء لأطول فترة .
كدة احنا عرفنا الثلاث طبقات بتوع القيمة
نيجي بقي لأنواع القيمة
1- القيمة المبتكرة أو الجديدة :
وهي إنك تكون بتقدم خدمة أومنتج جديد كلياً علي السوق وماتعملتش قبل كدة وبكدة مش هايكون ليك بديل أومنافس .2- القيمة بالآداء العالي:
في الحالة دي بيكون فيه منتج مشابه لمنتجك أو خدمتك بس لازم تكون خدمتك
أو منتجك آداؤها أعلي وأفضل من آداء المنافسين
يعني مثلاً مش هتلاقي دلوقتي حد ماسك موبايل نوكيا 3310 علشان شركات المحمول التانية طورت في آداء المنتج كتير
يبقي إنت كمان لازم تزود آداء منتجك بإستمرار وتطوره علشان تستمرو تنافس بقوة
3- القيمة بالتخصيص :
في معظم الأحيان الشركات بتغرق السوق بمنتجاتها وبيكون إستخدامها مناسب لكل الطبقات وتحس إن المنتج متشابه جداً إلي حد التطابق ، ممكن إنت تستغل ده
وتعمل منتج متفصل للعميل بتاعك وده بيوصَله قد إيه إنت مهتم بيه
زي ما موتورولا عملت عند إطلاق جهاز موتو إكس ووصل بيهم الإهتمام إنهم يخلوا العملاء هما اللي يختاروا تصميم خاص بكل واحد فيهم وكمان يختاروا الماتريال اللي حابينها
(الاهتمام مابيطلبش) =D
4- القيمة بالخدمة الشاملة:
و هنا لو إنت بتقدم منتج معقد شوية زي مثلاً الأجهزة الطبية فأنت هنا لو قدمت المنتج بس ممكن العملاء مايعرفوش طريقة إستخدامه حتي من الكتالوج
و علشان لو إنت مهتم كنت عرفت لوحدك
فحضرتك المفروض تقدم المنتج وتوصيله وتركيبه وكمان التدريب علي كيفية إستخدامه
و بكدة يبقي إنت قدمت القيمة الشاملة للمنتج
5- القيمة بالسعر:
في حالة إن فيه منتجات منافسة أكثر جودة منك
فحضرتك علشان تنافس هتتفضل مشكوراً تقدم سعر أقل علشان تقدر تنافس وتستمر
وتستخدم المكسب في تطوير منتجك بردو اه مش بنبيع بليلة احنا ها =D✅ثانيا شرائح العملاء :
قولنا إن لازم تحدد عملائك كويس جدا علشان توصلهم منتجك أو خدمتك
العملاء مختلفين و كل شريحة منهم ليها احتياجتها و حياتها المختلفة
هقولك علي اربع طرق مختلفة تحدد بيهم شرائح العملاء
1- كامل السوق:
هنا بيكون عملائك أغلب الناس و مختلف الطبقات زي بيبسي كدة أغلب الناس بتشتريها بإختلاف طبقاتهم
2- السوق المخصص:
أظن باين من اسمه إنك بتختار شريحة محددة بخصائص و إحتياجات محددة و بتركز مجهودك كله علي إشباع حاجتهم
3- التجزئة :
هنا أنت مثلا مصنع أو شركة توريد مستلزمات الصيانة
بتتعامل مع عملاء مختلفين بإحتياجات مختلفة مع إن نشاطك واحد بس
فحضرتك هتبدا تقسم العملاء و تجزئهم
4- التنويع :
و هنا أنت بتلبي إحتياجات مختلفة و متنوعة للعملاء بتوعك بنفس المنتج
