التسويق بقي من اهم مجالات العمل حاليا علشان كدة ناس كتير اتجهت انهها تتعلم تسويق بس وقت ما نحب نتعلم مش هنلاقي احسن من كوتلر
كتاب التسويق من الألف للياء
لما نتكلم عن التسويق ف مفيش أفضل من فيليب كوتلر نتكلم عنه ونتعلم منه لإنه يعتبر رائد التسويق في العالم بلا منازع
عمنا كوتلر عمل كتاب اسمه marketing insights from A to Z و حددلنا في الكتاب ده مبادئ تسويقية لازم ناخد بالنا منها كوتلر شايف إن المشكلة اللي بتقابل قطاع الأعمال مش نقص البضائع
لا هو شايف إنها نقص المستهلكين
بيقول إن معظم الصناعات بتوفر بضائع زيادة عن حاجة المستهلكين أصلاًو سبب ده أن كل شركة بتحط تارجت إنها تزود المبيعات بنسبة 10% مثلاً في حين إن نسبة نمو السوق 3% بس فيحصل إيه بقي؟!
يحصل فائض في البضاعة وتبوظ في الملاحات وتفضل بقي الشركات تغني و الملاحة و الملاحة 😃يبقي كدة المشكلة نقص المستهلكين و زيادة البضاعة
الزيادة دي بقي بتخلق منافسة شرسة بيكون نتايجها تقليل في سعر المنتج و زيادة في المعروض و المحفزات التسويقية و ده بيقلل هامش الربح و الأرباح تقل و يحصل خساير
كوتلر بيقولنا كمان إن التسويق هو مصنع المستهلكين اه اه يقصد إن حضرتك بتصنع مستهلكين يشتروا المنتج اللي بتصنعه بردو شوف سبحان الله
هو يقصد إنك ماتعتبرش إن التسويق هو فن تصريف المنتجات و ماتخلطش بينه وبين البيع لإنهما يكادا أن يكونا ضدين
يقصد إن حضرتك تخلق قيمة جديدة غير مسبوقة و ذات أهمية للمستهلك وتساعده يحصل عليها من خلال عملية الشراءوبيقولك إفتكر الثلاث كلمات دول كويس (الجودة-الخدمة-القيمة)
كمان قال إن التسويق بيبدأ قبل الإنتاج بفترة كبيرة أكيد حضرتك عارف ده و عارف إنك قبل ما تنتج لازم تدرس السوق والمنافسين والمستهلكين من خلال البحث التسويقي علشان تعرف الناس محتاجة إيه ؟
وإيه اللي هتقدر تقدمه و يميزك و إزاي تسعر وإيه قنوات التوزيع اللي هتعتمد عليها وأفكار الترويج
لازم كمان تكون عارف إن وظيفة التسويق هي تحويل رغبات المستهلكين إلي فرص مربحة وإن هدفه هو خلق حلول أفضل توفر علي العميل وقت وجهد وبحث وتنال رضاه
أما بالنسبة للعملاء ف قالك إن هما أهم حاجة في حياتك وإنك لازم تهتم بيهم جداً لإن لو ماعملتش كدة هييجي حد يهتم بيهم وياخدهم منك (الاهتمام مابيطلبش ها)و إنك كمان مايكونش همك كله كسب عملاء جدد لإن ده هيجي بالسلب علي العملاء الحاليين اللي هما أصلاً يمثلوا 90% من الأرباح بتاعتك وإن تكلفة الحصول علي عملاء جدد أكبر من تكلفة الحفاظ علي العملاء الحاليين فيعني خير الأمور الوسط
بالنسبة للإعلان ف كوتلر بيقولك إن الإبداع والإبهار مش بيضمنوا ليك إعلان ناجح مافيش مانع منهم بس لازم بردو العميل يحس إنك بتكلموا من أرض الواقع شوية وإنك بتقدمله حلول من خلال إعلانك زي فيراري مثلاً بتقدم حلول ل 3 أحلام : أن تكون بطلاً ، أن تكون مميزاً ، أن تكون حراً .
و أخيراً كوتلر كلمنا عن العلامة التجارية قالك بقي إن اي حد يقدر يعمل صفقة ناجحة بس مش أي حد عنده القدرة والإلهام والمثابرة إنه يبني علامة تجارية
فركز علي بناء علامة تجارية واعطيها من وقتك وجهدك علشان ترتاح بعدين
وهنتكلم فيمقال اخر عن ازاي نبني علامة تجارية بشكل احترافي
شكرا...
التعليقات