الاغنياء و المصاريف التافهة ؟! اغنياء يشترون لوحات بالملايين و الامر منطقي جدا فقط حاول ان تفهم بيفكروا أزاي ؟!
في فبراير 2015
الشيخة المياسة بنت حمد بن خليفة آل ثاني
وهي أخت أمير قطر
تميم بن حمد بن خليفة آل ثاني
اشترت لوحة بول غوغان when well you marry
اشترت اللوحه دي ب ٣٠٠مليون دولار
مش بس كده كمان اشترت لوحة the card players ل بول سيزان ب ٢٥٠ مليون دولار
الأرقام دى مش منطقية أبدا ، الارقام دي كبيرة بشكل انت مش متخيله
انت لو بتحب ساندويتشا ت ماكدونالدز فهي ممكن تجيبلك ١٤٩ مليون و ٣٣٧ الف و ٤١٤ بج ماك و معاهم فرايز و كولا زيرو لارج كمان
انت متخيل يعني بالفلوس دي ممكن ٥١١٥ شخص ناكلهم من ساعه ما اتولدوا لحد ما يوصلوا لسن ٨٠ سنه بج ماك كل يوم
بالفلوس دي انت ممكن تجيب ١٠٣ طن ايفون ١١ برو
الناس الاغنياء دي ازاي بتصرف الفلوس دي كلها في حاجات ملهاش لازمة كدا حتى اللوح مش جامده اوي " طبعا هي حلوة جدا بس أنا لازم أقول أنها مش حلوة عشان سياق المقال "
ليه الناس دى مفكرتش في الفلوس بالشكل اللي أنا بفكر فيه في الفلوس
أعتقد عشان نقدر نحدد الناس بتفكر إزاي لازم نفهم الأول هما بيتصرفوا كده ليه ؟
هل هما مثلا عايزين يغيظونا ؟ ولا مثلا ما عندهمش مكان يعينوا فيه الفلوس فبجيبوا بيها حاجات ملهاش لازمة ؟
ايه سر أن الأغنياء دايما بيجيبوا حاجات احنا مش شايفين أنها مهمة ؟ وازاي هم أغنياء وهم بيصرفوا المصاريف دي كلها ؟
مش المفروض الناس دى هي الناس الناصحة الشاطرة اللي تعرف تجيب القرش من الهواء وتعرف تحافظ على الفلوس كويس ؟
أكيد الموضوع مش كده
في سنه ١٩٤٣
عالم نفس امريكي لاب و ام من روسيا اسمه ابراهام ماسلو
ابراهام ماسلو قدم ورقة بحثية اسمها نظرية الدافع البشري
كان في الورقه دي مقدم اكتشافه الجديد اللي سماه هرم ماسلو لتدرج الأحتياجات
ماسلو كان بيقول أن الاحتياجات البشرية اللي يجب اشباعها بتبدأ من الحاجات الأساسية اللي في قاعدة الهرم وكل ما الإنسان بيتطور بتنقل من مرحلة للمرحله اللي بعدها
نظريه ماسلو بتشبه السلوك الانساني بلعبه كل ما بتخلص مستوى تقدر تتنقل للمستوى اللي بعده
فكان بيفترض أن الاحتياجات البشرية بتبدأ من قاعدة الهرم وهي الاحتياجات الفسيولوجية زي الأكل والشرب والنوم والجنس و بعد كده حاجات الأمان زي السلامة الجسدية والأمان الوظيفي وامان الموارد وامان الممتلكات والامان الصحي وبعد كده الحاجات الاجتماعية زي الصداقه والعلاقات الأسرية وبعد كده الحاجة إلى التقدير ، تقدير الذات والثقة في النفس واحترام الآخرين وكمان الاحترام من الآخرين وبعد كده في الاخر خالص الحاجه إلى تحقيق الذات الابتكار بقى وحل المشاكل تقبل الحقائق والحس الفني وتذوق الجمال
كل ما بتخلص مستوى بتتنقل للمستوى اللي بعده
طبعا مكانك في الهرم ممكن يكون في تغير مستمر الموضوع بيتأثر بالبيئة العامة للفرد اللي عايش فيها وكمان على مدى عمر الإنسان الانسان امكانياته بتختلف وممكن يفضل يتنقل بين المستويات دى شويه فوق و شويه تحت