زي الفيس بوك مثلا لو أنت محتاج تعمل أصدقاء هيشبع إحتياجك و لو كنت مهتم بالبيزنس و محتاج تسوق لمنتجك بردو هيشبع حاجتك في نفس ذات الوقت
✅ثالثا نيجي بقي لقنوات التوزيع:
زي ما قولنا هي حلقة الوصل و نقطة الألتقاء بين المنتج و بين العملاء
بس خلي بالك قنوات التوزيع ليها وظائف لازم تؤديها علي أكمل وجه علشان توصل المنتج للعميل الصح
1- زيادة الوعي
هانستخدم الفيس بوك كقناة توزيع
حضرتك دلوقتي عملت منتج و بدات تستخدم الفيسبوك في تسويقه
أول حاجة لازم تبدأ توعي الناس بشركتك و بالمنتج و فايدته و إستخدماته إلخ
2- التقييم
بعد كدة لازم تسمح للناس بإنها تشارك برأيها و تقييم فكرتك و منتجك و ده هيساعدك سواء في تطوير أو تعديل منتجك و خدمتك
3- الشراء
بعد لما عرفتهم بمنتجك و خدمتك و قالوا رأيهم
تيجي بقي مرحلة الشراء و لازم حضرتك تسهل عليهم كل السبل لإتمام الشراء
من خلال إضافة رقم للتواصل و توضيح الأسعار و توفير خدمة التوصيل و توضيح سياسة الإستبدال و السترجاع و كمان خدمة مابعد البيع زي الصيانة و الضمان و حل المشكلات
و بكدة نكون لضمنا التوصيل و خدمة مابعد البيع مع مرحلة الشراء
✅رابعا : أهم المراحل و هي العلاقة مع العملاء :
قولنا بردو إنك لازم تهتم بالعملاء و ماتحسسهمش إنك مجرد شركة بتقدملهم منتج و إنهم مجرد مصدر ربح ليك
و إن لازم تربط البيزنس بتاعك بمشاعرهم و حياتهم
تعالي بقي نشوف أنواع العلاقات دي
1- العلاقة الشخصية :
معناها إنك لازم تدعم المشروع بتاعك بالعنصر البشري يعني لما العميل يكون عنده مشكلة مع منتجك او اقتراح يقدر يكلمه
غريبة مش كدة؟
لا و الأغرب إن لازم المنتج يرد عليه
طيب ازاي؟؟
ماحنا قولنا تدعم العنصر البشري و دي وظيفة خدمة العملاء او الدعم الفني
يعني مثلا لما النت يفصل و دي ما أكثرها بتقول ايه لنفسك أو لصاحبك ؟
كلم تي اي داتا شوف النت فاصل ليه
منطقيا تي اي داتا دي جماد
إنما فعليا هي إتحولت لعلاقة شخصية من خلال وجود شخص بيمثل تي اي داتا بيرد عليك و بيحللك مشكلتك أو مابيحلهاش مش متاكد
2- الخدمة الذاتية
و هنا بتعتمد علي طريقة help yourself
زي IKEA كدة انت ممكن تشتري ترابيزة مفككة من عندهم و تقوم أنت بتركيبها بنفسك
و دي طبعا بتكون لأنواع بيزنس معينة مش اي بيزنس كدة و خلاص
3- الخدمة الالية
و هنا حضرتك بتخلي الناس تتعامل مع الذكاء الإصطناعي
يعني تخيل حضرتك اللي بيقبضك ماكينة صراف الي
لا و ممكن تقولك معلش مش هاتقبض النهاردة علشان أنا عطلانة شوية
معلش!
4- خلق مجتمع او community
هنا بقي أنت ملكش اي تدخل لإن العملاء بيساعدوا بعض و بيحلوا مشاكل بعض
أنت كل اللي عملته إنك وفرتلهم مجتمع وليكن مثلا الموقع الخاص بيك او صفحة الفيسبوك
5- المحتوي المساعد
و ده بردو بيكون من خلال الcommunity اللي حضرتك عملته
و هنا العميل بيلاقي إجابة سؤاله قبل ما يسأله اصلا لإن بيكون في حد سال نفس السؤال و تم الرد عليه
6- شبكات التواصل الاجتماعي
بيتهيألي مافيش إختلاف إن تواجدك علي شبكات التواصل بقي شئ أساسي و هو اللي بيحقق كل اللي إتكلمنا فيه فوق ده
✅خامسا: نيجي بقي للفلوس
مصادر الايرادات :
قولنا إنك ماينفعش تعتمد علي مصدر واحد للدخل وإنك لازم تنوعهم حتي لو اضطريت تقدم المنتج نفسه مجانا
اه اه بجد ماتستغربش , تعالى نشوف ازاي
1- طريقة freemium
الطريقة دي اسمها بيجمع مابين free+premium
و هنا أنت بتقدم الحد الأدني من المنتج أو الخدمة للعملاء مجانا و لو عايز أكتر يدفع
انا دلوقتي فهمت الطريقة دي بتستخدمها dropbox
هما فعلا بيدوني مساحة تخزين مجانية بس لو عايز مساحة اكبر و مميزات أكتر لازم ادفع إشتراك سنوي و ابقي premium
2- رسوم الإستخدام
هنا أنت بتدفع الفلوس دي لكل مرة إستخدام للمنتج أو الخدمة
(لو عايز تبعت رسالة موبايل او تعمل مكالمة مثلا )
3- رسوم الأشتراك
و هنا بقي بتخلي العميل يدفع مبلغ معين نظيرإستخدام المنتج أو الخدمة لفترة زمنية محددة
زي إشتراك الجيم كدة
4- الشراء ضمن التطبيقات
و هنا أنت بتقدم التطبيق للعميل مجانا و ليكن مثلا لعبة بس بتعمله أدوات تساعده يكون أقوي و يعدي مراحل أكتر بفلوس
5- الأعلانات
و دي من أكتر الوسائل المنتشرة
اكيد إستخدمت تطبيقات كتير مجانية بس لقيت إعلانات كتير بتظهر
اهو هما بقي بيكسبوا من المعلنين دول
✅سادسا الموارد الأساسية
و قولنا إن الموارد الأساسية هي أهم الموارد اللي بيعتمد عليها البيزنس بتاعك و إنها بتنقسم لموارد بشرية و مادية و فيزيائية إلخ
✅سابعا الأنشطة الأساسية
بردو قولنا إن دي الأنشطة اللي بيتم إستخدام الموارد الأساسية فيها لإنتاج المنتج الأساسي
شئ أساسي اهو
الأنشطة دي بقي يا سيدي بتنقسم لكذا نوع:
1- الأنتاج
و هي عملية الأنتاج نفسها و كل الأنشطة اللي مرتبطة بيها من مبيعات و تسويق إلخ
2- حل المشاكل
و دي لو أنت بتقدم خدمة فالخدمة مش بتنتج
الخدمة بتحل مشكلة زي المحامي و المحاسب كدة
3- المنصات
و هنا أنت بتكون منصة بتوصل مابين طرفين زي شركة الشحن كدة
✅ثامنا هيكل التكاليف:
هيكل التكاليف cost structure
و هنا بقي بنذكر كل التكاليف الثابتة و المتغيرة كمان
ومن الأمثلة على أهمية مخطط نموذج العمل في تجنيب الشركات دفع تكاليف لا حاجة لها، شركة ناشئة كانت لديها خدمة تقوم بإجراء مسح على الأراضي الزراعية ومن خلال مقارنات الصور وعدّة خوارزميات يمكنها التنبؤ بأمراض معيّنة قد تصيب المحصول بالتالي هذا التنبؤ يساعد على تجنّب وقوع الكارثة.
✅تاسعا و أخيرا الشركاء الأساسيون
و هنا مأقصدش شريكك في الشركة اللي هو أغلب الوقت بيكون صاحبك اصلا
لا أنا اقصد الشراكات اللي بتساعد علي نمو و إستمرار شركتك زي شركات الدعاية و الهيئات الحكومية و هكذا و طبعا الشراكات دي متغيرة و مش مستمرة علي حسب إحتياجك ليها في كل مرحلةبس يا عماد هي دي البزنس مودل
التعليقات