و كمان ظهور النظرية دي ادى لتوجيه الاقتصاد بشكل مختلف فمثلا بالنسبة للاحتياجات الفسيولوجية هنلاقي ان مصنعي الأغذية والمشروبات يقدروا يستغلوا تقريبا كل الناس لأن كل الناس لازم تبقى حققت قاعدة الهرم
وبالنسبة لحاجات الأمان هنلاقي إن شركات التأمين وشركات أجهزة الإنذار وشركات الحراسه والبنوك بتشتغل كويس لسد احتياجات المرحلة الثانية من الهرم ده
وبالنسبة للحاجات الاجتماعية هنلاقي بتوع المطاعم الفخمة وقاعات الأفراح وكل المناسبات الاجتماعية بيتنافسوا على سد الاحتياجات الاجتماعية
وبالنسبة لاحتياجات تقدير الذات هنلاقي إن في مصنعين كثير للسيارات مثلا بتركز على الفخامة مثلا او على التسويق ان السيارة دي لفئه معينه من الناس او الموبايل من نوع معين اللي بيشيله الاغنياء و هكذا
و بالنسبة لتحقيق الذات هنلاقي بقى الشركات و الاعمال اللي بتوجه خدماتها و منتجاتها لاغنى الناس زي العروض الفنيه الفاخره و اللوحات الغاليه المصنوعه يدويا و الاثار و السلالات المعينه من الحيوانات
ماسلو كمان شايف أن اللي بيوصل لقمة الهرم بيبتدي يوصل الامور ديمقراطية اكثر وكمان بيكون بيحاول يوصل للكمال اكثر
و بعيدا عن النقطة الأخيرة دى
اللي اقصد اقوله ان اللي ممكن يكون بالنسبه لينا غريب هو غريب نتيجه لظروفنا و امكانياتنا احنا و يمكن لو ظروفنا و امكانياتنا اتغيرت سلوكنا و انماط استهلاكنا هتتغير
وعلى الرغم من تعرض نظرية ماسلو لانتقادات كثيرة
انتقادات زي انه اللي بيوصل لقمة الهرم بيكون اكثر ديمقراطية واكثر سعيا للكمال
و اللي احنا على مدار التاريخ و حتى فعصرنا الحالي شفنا ناس كتير كان معاهم فلوس كتير و وصلوا لقمة الهرم و بالعكس هما دكتاتورين ومتسلطين ولم يقتربوا من الكمال على الإطلاق
و فنفس شفنا ناس تانيه و هبت كل ثرواتها في سبيل البشريه و العلم و فعلا حاولت توصل للكمال.
و بعد كل الانتقادات دي نظريه هرم ماسلو نسبيا تقدر تفسر بعض انماط السلوك عند البشر
وكان على الرغم من الانتقادات دي كان يعتبر لاول مره في علم النفس شخص يدرس في السلوك الطبيعي للانسان بدل ماكان قبل كده دراسه علم النفس مقتصره على التصرفات غير الطبيعية و الاضطرابات النفسيه و الامراض العصبية
خلاصة المقال ان على الرغم من ان الناس مختلفه عن بعض و مش هنقدر ابدا نجمعهم في قالب واحد او نضعهم تحت تصنيف واحد الا ان غالبا البشر هتكون دوافعهم واحدة
وفي نهاية المقال احب ان انوه ان ذكري لأي شخص في المقال لا يعني رفضي او انتقادي لشخصة أو تصرفاتة انما فقط تم ذكرهم لتوضيح امثله
وكمان ممكن تشوف الفيديو اللي اتكلمت فية عن موضوع المقاله من هنا
التعليقات
يَا أَيُّهَا الَّذِينَ آمَنُوا أَنفِقُوا مِمَّا رَزَقْنَاكُم مِّن قَبْلِ أَن يَأْتِيَ يَوْمٌ لَّا بَيْعٌ فِيهِ وَلَا خُلَّةٌ وَلَا شَفَاعَةٌ ۗ وَالْكَافِرُونَ هُمُ الظَّالِمُونَ
الفيديو كان جامد فطبعا المقال جامد جدا
اكثر من رائع يا نجم